1 Trùh xèq, ƀaiq ƀình plình trùh ta Sôđom; jò aih Lot qnang haqngui ajang trong mùt ta plài. Jò Lot hnoq baiq ƀình plình trùh, haq padinh yòng đìh rai bla op rađeh ta haqneq. 2 Haq doe: Wa craq da au! Joq au cali calo đeh chôp thia ta hnim au rai padài mang kô ta-aih. Chôp qnheo jènh, khoe aih trùh sroq èh rìu enh kùi chôp hi lam hòm. Baiq ƀình plình doe: Ùh, mang kô ma kùi roc trong 3 Mahaq Lot àu akhen waq ka jah, wa ƀình plình loh ka ep mùt hnim haq. Haq padon yiniang, broq ƀênh ùh wàt blo, wa ƀình plình hi acaq.

4 Wa ƀình plình qnhòq lam kùi, ƀài mangai calô ta Sôđôm enh qyoh trùh craq, aih la dìq dŏng ka mangai gùng aih, dìq tùh loh dudan ka hnim. 5 Ƀài aih creo ka Lot hu bòch: Wa tamoe ma khoe mùt hnim ìh xèq kô ìq taleq?. Drah qnoh wa tacô đòeq nhèn hu canau. 6 Lot hi loh thia ƀài wì ma oe enh gùng, khoe aih clênh qmang. 7 rai doe ka wì ta aih: Kô joq au cali calo oh daq apaq broq trong dù aih! 8 Kô au i ƀaiq ngai kon cadrì qnhòq yŏc ŏng, au am wa aih ka pì, pì enh broq cleq hi mac da pì, waq toq pì paq broq cleq haƀo ka wa ƀaiq ngai tau; xài taiq aih raq wa haq majah thia hamong ta hnim au. 9 Ƀài mangai ta aih doe: Ìh wia taqnoeq! wì doe hòm: Mangai kô lam oe clòh tacô, aih cadoe enh hadrah ka nhèn qmòh! Òq hêq brì ka nhèn tabroq ka ìh yeo hamoq ka wa tamoe tau hòm. Khoe aih wì hnen rachùq Lot cadêh, rai glàm hu raliang cađac qmang hnim.

10 Mahaq ƀaiq ƀình plình hnhu tì qmùt Lot ta hnim, khoe aih hi clòng qmang, 11 khoe aih, hi tabroq ka ƀài mangai enh gùng ka qmang, enh mangai qyoh trùh mangai craq, dìq loh ka pùa mat, jaq wì chaq trong qmang mech lep, mahaq dua ma ùh jah,

12 Wa ƀình plình bòch Lot: Ìh oe i ka cabô tacô hòm ùh? Kon ŏng, kon calô, kon cadrì, èh cabô hòm tacô ma mangai da ìh qnoh dŏng ma dìq beq! 13 Nhèn hu raliang cađac jang kô, majah qmang aih bàu creo dang da mangai gùng kô khoe tŏc trùh ta Jêhowa, dài haq majah thê nhèn loh hu palùng đac. 14 Lot loh enh gùng doe deh ka kon ŏng ma khoe yŏc kon cadrì haq: Drah yòng beq! loh ma khoe ka tacô, majah qmang aih Jêhowa padon palùng đac plài kô. Yàng aih ƀài kon ŏng xoh dèh haq capoch blìa. 15 Trùh qngah, wa ƀình plình bahuiq Lot rai doe: Drah yòng qnung mai ìh xam wa kon cadrì ìh ma qnang oe tacô loh beq, yùq èh ìh loq ep cachìt ataq đeh jò palùng đac plài kô. 16 Mahaq Lot xan raqngòt yôt; taiq Jêhowa ha-och ka Lot, dài wa ƀình plình cadop yŏc kŏng dùi haq xam mai xam wa kon haq qnoh enh gùng ka plài.

17 Jò wa ƀình plình khoe qnoh wì loh enh gùng, i mòeq ngai ta wa aih doe: dot drah cadàu amot beq hu dŏng rađeh, apaq hwi enh rù èh hanoh apaq yòng hu padài ajang leq ta tamang; drah cadàu tŏc mot ta wang, ùh meh loq cađac rađeh. 18 Lot padreo bàu: Waiq Chuaq! ùh jah. 19 Hacô, hapŏng ìh khoe jah xôq ramot enh ngèa ka Chuaq; Ìh khoe mahnu deh kan loq waq kàn ka au đòeq hu dèch au jah rìh. Mahaq au cadàu tŏc mot ta wang ùh tem adroe ka kan ranàc kàn trùh, aih xài au ep cachìt. 20 Hatau plài tau khoe qyoh èh yeo haten đòeq au hujah hanình. Yôi yôiq, chop Ìh am au jah hanình ta tau đòeq hujah wèq dèh kan rìh, plài tau ma joq qyoh qmòh? 21 Ƀình plình doe: Hacô au am tam ka ìh yiniq ìh ma bòch, au ùh palùng đac plài ìh ma doe aih. 22 Drah lam amot ta aih beq, majah qmang aih au ùh broq cleq jah jò ìh qnhòq mùt trùh ta aih (Aih ìq dài wì ma creo ka plài aih la Xoa).

23 Jò mahì khoe tŏc aih Lot mùt khoe trùh ta plài Xoa. 24 Khoe aih, Boc lình caqnìh mè liu hwình xam ùnh enh nòe da Chuaq oe taplình clìh enh qnhèq ka Sôđôm xam Gômôro. 25 Palùng baiq plài kô, xam ta tamang, xam dìq dŏng mangai ta aih hloe xam ƀài long nhat ta taneh gùng aih.

26 Mahaq mai da Lot hwi dang lùi hu ngan deh enh rù, dài haq majah wìh wìa jrang boh

27 Apraham rìu sroeh, lam trùh ajang nòe đeh ma khoe yòng enh ngèa ka Jêhowa. 28 Haqmiang ngan qnah ta Sôđôm xam Gômôro, xam jàp gùng oe ta tamang, aih cadoe hnoq enh taneh nhòe tŏc ma bahluàng, tìah qmang ka nhòe ta tanùh ùnh kàn. 29 Jò aih, jò Jêhowa raliang đac ƀài plài pla ta tamang aih la plài Lot ma oe, aih hmàng trùh Apraham, dèch Lot claih enh nòe raliang aih.

30 Lot oe ta Xoa aih haq crè pi cajaq cleq, dài haq xam wa kon cađac ta-aih hu cadàu tŏc tawang, lam amot tanòe kòp hmo. 31 Mangai ma daq doe deh ka oh: Baq da ba kô khoe craq, manòeq kô ta crŏng taneh kô pi oe i cabô đòeq wìa ŏng mai ti ba tìah ka da wì qnoeq. 32 Beq ba qmù alac ka baq, èh ba kùi ti haq đòeq hu i hlài xinoe da baq. 33 Mang aih, wa oh daq qmù alac deh ka baq khoe aih mangai daq thia kùi deh ti baq; mahaq baq haq ùh hmàng jò leq haq thia kùi èh jò leq haq yòng. 34 Trùh hì da èh, daq doe deh ka oh: Meh, mang ìq au khoe kùi ti baq, hì kô ba qmù alac hòm ka baq, khoe èh oh lam kùi ti haq, đòeq hu i hlài xinoe da baq. 35 Mang aih wa qmù hòm alac deh ka baq, khoe aih mangai ma oh rìu haq thia kùi deh ti baq; mahaq baq haq ùh hmàng jò leq haq thia kùi, jò leq haq yòng. 36 Qmang aih wa kon da Lot wê cliac dèh enh baq. 37 Mangai daq ha-uang jah mòeq ngai kon calô, yiniq dèh ka kon aih Mô-ap; aih raq kan cadraq da mangai Mô-ap trùh hloe manòeq. 38 Mangai oh hadai ha-uang mòeq ngai kon calô, haq yiniq dèh ka kon la Bênammi aih raq kan cadraq da mangai Ammôn trùh manòeq.