1 Apraham lam enh aih mùt tagùng Nêgep, trùh oe ta Gêra, ta adreo wa Cađe wa Suro. 2 Ta aih Apraham ràu trùh Sara mai da đeh: Haq qmat oh au. Abimêlec bùa Gêra, thê wì lam rùp Sara. 3 Mahaq ta jò apô damang, Boc Plình mahnu loh ti bùa Abimêlec rai doe: Kô oq, ìh qmat èh cachìt ka mangai cadrì ìh ma khoe rùp qmat, majah qmang aih haq khoe i ŏng, 4 Jò aih bùa Abimêlec qnhòq thia haten ka mangai cadrì aih, haq majah doe: Waiq Chuaq! Wìa ka Ìh palùng dŏng mòeq diac taq atoq? 5 Ma ùh joq mangai aih doe ka au rameh: Qmat oh cadrì au? èh mangai cadrì qmat ma ùh doe: Qmat daq au? Au broq bìac kô xi manoh hnhuh jang xam tì kŏng hreo lem. 6 Jò apô, Boc Plình doe tam ka haq: Au hadai loq ìh broq qmang aih tiaq manoh hnhuh jang, dài aih ìq raq au majah tàt ìh ùh hìaq broq yiniq lui ka au, rai ùh am ìh troq trùh mangai aih. 7 Manòeq kô, mangai cadrì qmat drah jao padreohlài da ŏng haq, majah qmang aih ŏng da haq qmat la mangai pajàu, haq jah waiq khàn am ka ìh, aih èh ìh men jah rìh. Tàng khen ùh padreo hlài, aih èh loq rameh ìh xam dìq dŏng mangai leq da ìh cachìt dìq.

8 Bùa Abmêlec rìu sroeh, creo dŏng deh ka ƀài hapŏng, anoe hlài rìm nà, aih dìq dŏng ka wì hamàih. 9 Khoe aih, Abimêlec creo ka Apraham rai doe: Ìh broq ka au cleq qmang qmat? Au i broq cleq ùh troq ka manoh ìh aih ìh ma broq ka au xam dìq ka taneh diac kô ep pòq yiniq lui kàn qmang kô? Ìh khoe broq ka au yiniq ma ùh khòh broq. 10 Bùa Abimêlec doe hòm ka Apraham: Ìh hèm qmang leq majah broq qmang aih? 11 Apraham tèu: Cla au hèm dèh: tagùng kô ùh i ka cabô iu yùq ka Boc Plình, aih èh ahìaq taiq mai au kô èh wì majah jêh đac au. 12 Qnah hòm, haq qmat joq qnàng oh cadrì au, oh pajùm baq miq mangai deh hra; au yŏc haq broq mai. 13 Jò BocPlình broq ka au pac lac hangai dèh ka hnim baq, aih au i doe ka haq rameh: Kô trong gè broq đòeq hu patô rađeh joq ha-och ka au, rìm nòe bèn lam, jò ràu trùh au thê doe rameh “Haq qmat daq au”!

14 Khoe aih, Abimêlec thê qnoh trìu, ƀo, hapŏng ka drì hapŏng calô ka Apraham, rai padreo hlài Sara mai haq, rai anoe hòm: 15 Hacô, gùng au khoe palauq đòeq ka ìh, ìh enh taleq hi oe ta aih. 16 Khoe aih bùa doe ka Sara: Kô au am ka daq ìh mòeq muàn capiac ƀac; ƀac aih am ka ìh tìah ka bai prình mat ƀài wì ma oe ti ìh, aih èh rìm ngai dìq jah doe ìh mangai taq atoq.

17 Khoe ka aih Apraham waiq khàn ka Boc Plình, aih Haq broq ka Abimêlec jah brêh ka yinìq, hloe ka mai xam ƀài hapŏng da haq; qmang aih wì dìq jah i hlài kon. 18 Majah qmang aih, taiq bìac Sara mai da Apraham Boc Plình broq ka hnim bùa Abimêlec dìq loh dŏng ka xon.