1 Chuaq Jêhowa trùh hmàih ka Sara tiaq qmang ka bàu ma khoe doe, rai broq ka Sara wop qmang ka bàu đeh ma khoe anoe. 2 Sara oe jiang, ha-uang mòeq ngai kon calô ka Apraham jò hanam khoe craq, wop troq jò Boc Plình ma khoe dì deh. 3 Apraham yiniq ka kon calô Sara ma khoe ha-uang ka rađeh la Ysac. 4 Troq rahem hì, Apraham broq ramènh kat akia ka Ysac tiaq bàu Boc Plình ma khoe tanap thê. 5 Apraham khoe jah mòeq hrinh hanam jò ma ha-uang Ysac kon haq. 6 Sara doe: Boc Plình khoe aràng ka au bàu do lem bùi. Rìm ngai hìa dìq jah lem bùi bìac da au. 7 haq doe tam: Cabô hùa doe ka Apraham kô èh Sara jah ta-ùq kon? Majah qmang aih au khoe ha-uang kon calô jò haq khoe craq pi nèn.

8 Kon qyoh yòng kàn hi cađac tôh. Wop hì Ysac cađac tôh, Apraham padon yineang kàn hu acaq manè. 9 Sara hnoq kon calô da Aga, mangai Êdip, khoe ha-uang ka Apraham, halê do, 10 haq doe ka Apraham: Hnan đac mangai hapŏng cadrì hloe xam kon haq lam beq, majah qmang aih kon da mangai hapŏng cadrì qmat wìa ka wiang jah waq kùng hang ti Ysac kon au. 11 Bàu kô broq ka Apraham mangò ta manoh, taiq kon calô da rađeh. 12 Mahaq Boc Plình doe ka Apraham: Ìh ùh dùh mangò dèh ka kon calô xam hapŏng cadrì ìh, Sara anoe qmang leq, tiaq qmang ka bàu haq ma doe; majah qmang aih enh Ysac qmat èh ma ha-uang loh moeq xinoe pòq yiniq ìh. 13 Au hanoh broq ka kon calô da mangai hapŏng wìa moeq diac kàn, majah qmang aih haq hadai loh enh ìh.

14 Apraham rìu sroeh, yŏc ƀênh xam moeq cabi diac am ka Aga; taqmac ƀài dahwèq aih ta plêh haq rai jao kon calô ka haq khoe aih hi thê lam. Aga loh lam, haq lam lìq lam làn tanòe gùng hawit Ƀê-e sêƀa. 15 jò diac ta cabi khoe dìq haq đòeq kon qyoh haqngui ajang kon xèm long. 16 cla haq haqngui tangèa yeo hangai ka aih jah qnah ta mòeq qmang pênh panenh; haq doe: Yôi! broq qmang leq au ma manaq hnoq kon qyoh cachìt! Haq haqngui tangèa ka aih rai crò hmoe.

17 Boc Plình tàng bàu kon qyoh hmoe, aih ƀình plinh da Boc Plình oe ta trŏc hi creo ka Aga rai doe: Aga! Ìh i yiniq cleq qmat? Apaq yùq cleq majah qmang aih Boc Plình khoe tàng bàu kon qyoh hmoe ajang nòe haq ma kùi. 18 Drah yòng dèch kon qyoh aih rai hnhu tì carùp haq, majah qmang aih au jah broq ka haq wìa moeq diac kàn. 19 Khoe ka aih Boc plình pèch mat Aga; haq hnoq mòeq toq adràm diac, haq lam qmùc bình cabi am kon qyoh ôq. 20 Boc Plình am xôq ramot ka kon qyoh aih, haq yòng kàn, oe tanòe hawit, rabiaq ka pênh panenh. 21 Haq oe ta đùng hawit Pharan; miq haq ban ka haq mai aih la mangai gùng Êdip.

22 Ta qnhòng aih, bùa Abimêlec xam Phicôn, gàu bài cla craq lình, doe ka Apraham rameh: Boc Plình am ka ìh xôq ramot ta rìm yiniq ìh broq. 23 Qmang aih, manòeq kô ìh yŏc yiniq Boc Plình đòeq hu hapah rameh: Ùh jò leq ìh qnùt au, kon au hloe xam xinoe au. Mahaq ìh broq alàng ka au xam ka gùng ìh qnang oe, moeq manoh la alàng tìah ka au khoe alàng ka ìh diq. 24 Apraham doe: Au hùa hapah.

25 Apraham mamùc ka bùa Abimêlec bìac adràm diac ƀài hapŏng da bùa khoe blah yŏc. 26 Bùa Abimêlec hi doe: Au ùh hìa cabô ma khoe broq qmang aih, cla ìh ji ùh i doe ka au adroe, hì kô au qnang loq ka hloh.

27 Khoe aih, Apraham rùp trìu xam ƀo dèch ka bùa Abimêlec, khoe aih wa hi tajao ka dabau. 28 Apraham lah đòeq crài tapèh toq trìu caqmon adrùh enh cadrong; 29 aih bùa Abimêlec hi bòch: Tapèh toq trìu caqmon adrùh lah đòeq crài qmat đòeq broq cleq? 30 Haq padreo bàu doe: Ìh dì yŏc tapèh toq trìu tì kŏng cla au dèch ka ìh kô, đòeq hu panhìn cla au kô ma khoe chìa diac adràm kô. 31 Aih ìq wì majah creo yiniq ajang kô la Ƀê-e Sêƀa, majah qmang aih ta aih wa baiq ngai khoe hapah ti dabau. 32 Qmang aih wa tajao ti dabau ta Ƀê-e Sêƀa. Khoe aih Abimêlec xam Phicôn cwan gàu ƀài cla craq lình hi yòng hlài dèh tagùng Philitin. 33 Apraham pìt mòeq xèm long me ta Ƀê-e Sêƀa, èh ta aih haq waiq dang yiniq Jêhowa aih la Boc plình halình mòeq đòe. 34 Apraham oe ta Philitin dùnh hì dùnh mang.