1 Jò rìm yiniq tau khoe gêh, aih Boc Plình hi qnhro Apraham. Haq doe: Apraham! Hacô au kô, Apraham padreo bàu. 2 Boc Plình doe: Drah rùp kon mòeq da ìh ma loq waq, aih la Ysac, hu lam tagùng Môri-a, ta aih dèch kon qyoh aih broq ramènh bùh oe tanòe bui wang au ma hu patô am.

3 Apraham rìu qmòe ka sroeh, taqmac lùa, qnung baiq ngai hapŏng xam Ysac kon cla haq, hadai lam, haq hanoh koh ra-ùnh hu padon ka ramènh bùh, khoe aih hi lam tanòe Boc Plình ma tanap thê.

4 Trùh hì piq, Apraham haqmiang ngan hnoq nòe aih enh hangai, 5 aih haq doe deh ka wa hapŏng: chôp oe tacô raq ti kon lùa; ma kon qyoh kô lam ta tau èh đòeq kùh waiq, khoe èh hi tawìh hlài ti chôp. 6 Apraham yŏc ra-ùnh padon ka ramènh bùh, taqmòq ka Ysac kon cla haq, khoe èh ta tì cla haq wê ùnh xam pla chang, èh dìq baiq ka wa baq kon hi hanoh lam.

7 Ysac doe ka Apraham, baq haq: A baq? Haq tèu: Cleq kon! Kô baq. Ysac doe: Ra-ùnh i kô, ùnh i kô mahaq kon trìu enh leq hu broq ramènh bùh? 8 Apraham doe Cla Boc Plình jah palauq đòeq dèh kon trìu hu broq ramènh bùh, kon ôi! khoe aih cla wa baq kon lam hòm.

9 Wa lam trùh nòe Boc Plình ma khoe tanap thê; ta aih Apraham broq mòeq toq prang tadreo, srom ra-ùnh enh qnhèq kàt Ysac kon cla tah enh crŏng ra-ùnh. 10 Apraham hnhu tì yŏc chang hu jêh deh kon. 11 Ƀình plình da Jêhowa oe enh plình creo dang loh: Apraham, Apraham! haq padreo bàu: I au kô. 12 Ƀình plình doe: Apaq poh tì ta chac kon qyoh, hadai paq broq cleq ma haƀo ka haq; majah qmang aih manòeq kô au loq ìh joq loq iu yùq ka Boc Plình, majah qmang aih ìh ùh adênh ka au kon ìh, aih kon mòeq da ìh. 13 Apraham qngoc ngan, hnoq enh rù i mòeq toq trìu calô, haki hlac ta dradrèn long, hi rùp kon trìu aih dèch broq ramènh bùh thai dèh kon. 14 Apraham yiniq ka jang aih la: Jêhowa Jirê. Dài aih manòeq kô majah i bàu cachôi: Ta bui wang da Jêhowa i palauq đòeq.

15 Ƀình plình da Jêhowa oe enh plình creo ka Apraham yàng atìq rameh: 16 Jêhowa doe rameh: Pàng ìh khoe broq bìac aih, ùh adênh qmòe dèh kon, aih la kon mòeq da ìh aih èh au kô hadai yŏc qmòe cla au đòeq hu hapah rameh: 17 am xôq ramot ka ìh, tam ka xinoe ìh jah cràm qmang ka halŏng ta trŏc bàc qmang ka braih diac raxìq, xinoe aih jah blah yŏc gùng plài da mangai tablêq ka wì haq. 18 Taiq ìh khoe iu tiaq bàu au tanap thê, dài ƀài taneh diac ta crŏng taneh dìq canòm ka ìh đòeq hujah xôq ramot.

19 Khoe ka aih Apraham wìh hlài ajang nòe wa hapŏng; wì haq yòng enh aih hadai hlài ta Ƀê-e Sêƀa. Apraham oe ta Ƀê-e Sêƀa.

20 Atìq ka ƀài yiniq aih, wì anoe hlài ka Apraham qmang kô: Minca hanoh khoe pòq miq, haq khoe ha-uang kon ka Nacô oh ìh. 21 Kon calô ramua aih la Uxo, oh calô la Buxo, Kêmu-ên baq da Aram; 22 Kêset, Haxô, Phinđac, Jiclap xam Bêtu-ên; 23 Bêtu-ên aih daq da Rêƀêca. Minca ha-uang rahem ngai kon calô ka Nacô oh da Apraham. 24 Cadrì yang da haq yiniq la Rê-uma, hanoh ha-uang kon, aih la Têba, Gaham, Tahat, xam Ma-aca.