1 Sara rìh jah mòeq hrinh baiq jàt tapèh hanam. Aih la hanam rìh da Sara. 2 Sara cachìt ta Kiri-at Araba (aih la Hêprôn) oe ta gùng Cana-an. Apraham trùh lòm Sara rai crò hmoe ka haq. 3 Khoe aih Apraham yòng enh ngèa dèh ka magai ma pi i, rai doe ka ƀài mangai xinoe Hèch rameh: Au kô mangai diac qnoeq, tamoe ùh canau lam oe ataq đeh qne pì, au cali calo đeh pì tech ka au mòeq nòe taneh pì, đòeq au i nòe hu catùh dèh mangai cachìt. 5 Mangai xinoe Hèch tèu bàu: Wì craq! ìh tamàng nhèn: Taqne nhèn kô, ìh qmat kon da bùa kàn; catùh da ìh mangai cachìt nòe leq ma yeo lem dŏng ta nhèn. Nhèn ùh i ka cabô ma adênh cleq dèh ka nòe cađac hanang, đòeq catùh mangai cachìt da ìh. 7 Apraham hi padinh yòng, hacùn cràng enh ngèa wì mangai gùng aih, aih la mangai xinoe da Hèch, 8 Haq anoe rameh: Tàng joq pì lem manoh am catùh mangai cachìt da au, aih pì tamàng au, pì trùh ta Êprôn kon da Xôha, pì anoe ƀiaq ka au. 9 dôq haq aih tech hlài ka au kòp hmo ta Macbêla, oe enh gàu đùng da haq, đòeq hlài ka au troq jaq, dôq taqne pì au i mòeq nòe catùh hanang.

10 Jò aih, Êprôn mangai Hêtit qnang haqngui taqne mangai xinoe da Hèch, tèu Apraham enh ngèa ka mangai xinoe da Hèch aih la ƀài mangai ma khoe trùh ajang gàu plài haq rameh: 11 Ùh đòh! craq da au, ìh tamàng bàu au: Manòeq kô enh ngèa ƀài mangai da au, au dèch ka wì craq taneh đùng aih, rai dèch am hloe kòp hmo oe ta aih; drah catùh da ìh mangai pi i beq. 12 Apraham hacùn cràng hòm enh ngèa wì gùng aih, 13 rai hatèu ka Êprôn qnang yòng enh ngèa ƀài mangai gùng aih ma qnang tamàng, rameh: Tamàng kô, au caqnaih ƀac đùng k, ìh yŏc beq, aih èh au men catùh dèh mangai cachìt. 15 Wì craq tamàng kô: Mòeq haqnech taneh maneh haq aih pôn hrinh siac-lò ƀac, mahaq taqne ba kô ma i ka maneh cleq? Drah catùh da ìh mangai cachìt beq. 16 Apraham broq tiaq bàu Êprôn, enh ngèa mangai Hèch, haq kìq pôn hrinh siac-lò ƀac am ka Êprôn, aih la ƀac wì ta padro qnhòng aih.

17 Qmang aih đùng ruàng da Êprôn ta Macbêla, oe pagat ka Mamrê, aih la đùng ruàng kòp hmo xam ƀài long oe enh dalam, tiaq deh acang dudan đùng ruàng, 18 Enh ngèa mangai xinoe da Hèch ma khoe trùh ajang gàu plài dìq dŏng wiang panhìn am ka Apraham đòeq broq kùng hang. 19 Atìq ka ƀài bìac aih Apraham catùh Sara, mai haq, ta kòp hmo nòe đùng ruàng Macbêla, oe pagat ka Mamrê ta Hêprôn, gùng aih oe raq gùng Cana-an. 20 Đùng ruàng xam kòp hmo dìq i mangai da xinoe Hèch panhìn đòeq ka Apraham broq nòe catùh hanang.