1 Jò aih Apraham khoe craq, hanam khoe bàc; oe ta rìm trong Jêhowa khoe am ka haq xôq ramot. 2 Apraham anoe ka mangai hapŏng ma oe ta hnim haq yeo dùnh dŏng ka wì qnoeq, mangai ma i cwìang wèq kùng hang ta hnim, rameh: Yŏc tì ìh đòeq enh qnhèq ka cataih au. 3 èh au hi thê ìh patô Jêhowa aih la Boc Plình da trŏc xam taneh đòeq hu hapah: Ìh ùh yŏc mòeq ngai kon cadrì leq ta Cana-an aih la nòe au qnang oe hu broq mai ka kon calô au. 4 Mahaq hlài tagùng cla au, taqne oh daq au, ban mòeq ngai mai ka Ysac, kon calô au. 5 Mangai hapŏng aih doe: Broq qmang leq mangai cadrì ma waq tiaq au hlài gùng kô; qmang aih au ep qnung kon calô ìh tiaq au trùh tanòe ìh ma khoe loh enh aih ùh xài? 6 Apraham doe: Rabiaq haq! Apaq qnung kon au hlài ta aih. 7 Jêhowa aih la Boc Plình oe ta plình, aih la Mangai ma khoe qnoh au loh khoe enh hnim baq au xam gùng au, i hapah jò doe ka au: Au am ka xinoe ìh gùng kô! Cla Haq jah thê ƀình plình lam adroe ka ìh, ta aih ìh ban mòeq ngai mai ka kon calô au. 8 Tàng joq mangai cadrì aih ùh waq tiaq ìh, aih èh ìh ùh hlac deh ka bàu au ma khoe thê ìh hapah; mahaq yac ka qmang leq dua apaq ajènh kon au hlài ta aih. 9 Khoe aih mangai hapŏng yŏc tì đòeq enh qnhèq ka cataih Apraham wì craq rađeh rai hapah rađeh broq tiaq bàu haq ma khoe tanap. 10 Khoe aih mangai hapŏng rùp mòeq jàt toq lŏcđa ta calùh da wì craq, wê rìm ƀài dahwèq cla wì craq ma khoe tanap, khoe aih hi yòng hu lam tagùng Mêsôbôtami, trùh ta phôq da Nacô. 11 Haq am lŏcđa oe padài enh gùng ka plài, haten ka adràm diac, jò khoe xèq, trùh jò ƀài kon cadrì loh yŏc diac. 12 Haq waiq khàn: Wôi! Jêhowa Boc Plình da Apraham craq au! hì kô au cali calo ìh am au glàm yiniq au ma qnang chaq, rai am xôq ramot ka Apraham craq au. 13 Hakô au yòng ten ka adràm diac kô, ƀài kon cadrì enh plài loh yinh diac. 14 Mangai adrùh leq au ma doe qmang kô: Oh cachình cabi, am au ôq đeh moeq ralonh diac, yàng haq doe: Ôq beq, khoe èh i au am ka lŏcđa ìh ôq diq” aih raq mangai Ìh ma khoe padon ka Ysac, hapŏng da ìh; rai canòm ajang aih au ma loq Ìh i am xôq ka cra au.

15 Mangai hapŏng capoch nhòq catech bàu, Rêƀêca khoe loh rai xùi deh abôq taplêh. Haq aih kon cadrì da Ƀêtu-ên, Ƀêtu-ên aih kon calô da Minca, mai Nacô oh da Apraham. 16 Mangai kon cadrì aih lem joq qnàng, oe sriu, qnhòq lah i gucalô kùi oe ti haq. Haq loh ta adràm qmùc diac bình ta abôq, khoe aih hi tŏc. 17 Mangai hapŏng drah cadàu tùh ta haq rai doe: Am au ôq đeh moeq ralonh diac ta abôq qmat. 18 Haq tèu: Wì craq ôq beq; khoe aih haq drah qnoh dèh abôq enh plêh hu am haq ôq. 19 jò ôq khoe hêq, mangai cadrì aih doe tam: I au yŏc diac ka ƀài lŏcđa ìh ôq diq, ôq hi mech hi hêq. 20 Haq drah ùc diac ta atong, cadàu loh ta adràm yŏc tam diac ka lŏcđa ôq. 21 Mangai hapŏng oe hatinh hu ngan, đòeq hu loq Jêhowa broq gêh bìac đeh ma lam tacô loq ùh.

22 Jò lŏcđa pi ôq, mangai hapŏng hi yŏc mòeq gwiang trap qne siac lò, 23 rai doe: Oh kon cabô? anoe ka au loq. Oe ta hnim baq oh i ka nòe ka au padài damang loq ùh? 24 Haq padreo bàu: Au kô kon cadrì da Ƀêtu-ên, xau da wa Minca wa Nacô. 25 Èh haq anoe tam: Hnim nhèn i bàc hri xam nhat, èh hadai i nòe ka ìh padài. 26 Mangai hapŏng kùp gàu rai kùh waiq enh ngèa ka Jêhowa, 27 rai doe: Joq khòh manè qnàng Jêhowa, aih la Boc Plình da Apraham craq au! Ìh ùh catech ka tamèt rai jang manoh ka craq au. Jò qnang lam, Jêhowa ajèn qnung au trùh ta hnim oh craq au.

28 Mangai cadrì adrùh aih cadàu hlài, anoe ƀài yiniq kô dèh ka miq xam wì ta hnim cla tàng.

29 Jò aih Ƀêbêca i mòeq ngai daq yiniq haq Laƀan, Laƀan drah cadàu loh ti mangai hapŏng qnang oe ten jang adràm. 30 Bu hnoq gwiang wang xam baiq toq maih ajang kŏng deh oh cadrì, èh hanoh khoe tàng ƀài bìac Rêƀêca anoe hlài: Mangai aih doe qmang kô! haq hi loh ta mangai hapŏng hnoq haq qnang yòng ten ka ƀài lŏcđa haten ka adràm. 31 haq doe: Thia haq! Mangai khoe jah Jêhowa am xôq ramot, gleq ìh majah oe enh gùng? Au khoe palauq ta hnim xam nòe ka ƀaì lŏcđa. 32 Mangai hapŏng hi mùt ta hnim. Laƀan lêh da lŏcđa ca-iàng, èh qnoh xam hri xam nhat am ka lŏcđa; khoe aih yŏc diac hu qnheo jènh mangai hapŏng xam ƀài mangai ma lam ti haq. 33 Khoe aih; Wì enh hnim padon qnoh dahwèq acaq, mahaq mangai hapŏng doe: Ùh, au ùh acaq tàng joq au qnhòq jah anoe yiniq au ma ep anoe. Laƀan doe: Anoe beq!

34 Haq hi doe: Au kô hapŏng da Apraham. 35 Chuaq Jêhowa khoe am xôq ramot ka craq au haraya, loh ka padrang kan. Haq am ka craq au trìu, ƀo, ƀac, wang, hapŏng calô hapŏng cadrì xam ƀài lùa. 36 Sara mai craq au, jò dang craq khoe ha-uang ka craq au mòeq ngai kon calô, craq au khoe đòeq dìq dŏng kùng hang dèh ka kon aih.

37 Craq au i thê au hapah rameh: Oe taqne mangai Cana-an aih la nòe au qnang kô, ìh ùh dùh ban ka kon au mòeq ngai gucadrì leq broq mai, 38 mahaq hlài ta hnim baq au, đòeq hu ban ka haq mòeq toq mai ta aih. 39 Au doe dèh ka craq au au: Qmang leq cadèh, tàng joq mangai cadrì ùh waq hlài ti au. 40 Craq au doe: Chuaq Jêhowa aih la Mangai au ma patìh jah thê ƀình plình tiaq ìh dôq jah, broq gêh yiniq ìh ma lam; èh ìh hi ban ka kon calô au mòeq ngai mai oe taqne ƀài hadròng au, ta hnim baq au.

41 Qmang aih, tàng joq ìh hlài ta hadròng au, wì aih ùh am dèh kon, aih èh ìh ùh hìaq hlac dèh ka bàu hapah. 42 Hì kô jò au lam trùh ajang adràm tau, au i waiq khàn: Waiq Jêhowa Boc Plình da Apraham craq au! tàng joq lem manoh ìh, ìh wiang dôq hì kô au jah broq gêh dèh bìac au ma lam. 43 Kô, au haqngui ten ka adràm kô tàng joq i mangai adrùh yŏc diac èh au doe ka haq “Dôq au ôq đeh mòeq nà diac enh cabi qmat” 44 èh tàng joq haq doe: ôq beq! I au yŏc diac đòeq ƀài lŏcđa ìh ôq diq, dôq ka mangai cadrì aih la mangai mai da kon calô da craq au ìh ma khoe ràih am. 45 Qnhòq dìq cabàu waiq khàn ta manoh, Rêbêca khoe trùh, xam abôq diac ajang plêh haq, loh ta adràm qmùc diac. Au doe ka haq: Am au ôq đeh moeq ralonh diac. 46 Haq drah qnoh deh abôq enh plêh rai doe: Ôq beq, èh i au yŏc diac ka lŏcđa ìh ôq diq. 47 Au hi bòch haq rameh: Oh kon cabô? Haq tèu: Au kô kon da Ƀêtu-ên xau da wa Nacô wa Minca. Au hi asràng wang ajang mùh xam ƀaiq toq maih ajang kŏng haq. 48 Khoe aih au kùn cràng kùh waiq Chuaq Jêhowa. Au manè apôi Jêhowa aih la Boc Plình da Apraham craq au khoe tìc qnung au lam troq trong, hu ràih ka kon calô haq kon cadrì da oh cla craq au

49 Qmang aih manòeq kô, tàng joq pì enh yŏc kan alàng rai dìq manoh ka craq au, aih pì anoe qnoh; tàng ùh hadai anoe ka au loq, đòeq au hu loq đeh kô èh tawìh qnah taleq. 50 Wa Laƀan wa Ƀêtu-ên padreo bàu: Ƀài yiniq aih dìq loh enh Jêhowa, aih nhèn ma oe jah doe haq troq loq ùh. 51 Hameh Rêƀêca qnang qyòng enh ngeà ìh, qnung haq lam beq, đòeq haq jah broq mai kon calô da craq ìh, tiaq qmang ka bàu da Jêhowa khoe thê. 52 Mangai hapŏng da Apraham tàng bàu wa anoe bu hêq, haq hacùn cràng ta haqneq enh ngèa ka Jêhowa 53 haq yŏc ngè anì am ka Rêƀêca, hadai yŏc hang canaq dèch am ka mangai daq xam miq haq. 54 Khoe ka aih mangai hapŏng xam ƀài mangai tiaq haq hanoh haqngui acaq ôq, khoe hi kùi ta aih. Trùh sroq atìq, jò khoe rìu enh kùi, mangai hapŏng doe: Am au hlài dèh ta wì craq. 55 Yàng èh daq haq xam miq haq doe: Dôq mangai adrùh qyoh qmat oe tam ti nhèn toq biaq hòm, qnah ta mòeq jàt hì, khoe aih haq hi lam. 56 Mangai hapŏng tèu: Joq apaq patrò dèh ka au, majah qmang aih Jêhowa khoe pagêh bìac au ma lam kô. Caqnaih au lam, hlài dèh ta wì craq. 57 Wì tèu bàu: Beq bèn creo ka mangai cadrì qyoh aih hu bòch manoh haq qmang leq 58 wì creo ka Rêƀêca rai bòch: Kon enh lam ti haq kô loq ùh? Rêƀêca tèu: Au enh lam. 59 khoe aih wì hi caqnaih Rêƀêca, oh wì haq, xam mangai ma wèq ngan deh haq enh qyoh, hlài ti mangai hapŏng da Apraham hloe xam ƀài mangai ma tiaq haq. 60 Wì waiq xôq ramot ka Rêƀêca rameh:

61 Rêƀêca xam ƀài hapŏng haq hi yòng, tŏc enh crŏng lŏcđa, tiaq mangai hapŏng aih. qmang aih mangai hapŏng qnung Rêƀêca lam.

62 Jò aih Ysac hlài enh diac adràm La chai-roe, majah qmang aih haq oe ta Nêgep 63 trùh xèq haq loh tađùng đòeq hu hèm boq, haq blèch ngan enh hangai hnoq ƀài lŏcđa enh leq trùh. 64 Rêƀêca hadai haqmiang ngan troq hnoq Ysac, drah hadrùc loh enh crŏng lŏcđa rai bòch mangai hapŏng: Mangai ma oe enh ngèa au qnang lam hlài ta đùng tau ìq cabô? Mangai hapŏng doe: Tau raq craq au! Haq drah yŏc bai prình dèh hadrò. 66 Mangai hapŏng taqmon rìm yiniq đeh khoe broq ka Ysac loq. 67 Ysac ajèn Rêƀêca mùt ta traiq da Sara, miq haq, yŏc Rêƀêca broq mai, loq waq deh ka haq. Qmang aih Ysac jah claih kan mangò atìq ka jò miq haq khoe pi i.