1 Apraham yŏc mòeq ngai mai yang yiniq haq Kêtura. 2 Haq aih ha-uang ka Apraham Ximram, Joctan, Mêđan, Mađi-an, Jitbac xam Su-at. 3 Joctan aih baq da Sêƀa xam Đêđan; kon xau da Đêđan aih la nang noe Achurim, nang noe Lêtuchim xam xinoe da Lê-umim. 4 Kon calô da Mađi-an aih la Êpha, Êphe, Hanoc, Aƀiđa, xam Ênđa. Wì aih dìq xinoe da Kêtura.

5 Apraham đòeq dŏng ka Ysac kùng hang rađeh; ƀài kon da cadrì yang haq am ka wì bac jèn; 6 khoe aih, jò oe rìh haq thê wì lam rìh oe ta ƀè mat mahì loh, waq ka hangai ka Ysac kon haq. 7 Apraham rìh jah mòeq hrinh tapèh jàt padam hanam, 8 haq hanam khoe bàc, jah lem bùi dèh ta qnhòng rìh cla, pat hihèm jah ahlài ti kan cadraq cla. 9 Baiq ngai kon calô haq la Ysac xam Ich ma-ên catùh haq ta kòp hmo Macbêla nòe đùng ruàng da Êprôn, kon calô da Sôha, mangai Hêtit, oe pagat ka Mamrê. 10 Aih la đùng ruàng adroe nèh Apraham khoe rot hlài enh xinoe mangai Hèch; nòe aih wì catùh Apraham xam Sara, mai haq.

11 Atìq ka Apraham cachìt, Boc Plình am xôq ramot ka Ysac kon calô haq. Ysac oe haten ka adràm Lachairoe.

12 Kô xinoe Ich ma-ên. Kon calô da Apraham, ha-uang loh enh Aga mangai Êdip, hapŏng da Sara. 13 kô yiniq ƀài kon calô da Ich ma-ên, taqmroq tiaq hì wì haq ma ha-uang: Kon ma ramua da Ich ma-ên aih la Nêbajôt; ma hatìa aih la Kêđa, Atbêtên, Mibôsam, 14 Mitma, Đuma, Masa, 15 Hađa, Thêma, Jêthu, Naphit xam Ketma 16 Aih la ƀài kon calô da Ich ma-ên, èh yiniq da wì haq aih creo tiaq plài xam nòe wì haq broq traiq. Aih la mòeq jàt baiq ngai broq gàu nòe mangai wì haq. 17 Ich ma-ên rìh jah mòeq hrinh piq jàt tapèh hanam, haq pat hihèm cachìt, jah ahlài nòe kan cadraq. 18 Xinoe haq oe enh ngèa ka oh daq cla, patep enh Havila trùh ta Surò, oe pagat ka Êdip trùh hloe ta Asiri.

19 Kô xinoe da Ysac, kon da Apraham. Apraham baq da Ysac 20 Jò Ysac jah pôn jàt hanam, yŏc Rêbêca kon cadrì da Bêtu-ên, oh cadrì da Laƀan, aih dìq mangai Aram, oe gùng Phađan aram 21 Ysac creo dang Chuaq Jêhowa am deh ka mai, majah qmang aih haq xon đeh. Chuaq Jêhowa tamèt ka bàu creo dang aih hi am ka Rêƀêca jah hadràp. 22 Mahaq hadràp kon camia dài aih wa kon troq yôt dabau ta cliac miq, aih haq hi doe: Tàng joq qmang aih, yiniq kô trùh broq cleq? Khoe aih haq lam bòch Chuaq Jêhowa. 23 Chuaq Jêhowa padreo bàu:

24 Trù hì haq ha-uang, hacô baiq toq kon camia loh enh cliac haq. 25 Mangai loh adroe gòh yrùng, xàc xìa qmòe ta chac, lac ka eo xàc; yiniq ka haq la Êsa. 26 khoe aih trùh ka oh haq loh atìq tì haq cadop lùnh jo Êsau; wì hi yiniq ka haq Jacôp. Jò ha-uang wa kon kô aih Ysac khoe jah tadràu jat hanam.

27 Jò wa qyoh yòng kàn, Êsau wìa mangai rabiaq ka axan; mangai pèh rùng taneh diac; da Jacôp aih mangai khun khauq oe toq ta traiq. 28 Ysac loq waq ka Êsau majah qmang aih haq aih mangai enh kaq jam gùng; mahaq Rêbêca xa-och dèh ka Jacôp.

29 Mòeq hì tau, Jacôp qnang awìh cachiq, Êsau hlài enh gùng lep tagah tagôi. 30 haq anoe ka Jacôp: Oh am daq kaq đeh cachiq cleq ma gòh gòh qmat diq, majaq qmang aih daq lep haƀo (Aih ìq wì majah creo ka Êsau la Êđôm) 31 Jacôp tèu: Manòeq kô daq tech ka au cwìang kon calô ramua beq. 32 Êsau doe: Kô, au oe toq ma hu cachìt, cwìang kon calô ramua đòeq ka au hu broq cleq? 33 Jacôp tèu bàu: Daq hapah adroe òeq. Haq hi hapah; qmang aih Êsau tech cwìang kon calô ramua ka Jacôp. 34 Khoe aih Jacôp am ka Êsau acaq ƀênh xam cachiq tòh; acaq ôq hi hêq, haq hi yòng lam. Qmang aih haq jù đac cwìang kon calô ramua.