1 Enh gùng ka kan pangot yàng ma adroe taqnhòng da Apraham, manòeq kô tagùng i tam mòeq yàng hòm. Ysac hi lam trùh ti Abimêlec bùa Philitin, oe ta Gêra. 2 Chuaq Jêhowa loh ti haq rai doe: Apaq loh ta Êdip; thê oe ta gùng au hu padon patô am. 3 Thê oe tagùng kô, i au oe ti ìh rai am xôq ramot ka ìh; majah qmang aih au am ka ìh xam xinoe ìh ƀài gùng kô, èh au hu broq gêh ka bàu au ma khoe hapah ka Apraham, baq ìh. 4 Au jah tam ka xinoe ìh bàc tìah ka halŏng ta trŏc, èh au am ka wì haq ƀài gùng kô; dìq dŏng ka phù cròng ta crŏng taneh canòm ka xinoe ìh đòeq hujah xôq ramot; 5 majah qmang aih Apraham khoe wèq tiaq bàu hnài, bàu thê xam ranenh da au. 6 Qmang aih Ysac hi oe hlài ta Gêra.

7 Jò wì tagùng aih bòch trùh mai haq, haq doe: Aih xài oh cadrì au. Majah qmang aih haq yùq ùh hùa doe: aih mai au. Haq hèm: Taiq Rêbêca wì gùng kô loq jêh đac au. Majah qmang aih Rêbêca lem joq qnàng. 8 Jò Ysac oe ta ai khoe dùnh. I moeq hì tau Abi-mêlec bùa Philitin ngan ti qmŏc hnim, aih hnoq Ysac baxùh dèh ti Rêƀêca, mai haq. 9 Bùa thê creo ka Ysac, haq doe: Haq tau joq mai ìh, gleq ma doe: haq oh ìh?. Ysac padreo bàu: Majah qmang aih au i hèm atùng ta manoh, au kô èh cachìt taiq dèh mai. 10 Abi-mêlec doe: Ìh broq ka nhèn cleq qmang aih? Beq rayeq loq i mangai leq lam kùi ti mai ìh, aih ìq broq ka nhèn pòq yiniq lui. 11 Abi-mêlec thê dìq ka wì gùng aih: Waq toq cabô troq mangai kô qnì troq mai haq qnì, mangai èh ep cachìt.

12 Ysac rai adrech tagùng aih, hanam aih jah loe ka hrinh yàng; majah qmang aih Chuaq Jêhowa khoe am xôq ramo. 13 Haq loh ka padrŏng, hang jah rai èh rai bàc, jaq haq mech loh qmòe ka padrŏng kan. 14 Haq i bàc calùh trìu, calùh ƀo xam ƀài hapŏng bàc raya dài aih mangai Philitin majah loh ka tagrình ta amnoh. 15 Toq leq toq diac adràm, adroe nèh hapŏng da Apraham, baq haq ma khoe chìa, manòeq kô mangai Philitin catùh đac dŏng. 16 Abimêlec doe ka Ysac rameh: Drah loh ma khoe ka nhèn, majah qmang aih ìh khoe padrŏng yeo loe ka nhèn. 17 Qmang aih Ysac cađac gùng kô lam trùh ta tamang Gêra, broq traiq hu oe ta aih,

18 Ysac hi chìa hlài ƀài adràm wì ma chìa qnhòng da Apraham, baq haq, ƀài mangai Philitin ma khoe yŏc taneh catùh đac jò Apraham cachìt, haq yiniq ka ƀài adràm aih tiaq yiniq Apraham ma khoe yiniq. 19 Ƀài hapŏng da Ysac chìa tam adràm neo roc nòe ma haqneq, glàm diac adràm i tamŏc. 20 Mahaq ƀài mangai ban trìu Gêra taqmiaq ka ƀài mangai ban trìu da Ysac, wì doe diac qmat da nhèn, dài aih wì majah creo ka adràm kô la Êsêt. Majah qmang aih ƀài ban trìu tau i taqmiaq ka wì haq. 21 Atìq ka aih ƀài hapŏng aih i chìa tam moeq toq diac jìang, hadai taqmiaq hòm, wì hi yiniq ka diac adràm aih la Sitna 22 Khoe aih, haq cađac jang aih lam chìa ònh adràm ajang qnoeq, adràm kô pi i cabô taqmiaq hòm, dài aih haq hi yiniq ka jang kô la Rêhôƀôt, haq doe: Manòeq kô Chuaq Jêhowa khoe đòeq bèn jah oe nòe anòh anai, kô èh au jah padrŏng tagùng kô.

23 Enh aih Ysac lam ta Bê-esêƀa, 24 Mang aih Chuaq Jêhowa mahnò rađeh ka haq rai doe: Au kô raq Boc Plình da Apraham, baq ìh, apaq yùq, au oe ti ìh, jah am ka ìh xôq ramot rai tam ka xinoe ìh, majah qmang aih Apraham aih hapŏng au. 25 Ysac broq mòeq toq prang tadreo, waiq dang yiniq Chuaq Jêhowa, èh haq broq traiq ta aih. Khoe èh ƀài hapŏng haq chìa mòeq toq diac jìang ta aih. 26 Jò aih bùa Abi-mêlec oe ta Gêra trùh hmàih ka Ysac, i Ahusac, bua haq, xam Phicôn cla craq ƀài cwan lình da haq, lam tiaq. 27 Ysac hi doe: Pì tagit ka au, khoe hnan qnoh đac au loh khoe ka gùng pì, gleq ma oe thia dèh ta au? 28 Wì tèu: Nhèn hnoq joq Chuaq Jêhowa oe ti ìh, dài majah doe ka dabau, waq ka i bàu hapah taqne nhèn xam taqne ìh, đòeq nhèn hu brroq tajao ka ìh. 29 Drah hapah beq! Ìh ùh jò leq broq kan haƀo ka nhèn, qmang ka nhèn khoe ùh broq kan haƀo cleq ka ìh, toq alàng ka ìh rai đòeq ìh loh lam ka catèm. Manòeq kô ìh jah Chuaq Jêhowa am xôq ramot. 30 Ysac don qnoh hiniang ka wì aih, èh wì hanoh acaq pajùm. 31 Trùh sroq atìq, wì haq yòng sroeh, broq ƀàu hapah ti dabau. Khoe aih Ysac đòeq wì haq hlài catèm

32 Hadai hì aih raq bài hapŏng Ysac bahìa ka haq loq diac adràm wì haq ma chìa, wì doe: Nhèn khoe hnoq i diac. 33 Haq hi yiniq ka diac adràm aih la Siƀa. Dài aih trùh manòeq yiniq than phôq aih la Bê-esêba.

34 Jò Êsau jah pôn jàt hanam, yŏc Jiuđic kon cadrì da Bê-eri, mangai Hêtit xam Batmŏc, kon cadrì da Êlôn, hanoh mangai Hêtit. 35 Baiq toq kon mai aih la kan jìq cliac jìq clèm ka Ysac xam Rêƀeca.