1 Jò Ysac khoe craq, mat khoe pùa pi xau hnoq cleq hòm, haq creo ka Êsau, kon calô ramua, haq doe: Kon ôi! Êsau padreo bàu: Kô au kô baq. 2 Haq doe: Ngan kô baq khoe craq! Oe qnì hì leq cachìt; 3 qmang aih manòeq kô baq thê kon yŏc ranac, wê cachùi rang xam panenh, loh tagùng axan ka baq jam rôm, 4 padon qnoh ngè acaq ma jìang tiaq manoh baq ma enh; khoe aih aràng ka baq, dôq baq jah waiq hlài xôq ramot enh baq am ka kon adroe ka baq cachìt. 5 Jò Ysac qnang anoe ka Êsau kon calô haq, aih Rêbêca i tàng. Êsau hi lam tagùng axan jam rôm hu ahlài dèh ka baq.

6 Rêƀêca anoe deh ka Jacôp kon haq rameh: Kô, miq i tàng baq kon doe rai tanap ka Êsau, daq kon: 7 Ahlài jam gùng ka baq, padon ka baq ngè ma jìang kaq; đòeq adroe ka baq cachìt, baq jah waiq xôq ramot am ka kon enh ngèa ka Chuaq Jêhowa. 8 Manòeq kô, kon tamàng rai broq tiaq bàu miq tanap. 9 Drah loh ta cadrong rùp baiq toq bubi lem, èh miq padon qnoh ka baq kon ngè ma jìang ka acaq, tiaq manoh haq ma enh. 10 kon hi aràng ka baq kon acaq đòeq haq hu waiq xôq ramot ka kon adroe ka haq cachìt. 11 Jacôp tèu: Mahaq Êsau daq kon aih mangai i xàc tachac, yàng kon aih ùh i đeh. 12 Qmang leq cadèh tàng joq baq bèq kon? haq ngan kon tìah ka mangai loq qnùt, aih èh kon taqmòq yŏc ka rađeh kan ra-òh hamaiq, pi oe xài xôq ramot taleq. 13 Miq haq doe: Kon calô da miq! Kan ra-òh hamaiq aih đòeq ka miq pòq wê; drah broq tiaq bàu miq, loh rùp baiq toq bubi. 14 Qmang aih Jacôp loh rùp baiq toq bubi aràng deh ka miq broq ngè jìang ka acaq mac ka baq haq ma enh.

15 Khoe aih, Rêƀêca yŏc cwàn eo ma yeo lem dŏng da Êsau, mangai kon ramua, ma khoe đòeq qmòe ta hnim caxùnh am ka Jacôp, kon ùch da haq; 16 èh haq yŏc akia bubi lom ta baiq toq kŏng xam ta ranŏng, majah qmang aih Jacôp ùh i ka xàc. 17 Rêƀêca yŏc ngè jìang xam ƀênh đeh ma khoe broq tah ta tì kon ùch rađeh.

18 Jacôp aràng deh ka baq rai doe: Baq ôi! Ysac tèu: Kô baq kô, kon kô ìq mangai maleq? 19 Jacôp doe: Au kô Êsau kon ramua ìh; au khoe broq tiaq bàu ìh tanap thê; ìh yòng haqngui hu acaq jam kon khoe axan, đòeq ìh hu am ka au xôq ramot ìh. 20 Ysac bòch: Gleq kon axan ma rênh jah?. Haq tèu: Jêhowa Boc Plình ìh palauq am ka au rênh jah. 21 Ysac doe ka Jacôp: Thia ma haten gen kô đòeq baq bèq ngan ajoq Êsau kon baq loq ùh? 22 Jacôp hi lam haten ka Ysac, haq rawò rai doe: Bàu capoch aih da Ysac, yàng baiq toq kŏng aih da Êsau. 23 Haq pi oe canau majah qmang aih baiq toq kŏng hanohh i xàc qmang da Êsau daq haq. Qmang aih Ysac hi caxoeq am xôq ramot ka haq. 24 Haq bòch hòm: Gè kô joq Esau kon au ajoq. Jacôp doe: Joq, kon kô raq 25 Ysac hi doe: Drah padon qnoh ka baq acaq jam kon axan khoe jah, dôq mahua yiang baq jah waiq xôq ramot am ka kon. Jacôp padon qnoh ka haq acaq, hadai aràng alac ka haq ôq.

26 Khoe aih, Ysac baq haq hi doe: Lam ajang kô kon rai hìp baq 27 Jacôp thia haten rai hìp dèh baq. Ysac xua hòe dèh kon, hi waiq xôq ramot am rai doe:

Kô! kan xua thùm kon da au.

Crài cleq ka kan xua thùm đùng ruàng Chuaq Jêhowa ma khoe am xôq ramot.

28 Waiq Boc Plình am ka kon rangom loh enh plình,

xam taneh jìang.

Ùh dìq ùh dài qmau phi xam alac neo.

29 Rìm diac ep patìh ka kon.

Dìq ka mangai ep kùn cràng enh ngèa kon

Jah broq cla craq enh qnhèq ka ƀài oh daq

Ƀài kon calô da miq kon ep kùn cràng enh ngèa kon.

Cabô ra-òh hamaiq ka kon, haq ep pòq hlài kan ra-òh hamaiq

Cabô waiq xôq ramot ka kon, haq aih jah kan xôq ramot.

30 Jò Ysac waiq xôq ramot ka Jacôp bu khoe, èh Jacôp hadai bu loh khoe dèh ka nòe baq, aih Êsau daq haq hadai hi hlài enh axan. 31 Haq hanoh padon ngè acaq jìang qnoh deh ka baq rai doe: Baq ôi yòng haqngui acaq jam kon calô baq khoe axan aih èh mahua yiang ìh jah waiq xôq ramot am ka kon. 32 Ysac baq haq bòch: Kon kô ìq mangai maleq? haq doe: Au kô Êsau, kon calô ramua da ìh. 33 Ysac tadèch qmòe nòeh haq doe: Qmang aih mangai maleq ma khoe axan jam rôm, khoe dèch ka baq? Adroe ka kon hlài baq acaq khoe dìq, khoe waiq xôq ramot am ka haq, aih èh haq jah xôq ramot.

34 Baq haq bu catech ka bàu, aih Êsau hi cachech ra-ua, dêh pi cajaq rai doe deh ka baq: Baq ôi waiq xôq ramot am ka au diq 35 Mahaq Ysac tèu: Oh gè khoe tai cliac trùh blah yŏc xôq ramot da kon. 36 Êsau doe: Ahìaq taiq raq wì majah creo ka haq Jacôp dài haq ma khoe baiq yàng blah yŏc teo oe da au? Haq khoe blah yŏc da au cwìang kon calô ramua yàng manòeq kô haq blah yŏc hloe da au xôq ramot, haq anoe tam: Baq ma pi i xôq ramot leq đòeq waiq am ka au diq qmòh? 37 Ysac doe: Baq khoe dèch haq broq cla craq kon, khoe dôq wì oh daq broq hapŏnng haq; khoe palauq đòeq qmau phi xam ƀài alac neo ka haq. Qmang aih baq oe broq cleq jah ka kon? 38 Êsau doe: Baq! Ìh i toq aih raq kan xôq ramot qmòh? Waiq xôq ramot ka au diq baq! Khoe aih haq hi hmoe. 39 Ysac baq haq tèu:

41 Manoh Êsau loh ka git ka Jacôp taiq baq haq waiq xôq ramot ka Jacôp, haq doe ka rađeh: hì pi i dabaq khoe ten trùh; aih èh au jêh đac Jacôp, oh au 42 Wì yŏc bàu Êsau mangai kon ma kàn, anoe hlài ka Rêƀêca, aih haq hi creo ka Jacôp, kon ùch rađeh rai doe: Kô Êsau daq kon khoe qnac chaq trong hu jêh đac kon đòeq hu patem chau. 43 Qmang aih, manòeq kon tiaq bàu miq, drah yòng, cadàu trùh hnim Laƀan dùch kon, oe ta Charan. 44 èh oe đò ta aih toq biaq, trùh jò kan nòeh da daq kon hi dìq. 45 Jò kan nòeh da daq kon hi dìq, haq hèt ka yiniq kon ma broq ka haq, aih èh miq hi thê kon hlài. Ji laiq miq ma hnhung mòeq yàng baiq toq kon hloe ta mòeq hì?

46 Rêƀêca doe ka Ysac: Au khoe lep, loh ka pi oe enh rìh hòm taiq ƀài kon cadrì xinoe da Hèch. Tàng joq Jacôp yŏc mòeq ngai mai taqne ƀài gucadrì tagùng kô tìah ka ƀài aih, qmang ai au oe rìh broq cleq?