1 Qmang aih Ysac creo ka Jacôp mùt, waiq xôq ramot am khoe aih tanap “Kon apaq yŏc kon cadrì Cana-an, 2 Mahaq, kon hlài tagùng Phađan-Aram, trùh hnim Ƀêtu-ên, boc ngoaiq kon, èh yŏc moèq ngai kon cadrì da Laƀan dùch kon đòeq broq mai. 3 Waiq Boc Plình I cwìang Rìm trong am xôq ramot ka kon, broq ka kon chèch lòe ma bàc đòeq wìa mòeq diac kàn i bàc adrech mangai. 4 Waiq Boc Plình am ka kon xam xinoe da kon xôq ramot lem da Apraham, đòeq gùng kon ma khoe oe jah broq kùng hang da kon, aih la gùng haq ma khoe am ka Apraham! 5 Khoe aih Ysac thê Jacôp lam tagùng Phađan-Aram, trùh hnim Laƀan kon calô Ƀetu-ên, haq aih mangai Aram daq da Rêƀêca; miq wa Jacôp xam Êsau.

6 Êsau hnoq Apraham khoe waiq am xôq ramot ka Jacôp rai thê haq lam tagùng Phađan-Aram đòeq hu yŏc mai; jò qnang waiq am xôq ramot i tanap: apaq yŏc kon cadrì Cana-an broq mai 7 èh hnoq Jacôp khoe iu tiaq bàu wa baq miq lam tagùng Phađan-Aram. 8 Aih haq loq ƀài kon cadrì Cana-an ùh troq ka manoh Ysac baq rađeh; 9 aih haq hi lam hnim Ich ma-ên (enh gùng ka baiq toq mai haq ma khoe i) yŏc tam Mahalac, aih la kon cadrì da Ich ma-ên, xau nuiq da Apraham, oh da Nêbajôt.

10 Jacôp enh Bê-e Sêba hu lam trùh ta Charan, 11 trùh mòeq nòe aih, mat mahì khoe clìh, haq hi kùi. Haq yŏc mòeq toq hmo hu angèn gàu, èh hi kùi ajang aih; 12 haq apô hnoq mòeq toq gòng paqnàng enh taneh gàu trùh ta qmòe ta trŏc, ƀài bình plình da Boc Plình tŏc loh ta gòng aih. 13 Chuaq Jêhowa yòng oe enh gàu gòng doe ka Jacôp “Au raq Jêhowa Boc Plình da Apraham kan cadraq ìh, hadai Boc Plình da Ysac. Au am ka ìh xam xinoe ìh taneh ìh ma qnang kùi kô. 14 Xinoe ìh jah bàc tìah ka blo ta taneh, prai loh trùh ta ƀè mahì tŏc, ƀè mahì clìh, ƀè qma ƀè qngeo, rìm ka xinoe ta crŏng taneh dìq canòm ka ìh xinoe ìh men jah xôq ramot. 15 Hacô au oe ti ìh, ìh lam taleq au tiaq wèq ban ta aih.

16 Jacôp hi rìu, haq doe “Joq qnàng Chuaq Jêhowa qnang oe tacô mahaq au ùh qnì!” 17 Haq loh ka crè rai doe “Kô joq nòe jìang ka ramòt qnàng! Kô joq hnim da Boc Plình, joq qmŏc qmang da plình. 18 Haq rìu sroeh yŏc hmo đeh ma đòeq angèn gàu, paqnàng broq jrang, pùc dàu ta bui jrang aih; 19 èh haq yiniq ka nòe aih la Ƀêtên; jò ma adroe nèh yinq jang ta aih la Luxo. 20 Jacôp waiq rameh “Tàng joq Boc Plình oe ti au, wèq ban jò au lam trong, am ƀênh hu acaq, am eo hu caxùnh. 21 èh tàng joq au jah hlài catèm trùh hnim baq au, aih èh Chuaq Jêhowa broq Boc Plình au. 22 Hmo ma khoe paqnàng broq jrang kô èh jah wìa hnim kùh waiq Boc Plình, èh au hi dèch ka Ìh mòeq phàn mòeq jàt rìm ta kùng hang Ìh ma am ka au.