1 Khoe aih, Jacôp hi lam hòm, èh haq trùh gùng ƀài mangai rìh ƀè mat mahì toc. 2 Haq ngan hnoq mòeq toq diac adràm oe taqne đùng ruàng, ten aih i mòeq calùh trìu qnang kùi padài, majah qmang aih kô raq nòe wì am trìu ôq diac. Hmo ma padit ngah adràm kàn raya. 3 Ƀài calùh trìu tagop dìq ta aih, khoe èh wì hi cadro qnoh hmo enh ngah diac jìang aih, am ƀài calùh trìu ôq diac khoe aih cadro hlài hmo ajang teo dùnh, gùp hlài ngah diac jìang.

4 Jacôp bòch ƀài mangai ban trìu “Wì oh daq! pì oe taleq kô? Wì aih tèu: Nhèn trùh enh Charan. 5 Haq bòch: Pì oh daq aloq ka Laƀan kon calô da Nacô loq ùh? wì doe: nhèn loq. 6 Jacôp bòch tam: Haq aih i tadêh đeh loq ùh? Wì doe: Haq aih xôq tadêh, hatau Rachên kon cadrì haq qnang trùh deh ti ƀài calùh trìu. 7 Jacôp doe: Hacô! trŏc oe sroeh qnhòq xài jò tiaq ahlài ƀài calùh trìu; qmang aih pi daq am ƀài trìu ôq diac beq khoe aih hi caqnaih haq lam acaq hòm. 8 Wì tèu “Nhèn ùh jah broq qmang aih; ep gòm ƀài calùh trìu trùh tagop ma tôm dŏng òeq. jò aih èh men cadro hmo enh ngah diac jìang hu am bài trìu ôq diac.

9 Jò haq oe raq capoch tuàng ti wì a, ih Rachên tiaq ƀài trìu baq haq khoe trùh, majah qmang aih haq aih la mangai ban trìu. 10 Jò bu hnoq Rachên, kon adrùh Laƀan, dùch rađeh, aih haq hi thia ka haten cadro hmo loh khoe ka ngah diac jìang, am ƀài trìu da Laƀan dùch rađeh ôq diac. 11 Khoe aih Jacôp hìp Rachên, èh hi hmoe cadêh; 12 Èh hi doe ka Rachên loq đeh kô kon da Rêƀêca oh daq ka baq haq. Rachên cadàu hlài anoe deh ka baq loq. 13 Bu tàng doe Jacôp kon calô da oh cadrì rađeh, aih Laƀan cadàu loh trùh enh ngèa haq, rai cwat rai hìp, khoe aih akhen mùt dèh tahnim. Jacôp taqmon hlài rìm yiniq ma khoe trùh. 14 Laƀan doe: Mon kô joq mahim jan au. Khoe aih Jacôp oe dèh ti dùch mòeq khê.

15 Khoe aih Laƀan doe “Mon kô aih hadròng da dùch, ma wìa patìh dech ka dùch qmòh? Bac baha toq leq doe ka dùch loq. 16 Jò aih, Laƀan i baiq ngai kon adrùh, mangai ma daq yiniq haq Lê-a, mangai ma oh yiniq haq Rachên. 17 Mat da Lê-a ùh nèn, yàng Rachên aih chac haq hi alàng alaiq, hadrò pàt lem lình. 18 Jacôp xa-och ka Rachên, dài haq majah doe: Taiq Rachên kon ùch ìh, au patìh ka ìh tapèh hanam. 19 Laban tèu: Dùch am haq yŏc mon aih ma hnau đòeq haq yŏc mangai qnoeq; oe tacô ti dùch. 20 Qmang aih taiq Rachên, Jacôp ep patìh tapèh hanam. Mahaq xa-och ka Rachên, haq ngan tapèh hanam budàng baiq piq hì.

21 Atìq ka aih Jacôp doe ka Laƀan: Jò ma pajaq ka au khoe dìq. Aleq manòeq kô dùch jao da au mai beq, au hu thia deh ti haq. 22 Laƀan akhen ka wì plài, padon qnoh yiniang; 23 trùh di xèq, yŏc Lê-a kon cadrì da haq am ka Jacôp, khoe aih Jacôp hi thia ti haq 24 Laƀan thê Xinƀa aih la mangai hapŏng cadrì tiaq patìh ka Lê-a, kon cadrì haq. 25 Trùh sroq atìq, men loq aih la Lê-a, Jacôp doe ka Laƀan: Ìh khoe broq ka au cleq qmang kô? Ma ùh xài taiq Rachên au majah patìh ka hnim ìh qmòh? Gleq ìh majah qnùt au?. 26 “Laƀan doe: Xài noe haq gùng kô, ùh jah am mangai ùch yŏc ŏng adroe, mangai daq atìq. 27 Drah acaq oe ti haq qmat jah mòeq tuàn beq, khoe au hi am hloe mangai ma tau; mahaq mangai ma tau aih mon ep patìh tam ka dùch tapèh hanam hòm. 28 Jacôp broq tiaq bàu aih, acaq oe ti Lê-a jah mòeq tuàn, Laƀan hi am Rachên kon cadrì haq yŏc Jacôp. 29 rai thê Ƀila mangai hapŏng tiaq patìh ka Rachên kon dadeh.

30 Jacôp xan thia deh ti Rachên, ha-och deh ka haq ùh hnau ka Lê-a. Qmang aih, Jacôp patìh tam ka hnim Laban tapèh hanam hòm.

31 Chuaq Jêhowa hnoq Jacôp git đac ka Lê-a, hi am haq jah ha-uang; yàng Rachên aih loh ka xon. 32 Lê-a hadràp, ha-uang mòeq ngai kon calô, yiniq dèh ka kon la Ruƀên, majah qmang aih haq doe “Chuaq Jêhowa khoe hnoq kan xalep au; manòeq kô ŏng hi loq waq deh ka au. 33 Haq hadràp hòm èh ha-uang mòeq ngai kon calô, haq yiniq deh kon la Simê-ôn, haq doe: Chuaq Jêhowa i tàng loq wì git ka au, dài majah am tam ka au mangai kô. 34 Haq hadràp hòm ha-uang tam mòeq toq kon calô, haq doe: yàng kô èh ŏng pi taclah ka au, majaq qmang aih au khoe ha-uang ka haq piq ngai kon calô, aih ìq haq majah yiniq deh ka kon la Lêwi. 35 Haq hadràp hòm, ha-uang mòeq ngai kon calô, haq doe: Yàng kô au manè apôi Chuaq Jêhowa; taiq qmang aih haq majah yiniq dèh ka kon aih la Jiuđa, khoe aih haq pi hadràp hòm.