1 Rachên hnoq đeh ùh ha-uang kon ka Jacôp, hi loh ka tajênh dèh ka daq, haq doe ka Jacôp: Am au kon diq, tàng ùh meh au cachìt. 2 Jacôp loh ka nòeh ka Rachên, haq doe: Au kô ma Boc Plình ma i cwìang ùh am ha-uang qmòh?. 3 Rachên doe: Kô Ƀila, mangai hapŏng da au, kùi ti haq đòeq haq hu ha-uang thai ka au, đòeq canòm ka haq au ma hi hadai jah i kon diq. 4 Qmang aih haq am Ƀila hapŏng haq, đòeq broq mai ŏng haq, Jacôp kùi oe ti haq aih, 5 Ƀila hadràp, ha-uang mòeq ngai kon calô ka Jacôp. 6 Rachên doe: Boc Plình khoe ngan hnoq au kô mangai taq atoq, khoe dì bàu au, dài ma khoe am ka au mòeq ngai kon calô; aih ìq dài haq majah yiniq dèh ka kon aih la Đan. 7 Ƀila hapŏng da Rachên, hadràp hòm, haq ha-uang tam mòeq ngai kon calô ka Jacôp 8 Rachên doe: Au khoe dìq jaq tablêq deh ka daq, au khoe jah blêq, haq yiniq ka kon calô aih la Nepta-li.

9 Jò Lê-a hnoq đeh kô khoe pi ha-uang tam, haq yŏc dèh mòeq ngai hapŏng cadrì yiniq haq Xinƀa am ka Jacôp broq mai. 10 Xinƀa, hapŏng da Lê-a, ha-uang mòeq ngai kon calô ka Jacôp. 11 Lê-a doe: Joq xôq ramot kàn qnàng, haq yiniq ka kon qyoh aih la Gat. 12 Xinƀa, hapŏng da Lê-a, ha-uang tam mòeq ngai kon calô ma atìq hòm ka Jacôp; 13 aih Lê-a doe: Au lem bùi oe i jaq cleq! majah qmang aih ƀài mangai cadrì dìq doe au kô mangai jah xôq ramot; haq yiniq ka kon calô aih la Ase.

14 Wop jò gat qmau mì, Ruƀên loh tađùng ruàngh, noq ƀài plì phong ja, haq ahlài am dèh ka Lê-a, miq haq. Rachên doe ka Lê-a: Daq am au xìn đeh ƀài plì phong ja da kon ìh qmat. 15 Mahaq daq haq doe: Blah yŏc da au ŏng aih ma bìac qyoh, aih gè ma oe enh yŏc plì phong ja da kon au?”. Rachên doe: Òq hêq! ŏng ba qmang kô oe ti daq, đòeq hu halìh plì phong ja da kon ìh. 16 Trùh xèq, Jacôp hlài enh đùng, aih Lê-a thia enh ngèa haq rai doe: Mang kô ìh ep kùi ti au, majah qmang aih au khoe yŏc plì phong ja da kon au hu halìh yŏc ìh; aih ìq mang aih Jacôp kùi ti Lê-a. 17 Boc Plình tamàng bàu Lê-a, haq hi hadràp èh ha-uang ka Jacôp mòeq ngai kon calô yàng padam. 18 Haq doe: Boc Plình khoe baha da au kùng majah qmang aih au khoe am dèh hapŏng cadrì ka ŏng au; aih ìq haq hi yiniq deh ka kon aih la Ysaca. 19 Lê-a hadràp hòm, ha-uang ka Jacôp kon calô ma tadràu 20 Khoe aih Lê-a doe: Boc Plình khoe am ka au hang canaq; yàng kô èh ŏng hi oe ti au, majaq qmang aih au khoe ha-uang ka haq tadràu ngai kon calô. Haq yiniq deh ka kon la Sabulôn. 21 Khoe aih haq ha-uang tam mòeq ngai kon cadrì, yiniq ka haq la Đina.

22 Boc Plình hmàng hlài trùh Rachên, hi tamàng bàu rai broq ka haq ka haq jah ha-uang. 23 Haq hadràp, ha-uang loh kon calô, haq doe: Boc plình khoe qnheo da au kan camaih xep. 24 Haq hi yiniq deh kon aih la Jôsep; rai doe: Broq braiq Boc Plình loq am tam ka au mòeq ngai kon calô hòm.

25 Jò Rachên khoe ha-uang Jôsep aih Jacôp hi doe ka Laƀan: Dùch ìh am au hêq patìh ka ìh, đòeq au jah hlài dèh tagùng; 26 ìh am da au mai xam ƀài kon, au ma khoe jah taiq au patìh ka ìh, đòeq au hu lam; majah qmang aih ìh ji loq au khoe patìh ka ìh qmang leq cadèh. 27 Laƀan tèu: Chop au jah đeh xôq ramot enh ngèa mon, apaq lam oe tacô raq, au hadai loq camòm đeh ka mon dài Chuaq Jêhowa majah khoe am xôq ramot ka au. 28 haq anoe tam: Mon tình deh beq kùng kan dìq toq leq, èh dùch hi padreo 29 Jacôp doe: Ìh loq, au khoe abroq ka ìh qmang leq, oe tì kŏng au ƀài calùh da ìh ma ban tahnim jah qmang leq. 30 Adroe ka au trùh ƀài calùh da ìh joq toq biaq, yàng pang au ma hi trùh, aih haq loh ka bàc oe i jaq cleq. Chuaq Jêhowa khoe am xôq ramot pang hì au cadiang mùt hnim kô; yàng manòeq kô oe qnì jò leq au men jah patìh dèh ka hnim cla?. 31 Laƀan doe: Kô èh dùch am ka mon cleq? Jôsep doe: Ùh i am cleq, tàng hatroq tiaq bàu kô, aih au hi qmi rai ban hòm da ìh ƀài calùh. 32 Hì kô au lam ti rèn ngan ƀài calùh trìu xam ƀài calùh bubi ìh, oe ta calùh trìu xam calùh bubi ìh, waq toq maleq ma i habràu, ma habrŏc, xam ma leq ma gam hakênh, aih èh au hi lah đòeq crài, aih èh broq kùng baha da au. 33 Jò leq ìh loq lam ngan da au kùng baha, aih èh manoh hnhuh jang da au hi jah mahnu qnoh enh ngèa ìh. Ƀè da au waq toq bubi leq ma ùh i ka habràu, habrŏc, bài trìu leq ùh gam hakênh, ƀài aih èh budàng atùng. 34 Laƀan doe: Òq hêq broq qmang ka bàu mon ma doe aih. 35 Wop hì aih raq, Laƀan lah đòeq crài ƀài bubi calô ma bràu, ma brŏc, ƀài bubi kan ma bràu ma brŏc, ma leq ma i brŏc taboc xam ƀài trìu kon ma gam, aràng jao dŏng deh ka ƀài kon calô. 36 Khoe aih đòeq Jacôp oe hangai ka rađeh jah piq hì lam trong; Jacôp ban ƀài calùh da Laƀan ma oe.

37 Khoe aih Jacôp yŏc hamenh long juàng lìuh, long ƀôđao, long batiang rìh, lôq đac caqmoc dôq loh kan taboc enh dalam 38 Haq tah ƀài hamenh ma khoe lôq caqmoc ta atong diac enh ngèa ƀài kon trìu, aih nòe ƀài aih trùh ôq diac; jò thia ôq diac ƀài trìu i kòe dabau. 39 Ƀài kon trìu hnoq hamenh aih jò ta kòe dabau aih èh hi xêh loh kon trìu i hot i bràu xam habrŏc. 40 Jacôp lah đòeq crài ƀài kon trìu aih, đòeq trìu kan ta calùh da Laƀan enh ngèa ka ƀài kon trìu ma hot, ma gam, mahaq calùh da cla haq đòeq dèh crài, ùh đòeq ten ka calùh da Laƀan. 41 Rìm yàng jò ƀài trìu ma bit lem ta kòe dabau, aih èh Jacôp tah ƀài hamenh aih ta atong diac ôq enh qneq ka mat bài trìu, đòeq ƀài aih ngan hnoq hamenh hu ta kòe dabau. 42 Mahaq trùh jò ƀài trìu ma ragìq ragôm, aih haq ùh tah ƀài hamenh long; qmang aih ƀài trìu ragìq aih đòeq ka Laƀan, ƀài trìu ma bit ma tadêh aih jah Jacôp. 43 Aih ìq haq loh ka padrŏng, i bàc ƀài ngè aban, hapŏng cadrì hapŏng calô, lŏcđa xam ƀài lùa.