1 Jacôp hìa tàng ƀài kon Laƀan ta-anoe: Jacôp khoe yŏc dŏng da baq bèn kùng hang, canòm ka kùng hang baq bèn haq men jah kan qmang aih. 2 Jacôp hadai ngan tùng hadrò dèh dùch, canau loq haq aih acaq oe pi tìah ka enh nèh hòm. 3 Chuaq Jêhowa doe ka Jacôp: Drah hlài tagùng kan cadraq ìh beq, nòe hadròng cla ìh, i au wiang ti ìh. 4 Jacôp thê wì lam creo ka Rachên xam Lê-a loh ta đùng aih la nòe haq wèq dèh ƀài ngè haq ma aban, 5 rai doe ka wa: Au hnoq hadrò baq chôp ngan au pi tìah ka enh jò aih nèh hòm, mahaq canòm ka Boc Plình da baq au wiang ti au. 6 Cla chôp hanoh loq au khoe patìh ka baq chôp dìq ka padren, 7 yàng baq da chôp jù halê cađac, mòeq jàt yàng haq tablòq đac da au kùng kan, mahaq Boc Plình ùh lòh haq broq cleq haƀo đac ka au yac ka toq xit hnha. 8 Jò haq ma doe: Ƀài kon trìu ma brŏc đòeq broq kùng baha da au, joq qnàng ƀài kon trìu jò ma xêh dìq loh ka habrŏc. Tàng haq doe: Ƀài kon trìu hot aih đòeq broq kùng baha ka au, joq qnàng ƀài kon trìu jò ma xêh loh dŏng ka hot. 9 Qmang aih Boc Plình khoe rùp ƀài ngè baq chôp ma ban đòeq hu am ka au! 10 Jò ƀài kon trìu qnang ta kòe dabau, au qngŏc ngan, apô hnoq ƀài trìu calô qnang kòe ƀài trìu cadrì dìq i hot, i bràu, i habrŏc 11 Ƀình plình da Boc Plình doe ka au jò apô hnoq: Jacôp! Au tèu: i au kô. 12 Ƀình plình doe: Qngŏc hu ngan beq! dìq dŏng ƀài trìu calô qnang ta kòe ka ƀài trìu cadrì dìq i hot, i bràu, i habrŏc; majah qmang aih au khoe hnoq trong Laƀan rìh acaq ka ìh. 13 Au kô raq Boc Plình da Ƀêtên, aih la nòe ìh ma khoe xùt dàu ka gàu long jrang èh khoe kùh waiq au. Manòeq kô, drah yòng beq, loh khoe ka gùng kô hu hlài tagùng hadròng cla ìh.

14 Rachên xam Lê-a tèu haq rameh: Nhèn ma oe i yac ka kùng hang yac ka toq xit cleq ma hu jah axong tahnim baq qmòh? 15 Majah qmang aih haq khoe tech nhèn ƀac aih haq racaih khoe dìq, aih èh haq ma ùh ngan nhèn tìah ka wì enh gùnng diq qmòh?.

16 Ƀài kùng hang Boc Plình ma khoe blah yŏc enh tì kŏng baq nhèn aih la hang nhèn xam ƀài kon nhèn. Qmang aih, manòeq kô broq tiaq rìm bàu Boc Plình ma khoe thê ìh. 17 Jacôp hi padinh yòng dèch deh mai xam wì kon tŏc crŏng lŏcđa, 18 qnung dŏng dèh ƀài ngè haq ma ban xam ƀài kùng hang, aih la kùng hang haq ma khoe tagop jah tanòe gùng Phađan Aram, đòeq hu hlài ta Ysac baq rađeh, oe ta Cana-an. 19 Jò Laƀan qnang jiang lam got dèh xàc trìu, aih Rachên atùng da baq haq ƀài radua qmù wì ma kùh waiq ta hnim baq haq. 20 Jacôp qnùt Laban, majah qmang aih haq ùh doe đeh enh cadàu mot. 21 Qmang aih haq yòng lam, wê dŏng deh ƀài kùng hang, amot pagat trong diac haq pajang hloe ti wang hlài ta wang Gala-at,

22 Trùh hì piq wì anoe hlài ka Laƀan loq Jacôp khoe cadàu mot. 23 Haq hi qnung deh bài oh daq hnan tiaq Jacôp tapèh hi ka trong, èh tem wì aih ta wang Gala-at. 24 Mahaq jò apô damang, Boc Plình trùh ti Laƀan, mangai Aram rai doe: Yac ka lem qmèq qmang leq, ìh ep wèq rađeh apaq capoch cleq ka Jacôp. 25 Qmang aih, Laƀan tiaq tem Jacôp. Jò aih, qnang broq traiq tawang; Laƀan xam ƀài oh daq haq hanoh broq traiq tawang Gala-at.

26 Laƀan doe ka Jacôp: Mon khoe broq cleq qmang qmat? Mon khoe qnùt dùch rai cadàu qnung ƀài kon cadrì da dùch tìah taiq ka ƀài rùp dìc. 27 Hagleq ma mot maiq qmang qmat, qnùt ùh am dùch loq adroe? Aih ajoq dùch khoe caqnaih lam ka lem bùi, i bàu calêu, bàu broc bàu padau wiang qnung tiaq. 28 Mon khoe ùh rabiaq, ùh đòeq dùch hìp deh ƀài kon calô cadrì. 29 Tì kŏng dùch i cwìang broq haƀo ka mon, mahaq Boc Plình da baq mon khoe doe ka dùch mang ìq rameh: Yac ka lem qmèq qmang leq, ìh ep wèq rađeh apaq capoch cleq ka Jacôp. 30 Manòeq kô, manoh mon toq enh hlài dèh tahnim baq, dài majah khoe loh lam; yàng hagleq mon majah atùng da au ƀài radua qmù?

31 Jacôp tèu: Pàng au yùq dùch hìaq loq rùp hlài dèh wa kon cadrì. 32 Mahaq tàng chaq hnoq ƀài radua qmù da ìh aih ajang cabô, mangai aih èh ep cachìt! Enh ngèa ka ƀài oh daq bèn, ìh ti chèh chaq ƀài dahwèq ajang au beq, yŏc hlài da ìh ngè da ìh. Jò aih Jacôp dua qnhòq hìa loq Rachên khoe atùng yŏc ƀài radua qmù aih.- 33 Qmang aih Laƀan mùt ta traiq Jacôp, traiq Lê-a, traiq baiq ngai hapŏng cadrì, chaq ùh hnoq qmòe cleq. Khoe aih loh enh traiq Lê-a, haq mùt ta traiq da Rachên. 34 Jò aih Rachên yŏc radua qmù cadŏc enh qneq ka ca-ìang lŏcđa, khoe aih cla haq haqngui enh qnhèq. Laƀan chèh ngan jàp ta traiq mahaq chaq ùh hnoq ƀài radua qmù aih. 35 Rachên doe: Baq! tachac kon i bìac da gucadrì, dài ma ùh jah yòng hu đìh ìh, wì craq apaq nòeh dèh ka kon. Haq ti chaq mahaq ùh hnoq ƀài qmù radua taleq.

36 Jacôp plôh nòeh talech ka Laƀan rameh “Cabô khoe taqmòq tuiq ka au cleq, au i yiniq lui cleq, dùch ma ha-ùi qnat tiaq qmang qmat. 37 Ìh khoe cheh chaq dìq ta ƀài dahwèq au, i chaq hnoq cleq da hnim ìh loq ùh? Qnoh ƀài ngè aih loh enh ngèa oh daq au xam oh daq ìh đòeq wì haq hujah hadrah taqne ba. 38 Hatau! khoe baiq jàt hanam acaq oe tahnim ìh, trìu ìh bubi ìh ma lah ralech, èh au hadai qnhòq lah acaq dech da ìh trìu calô ta calùh da ìh, 39 Ùh lah ahlài ka ìh mòeq toq maleq ngè gùng ma hit jam haq, tàng loq i cla au kô qnoh hlài ka ìh caxènh aih. Dùch bòch hloe xam ƀài kon maleq wì ma atùng dahì xam atùng damang. 40 Dahì au chìuq tôq hiang, damang chìuq tanget, kùi ùh lah jah hliac. 41 Qmang aih baiq jàt hanam au oe tahim ìh; mòeq jàt pôn hanam au wiang patìh, đòeq hujah baiq toq kon cadrì da ìh, xam tadràu hanam đòeq hujah ƀài calùh trìu da ìh, aih dua ìh khoe mòeq jàt yàng tablòq kùng kan da au. 42 Tàng joq Boc Plình da baq au, Boc Plình da Apraham, aih la Mangai Ysac ma yùq crè, ùh oe ti au, manòeq kô canau ìh khoe hnan đac au loh tì dech. Boc Plình khoe ngan hnoq kan xalep au xam bìac baiq toq tì kŏng au khoe broq, dài aih mang ìq haq majah khoe hadrah taq atoq.

43 Laƀan tèu Jacôp rameh “Ƀài gucadrì kô aih kon dùch; wì qyoh kô hanoh wì qyoh da dùch; ƀài calùh aban kô hadai calùh da dùch, xam ƀài cleq mon hnoq aih dìq da dùch; hì kô dùch oe jah broq cleq dèh ka ƀài kon cadrì ka ƀài xau dùch qmat? 44 Qmang aih trùh acô beq! Đòeq ba tajao ka dabau, đòeq hu hadai wiang panhìn ka dùch xam ka mon.

45 Jacôp yŏc mòeq toq hmo dèch paqnàng broq jrang; 46 rai doe dèh ka ƀài oh daq: Lam hacom toch hmo. Wì hi tigop hmo, raxon đòeq mòeq haqngùc, khoe èh haqngui enh qnhèq ka aih hu acaq. 47 Laƀan yiniq ka haqngùc hmo aih la: Yêga saha đuta; yàng da Jacôp haq creo la Galet. 48 Laƀan doe: Haqngùc hmo kô hì kô panhìn ka taqne ba. Dài aih wì majah creo la Galet. 49 Tàng ùh meh wì creo la Mitba, majah qmang aih Laƀan i doe “Jò ba talah ka dabau, Waiq dang Jêhowa wèq ban dùch xam mon. 50 Tàng joq mon baxa da dùch ƀài kon cadrì, tàng joq loq yŏc tam mai qnoeq, aih èh khòh wèq rađeh ja cajoq! Ùh xài kon mangai mangaiq ma hadrah, mahaq hmàng qmang kô Boc Plình mangai ma ngan hnoq taqne ba. 51 Laƀan doe tam ka Jacôp: Hacô haqngùc hmo kô, long jrang dùch khoe paqnàng taqne dùch xam mon, 52 Haqngùc hmo xam long jrang kô panhìn dùch ùh lam xot ka ajang kô đòeq hu trùh ta mon, èh mon hadai ùh lam xot khoe ka hmo kô hu lam ta dùch, jò i manoh enh tahaƀo ka dabau. 53 Waiq Boc Plình da Apraham, Boc Plình da Nacô, Boc Plình da baq ƀài aih tah hadrah ka ba! Jacôp patô Mangai da Ysac baq rađeh ma yùq crè. 54 Khoe ka aih, haq dèch mòeq ramènh tawang, rai akhen deh ka oh daq acaq. Hi khoe ka acaq ôq, mang aih wì haq kùi tawang.

55 Laƀan cadrat sroeh, hìp deh ƀài kon cadrì xam ƀài xau, rai waiq am xôq ramot, khoe hi wìh hlài deh tahnim.