1 Jacôp lam deh trong, i ƀình plình da Boc Plình glàm haq. 2 Jò Jacôp hnoq wì aih, haq doe: Kô raq traiq da Boc Plình! Aih ìq haq majah yiniq ka jang aih la Mahana-im.

3 Jacôp thê mangai lam adroe hu glàm Êsau daq rađeh, qnang oe ta Si-êro, nòe aih la taneh da Êđôm; 4 Pì anoe ka Êsau, craq au qmang kô: Jacôp mangai hapŏng ìh, i doe qmang kô: Au khoe oe tahnim Laƀan trùh hì kô; 5 Au i bàc ƀo, lùa, trìu, hapŏng calô, hapŏng cadrì, manòeq kô au thê wì kô trùh dèh ta wì craq, đòeq au hujah canòm đeh kan tamèt enh ngèa craq au.

6 Wì aih hlài anoe ka Jacôp: Nhèn khoe trùh ta Êsau daq ìh, manòeq kô haq qnang lam tacô glàm ìh, i pôn hrinh ngai tiaq haq. 7 Jacôp crè rai mangò pi cajaq, haq lah deh ƀài mangai ma tiaq haq xam ƀài trìu ƀo lŏcđa loh baiq calùh, rai doe: 8 Tàng joq Êsau loq trùh canàt jêh mòeq ta baiq calùh kô, aih èh calùh matau jah claih. 9 Khoe aih Jacôp waiq khàn: Waiq Boc Plình da Apraham kan cadraq au! Boc plình da Ysac baq au, aih la Jêhowa! Ìh i thê au drah hlài dèh gùng, nòe hadròng au, aih èh ìh au am ka au xôq ramot. 10 Au ùh tajì ka ƀài kan alàng xam kan ùh tablòq manoh cliac ìh ma khoe patô am ka hapŏng ìh; majah qmang aih adroe ka au pùh pagat cròng diac Jôđan, au i dèh mòeq toq long dùi raq, yàng hì kô au khoe i baiq traiq lình kô. 11 Au waiq Boc Plình dŏng au claih ka tì kŏng Êsau, daq au, majah qmang aih au yùq haq loq trùh jêh hloe xam miq xam kon. 12 Mahaq ìh khoe doe: Joq qnàng Au broq ka ìh jah tàu tìa, rai broq ka xinoe ìh jah bàc tìah ka braih diac raxìqa, ih èh wì pi qnì broq qmang leq hu rèn, majah qmang aih haq bàc hrìn.

13 Haq kùi ta aih mang aih, yŏc ƀài dahwèq ma i dèh ta tì kŏng đòeq broq mòeq ramènh hu dèch am ka Êsau, daq rađeh, 14 aih la baiq hrinh bubi cadrì xam baiq jàt bubi calô; baiq hrinh toq trìu kan xam baiq jàt trìu calô 15 piq jàt lŏcđa cadrì i kon qnang ùq, pôn jàt toq ƀo cadrì xam mòeq jàt toq ƀo calô, baiq jàt toq lùa cadrì xam mòeq jàt toq lùa kon. 16 Khoe aih, haq am tang calùh deh ka tang ngai hapŏng rai tanap: Pì lam adroe ka au rai qnung ƀài calùh kô adreo ka calùh tau. 17 Haq tanap ka mangai ma qnung calùh adroe rameh: Jò Êsau, daq au hnoq, haq bòch ìh: Ìh oe ti cabô, lam taleq kô, ƀài calùh ma lam adroe ka ìh qmat da cabô? 18 aih doe rameh: Da Jacôp, mangai hapŏng wì craq, kô ramènh dèch ka Êsau, craq au; hacô cla haq qnang tiaq atìq ka nhèn, 19 Jacôp hanoh tanap qmang aih ka mangai ma tiaq calùh ma baiq, mangai ma piq, xam dìq dŏng ka ƀài mangai tiaq ƀài calùh aih, èh haq doe: Jò glàm Êsau, pì hmàng baì ƀàu aih. 20 rai doe tam qmang kô: Jacôp hapŏng wì craq qnang tiaq atìq ka nhèn. Majah qmang aih cla haq hèm: Au aràng ƀài ramènh kô adroe dèch ka Êsau dôq haq rangep ka nòehòeq, atìq aih jò au glàm haq broq braiq haq loq lem manoh đìh au qmòh. 21 Qmang aih, ƀài ramènh kô lam adroe cla haq, mang aih haq kùi deh ta traiq.

22 Mang aih, Jacôp cadrat enh kùi, qnung dèh wa mai, baiq ngai hapŏng xam mòeq jàt mòeq toq kon cwa thòng diac Jaboc, 23 Haq qnung wì pùh tŏc pah tau ka thòng diac aih, xam dìq dŏng ƀài kùng hang cla haq.

24 Qmang aih! Cla Jacôp oe dèh mòeq ngai, aih i mòeq ngai tabàt ka haq trùh badrèh qngah. 25 Jò mangai aih hnoq đeh pi blêq, hi tùc jang caxènh cabŏng Jacôp, caxènh cabŏng hi tabloch jò qnang tabàt. 26 Mangai aih doe: Trŏc khoe badrèh qngah; hêq, caqnaih au lam. Mahaq Jacôp tèu: Au ùh caqnaih ìh lam taleq, tàng joq ìh ùh am ka au xôq ramot. 27 Mangai aih bòch: Yiniq ìh aih cleq?. Padreo bàu: Yiniq au Jacôp. 28 Mangai aih doe: Yiniq ìh pi oe xài Jacôp hòm, mahaq yiniq ìh la Isorali, majah qmang aih ìh i tabàt ka Boc Plình xam kon mangai; ìh dìq jah blêq. 29 Jacôp doe: Anoe ka au loq đeh ka yiniq ìh diq. Mangai aih tèu: Hagleq ìh majah bòch da au yiniq?. Khoe èh mangai aih waiq am xôq ramot ka Jacôp ta aih. 30 Jacôp yiniq ka ajang aih la Phêni-ên, majah qmang aih haq doe: Au khoe hnoq Boc Plình tangèa hadrò ka au, èh mahuaq yiang au khoe jah dèch. 31 Jò cwa ta Phêni-ên hnoq mahì khoe tŏc, haq lam loh ka ngwen jo. 32 Taiq aih, trùh ta manòeq mangai Isorali ùh kaq hngwen poeh qnah ta caxènh cabŏng; majah qmang aih mangai aih i tùc caxènh cabŏng Jacôp, ten ajang hngwen poeh.