1 Jacôp qngŏc ngan hnoq, hatau! Êsau qnung pôn hrinh ngai lam trùh. Haq hi lah dèh ƀài kon ka Lê-a, Rachên, xam ƀaiq ngai hapŏng. 2 taqmroq ƀaiq ngai hapŏng xam ƀài kon wì haq oe adroe; khoe aih trùh Lê-a xam kon da haq; Rachên xam Jôsep oe atìq lùch. 3 Cla haq aih lam adroe dŏng ka wì rai lam rai bla op rađeh ta taneh tapèh yàng trùh hloe jò khoe ten deh ta daq.

4 Mahaq Êsau cadàu tùh enh ngèa haq, yŏc tì cwat ranŏng rai hìp, khoe aih dìq ƀaiq wa oh daq hmoe. 5 Khoe aih, Êsau qngŏc ngan hnoq ƀài mangai cadrì xam kon qyoh, haq bòch:

Ƀài mangai ma lam ti oh meh cabô?. Jacôp padreo bàu: Qmat xài ƀài kon Boc Plình khoe am ka hapŏng daq. 6 Ƀaiq ngai hapŏng xam kon da wa trùh haten ka haq bla op rađeh. 7 Lê-a xam kon da haq hadai trùh ten ka haq, bla op rađeh ta haqneq; khoe aih trùh Rachên xam Jôsep trùh haten bla op đeh taqneq. 8 Êsau bòch: Ƀài ƀình daq ma khoe hnoq wì lam adroe tau oh đòeq hu broq cleq?. Tèu bàu: aih đòeq chaq canòm đeh manoh craq au 9 Êsau doe: Yôi oh! Daq khoe jah tàu, hêq yŏc hlài beq ngè cleq da oh. 10 Jacôp doe: ùh đòh, tàng joq oh jah đeh kan tamèt enh daq, aih dì yŏc ƀài ramènh broq loh enh tì kŏng oh beq; majah qmang aih oh khoe jah hnoq đeh hadrò daq aih crài cleq jah hnoq hadrò Boc Plình, èh daq khoe lem manoh đìh oh. 11 Oh cali calo daq, dì yŏc ramènh oh dèch ka daq beq, majah qmang aih Boc Plình khoe am ka oh ùh thìuq qmòe kan tabàih cleq, oh i tôm taih dŏng. Haq cali calo hrìn Êsau loh ka pi jah hangah, hi ep yŏc.

12 Êsau doe: Hêq bèn lam! daq lam adroe. 13 Jacôp padreo bàu: Wì craq loq! ƀài wì qyoh qmat ùh nèn raya, èh oh kô ep ngan ƀài trìu ƀài ƀo ma qnang ta-ùq kon; tàng panan lam waq ka rênh ta mòeq hì raq, aih ahìaq dìq ka calùh ep cachìt dŏng. 14 Wì craq lam adroe ka hapŏng ìh, au lam đeh da adia tiaq tang cadiang da ƀài trìu ƀo xam wì qyoh, trùh jò trùh tahim wì craq ta Si-êro. 15 Êsau doe: Qmang aih, daq đòeq ka oh baiq piq ngai tiaq daq, Jacôp doe: Gleq ma ep qmang aih, waq toq oh kô jah đeh kan tamèt enh daq, aih khoe lap. 16 Ta hì aih raq, Êsau ƀoe deh trong hlài ta Si-êro. 17 Jacôp trùh ta Sucôt, ta aih haq broq ka dađeh mòeq toq hnim xam toq leq toq traiq ka ƀài ngè haq ma aban, aih ìq wì majah creo ka jang kô la Sucôt. 18 Jacôp oe tagùng Phađan aram trùh than phôq Sichem, taneh aih xô xech da gùng Cana-an, jah catèm. Haq broq traiq enh ngèa ka than phôq, 19 haq rot haqnech taneh nòe haq qnang broq traiq aih, dìq mòeq hrinh capiac bac, haq rot hlài enh kon da Hêmô, baq da Sichem. 20 Ta aih haq broq moèq toq prang kùh waiq, haq yiniq ka nòeq aih la Ênên-ôhê Isorali