1 Đina, kon adrùh da Lê-a, ma khoe ha-uang ka Jacôp, lam hmàih ka ƀài mangai adrùh gùng aih. 2 Sichem aih kon calô da Hêmô, mangai Hêwit, kon ƀùa gùng aih, hnoq haq, aih hi blah rùp yŏc, kùi ti haq broq kan camaih ka haq. 3 Mahua haq ùh talah ka Đina, kon cadrì da Jacôp, ha-och bêh kon cadrì aih, yŏc bàu rangot capoch ka Đina. 4 Sichem doe deh ka Hêmô baq rađeh, rameh: Dôq kon cadrì kô broq mai au. 5 Jacôp hìa doe mangai aih khoe broq qmèq ka Đina, kon rađeh, mahaq ƀài kon calô haq qnang oe tagùng xam ƀài ngè wì haq ma aban, dài haq majah hatinh gòm wì kon hlài.

6 Jò aih Hêmô baq da Sichem trùh ta Jacôp đòeq hu capoch tuàng ti haq. 7 Wì kon da Jacôp hlài enh gùng, hìa tàng qmang aih chìc chìc plôh nòeh, ka trong camaih Sichem khoe broq ka Isorali, kùi ti kon adrùh da Jacôp, aih la trong ùh khòh broq qmòe blinh. 8 Hêmô doe: Mahua yiang Sichem kon calô au, khoe hatop ti kon adrùh ìh; joq au cali calo ka ìh am kon adrùh aih broq ai haq. 9 Beq! Bèn taproe ti dabau; am kon cadrì pì ka nhèn èh yŏc kon cadrì da nhèn ka kon calô pì. 10 Pì oe tacô raq; gùng kô khoe palauq đòeq ka pì, oe tacô, padro atech hu broq acaq ta aih.

11 Sichem anoe ka baq xam wì daq da mangai cadrì rameh: Dôq au jah đeh kan tamèt enh ngèa pì, waq toq pì bòch cleq au clìh ka aih 12 Dèch maneh kon mai ma haqnhèq haq xam hang ma kàn, au clìh tìah ka bàu pì ma bòch; mahaq am haq aih broq mai au 13 Ƀài kon calô da Jacôp tèu bàu wa Sichem wa Hêmô, baq haq aih, wì capoch rawìt ka wa, majahq qmang aih Sichem khoe broq kan xep ka Đina, oh wì haq. 14 Wì aih doe: Đòeq oh nhèn broq mai mangai ùh waq broq ramènh kat akia aih la trong nhèn ùh khìn broq, majah qmang aih, aih raq kan camaih xep ka nhèn. 15 Nhèn dì yŏc bàu pì, aih èh jò leq pì jah tìah ka nhèn diq, aih la jò leq rìm ngai gucalô pì chìuq broq ramènh kat akia tìah ka nhèn; 16 aih èh nhèn hi am deh kon cadrì broq mai pì, èh yŏc kon cadrì pì broq mai nhèn; khoe aih bèn hi jah rìh ti dabau, èh hi wìa mòeq xinoe ti pì. 17 Tàng joq pì ùh waq tiaq bàu, aih èh nhèn rùp hlài dèh kon cadrì đòeq hu lam rìh taqnoeq”.

18 Toq aih bàu wì capoch lem ka manoh cliac Hêmô xam Sichem, kon calô haq. 19 Mangai radam aih, ùh lòm patrò ka broq tiaq trong ƀài aih khoe hatình, majah qmang aih kon cadrì da Jacôp joq lem hrìn ka manoh haq.

20 Qmang aih, Hêmô xam Sichem, kon calô haq, lam trùh dèh ajang qmang than phôq, doe ka wì ta aih 21 “Ƀài wì aih rìh acaq hatroq ti bèn; qmang aih am wì haq oe tacô hu padro atech. Ngan kô, gùng kô anòh anai ka wì haq oe; kô èh bèn hi yŏc kon cadrì wì haq broq mai, èh wì haq hadai yŏc kon cadrì bèn broq mai. 22 Mahaq wì haq chìuq oe ti bèn hu wìa mòeq xinoe, waq toq jò leq mangai kon calô bèn waq broq ramènh kat akia qmang ka ƀài mangai calô da wì. 23 qmang aih èh, ma ùh xài dìq dŏng ngè wì haq ma aban, ƀài kùng hang xam dìq ka calùh da wì haq aih èh ma ùh xài jah dŏng bèn qmòh? Hêq bèn broq tiaq wì haq trong aih beq, đòeq wì haq oe pajùm ti bèn.

24 Rìm ngai loh ajang qmang than phôq dìq broq tiaq bàu wa Hêmô wa Sichem, kon calô haq, èh dìq dŏng mangai calô loh nòe qmang than phôq dìq broq ramènh kat akia.

25 Piq hì atìq, jò rìm ngai oe raq jìq hrìn, aih baiq ngai kon calô da Jacôp aih la Simê-ôn xam Lêwi, daq da Đina, wê mòeq ngai mòeq pla chang khat, ngan jò ùh cabô hèm trùh, wa glàm mùt ta than phôq, jêh đac dŏng mangai gucalô. 26 Wa haq yŏc chang khat jêh đac hloe wa Hêmô wa Sichem, kon calô da haq aih, qnoh Đina loh enh gùng ka hnim Sichem, èh hi lam. 27 Pàng wì khoe broq amùa ka yiniq oh wa haq, dài ƀài kon da Jacôp majah clàm ta ƀài hanang rai blah yŏc ta than phôq. 28 Rùp ƀài calùh trìu, ƀo, lùa, xam ƀài dahwèq ta aih xam dahwèq tagùng. 29 Blah yŏc dŏng kùng hang, ƀài kon qyoh xam ƀài mangai cadrì xam hloe rìm yiniq cleq hnim.

30 Jacôp doe ka wa Simê-ôn wa Lêwi: Chôp broq ka au loh ka rawè, broq ka wì gùng kô aih xam mangai Cana-an xam mangai Phêrêsit, mahau git ka au. Bèn kô toq biaq ngai đeh raq, tàng joq wì haq dahùp ti dabau jêh au, aih èh au xam dìq ka hnim au loh ka lùng pac.

31 Wa aih doe “Nhèn manaq hnoq wì broq ka oh nhèn tìah ka đì qmoh?”.