1 Boc Plình doe ka Jacôp: Drah yòng beq! tŏc ta Ƀêtên hu oe, rai broq mòeq toq prang kùh waiq ka Boc Plình, aih la Mangai khoe mahnu rađeh ka ìh jò ìh ma cadàu amot ka Êsau, daq ìh. 2 Jacôp hi doe deh ka mai xam ƀài mangai ma tiaq rađeh rameh: Drah doeh dŏng ƀài qmù dua kan kiac da mangai diac wì loh ma khoe taqne pì, broq ka rađeh jah hruah rai atùa eo yôh beq. 3 Khoe aih trùh tacô, bèn hu lam tŏc ta Ƀêtên, ta aih èh au jah broq mòeq toq prang ka Boc Plình, aih la Mangai khoe tèu bàu ka au jò yat, khoe wiang ka au jò lam trong. 4 Wì hi am ka Jacôp ƀài dua qmù kan kiac diac wì rađeh ma wê, xam ƀài rawiang hatai ajang don, Jacôp catùh ƀài yiniq aih ajang xem long rayai, ten ka Sichem. 5 Khoe aih, wì hi loh lam, Boc Plình caqnìh kan ramòt ka ƀài gùng dudan aih, aih ìq wì haq majah ùh hùa qnat tiaq ƀài kon da Jacôp.

6 Jacôp xam ƀài mangai tiaq haq trùh ta Luxo (aih raq Bêtên) oe ta taneh Cana-an. 7 Haq broq ta aih mòeq toq prang kùh waiq, haq yiniq deh ka jang aih la Ênƀêtên, majah qmang aih, aih raq nòe Boc Plình khoe loh glàm jò haq ma cadàu mot dèh ka daq.

8 Jò aih Đêbôra, ƀamùq da Rêbêca cachìt, jah catùh axèm long rayai enh gùng ka Ƀêtên; aih ìq wì majah creo ka long aih la Along ƀacut.

9 Jò trùh enh gùng Phađan aram, Boc Plình loh glàm Jacôp hòm rai am xôq ramot ka haq, 10 rai doe: Yiniq ìh Jacôp, atìq kô èh pi creo Jacôp hòm, mahaq creo ònh la Isorali. Khoe aih Boc Plình yiniq ka haq la Isorali. 11 Boc Plình doe hòm: Au kô raq Boc Plình Haqnhèq Dìq Jaq, ìh ha-uang ma bàc rai chèch lòe tam; mòeq diac trùh rìm diac dìq loh enh ìh, ƀài bùa hanoh dìq loh enh ìh. 12 Gùng au ma khoe am ka Apraham, ka Ysac aih èh au hadai am ka ìh xam xinoe ìh.

13 Boc Plình hi tŏc khoe ka nòe haq ma khoe anoe ka Jacôp. 14 Haq dèch paqnàng mòeq toq jrang hmo ajang nòe Boc Plình khoe doe ka rađeh, pùc ramènh diac lŏc rai srùh dàu ta aih. 15 Khoe ka aih, Jacôp yiniq ka nòe Boc Plình khoe anoe ka rađeh la Ƀêtên.

16 Lam enh Ƀêtên, wì oe toq biaq ka trong hi trùh ta Êpho-rat, aih Rachên hi jìq ha-uang, yàng kô xa joq qnàng. 17 Jò xa ka ha-uang, ƀamùq doe: Apaq yùq cleq, majah qmang aih oe i mòeq toq kon calô hòm. 18 Jò Rachên toq dang da hadrùh, majah qmang aih haq dang hiwa, dài wì majah yiniq ka kon aih la Ƀênôni, yàng da baq haq yiniq deh kon la Bênjamin. 19 Qmang aih, Rachên cachìt, jah catùh roc trong hlài ta Êphorat, aih la Bêtlêhem, 20 Enh qnhèq ka ralùng aih Jacôp dèch paqnàng mòeq toq long jrang; trùh hì kô jrang aih broq teo hadro ka ralùng da Rachên.

21 Isorali lam hòm rai broq traiq enh tau ka Mitđan-êđe. 22 Jò Isorali rìh ta kô, aih Ruƀên thia kùi ti Ƀila mai yang baq haq; Israli hìa loq bìac aih.

23 Jacôp jah mòeq jàt baiq toq kon.

Kon da Lê-a, aih la Ruƀên, kon ramua da Jacôp; tìa aih la Simê-ôn, Lêwi, Juđa Ysaca, Saƀulôn

24 Kon da Rachên aih la Jôsep, Ƀênjamin. 25 Kon da Ƀila, hapŏng cadrì da Rachên aih la Đan xam Neptali; 26 Kon da Xinƀa hapŏng cadrì da Lê-a, aih la Gat xam Ase. Aih ƀài kon calô da Jacôp ma khoe jah ha-uang ka haq ta Phađan-Aram.

27 Jacôp hlài hnim Ysac baq haq oe ta Mamrê, haten ka Kiri-at Araba, aih la Hêprôn, nòe Apraham, Ysac khoe oe.

28 Ysac halình jah mòeq hrinh rahem jàt hanam. 29 Khoe aih haq hi hèm dèh hòe ma pulùch èh hi cachìt, jah hlài ti wì kan cadraq. Êsau xam Jacôp, baiq ngai kon calô haq, catùh dèh baq.