12
ZABULI YA 12
(Zabuli ya Daudi. Kwa kilanja, yatumie nyuzi za bango na modeli wa Sheminiti.)
1 Tukombole gweye Mndewa Imulungu,
kwavija iwanhu wa Imulungu opotela,
kwavija iwanhu otamanilwa wasegela hagati ha iwanhu.
2 Kila munhu komvizila miyage,
olonga kwa ulonzi wa kutewenza,
na mizoyo ya utapitapi.
3 Gweye Mndewa Imulungu,
uikanhe imilomo ilonga ulonzi wa kutewenza,
na imilimi ilonga mbuli za kuitapa,
4 iwanhu wose olonga, “Kwa milimi yetu tohuma,
milomo tunayo, nani yodaha kututawala?”
5 Lakini Mndewa Imulungu kolonga,
“Kwavija iwanhu wakiwa odununzwa,
ngaengae olila kwa usungu,
sambi nokwiza nowakaliza kamba viwobeta.”
6 Mbuli ya Mndewa Imulungu ing'ala,
ing'ala kamba shaba isunhigwe mna ditanuli,
ona kamba shaba isunhigwe miyanza saba.
7 Gweye Mndewa Imulungu, utukalize,
utukalize siku zose na iwanhu wa ulelo uno wihile.
8 Iwanhu wehile ozunguluka kila hanhu,
gehile gotogoligwa hagati ha iwanhu.