១០៦
ព្រះមានព្រះហឫទ័យស្មោះស្ម័គ្រជានិច្ច
១ ចូរសរសើរដល់ព្រះយេហូវ៉ា
ឱសូមអរព្រះគុណដល់ព្រះយេហូវ៉ា
ដ្បិតទ្រង់ល្អ សេចក្តីសប្បុរសនៃទ្រង់ស្ថិតស្ថេរនៅជានិច្ច
២ តើមានអ្នកណាអាចនឹងពណ៌នាពីការខ្លាំងពូកែរបស់
ព្រះយេហូវ៉ា
ឬសំដែងពីសេចក្តីសរសើររបស់ទ្រង់ទាំងអស់បាន
៣ មានពរហើយ អស់អ្នកដែលរក្សាសេចក្តីយុត្តិធម៌
ហើយអ្នកដែលប្រព្រឹត្តតាមសេចក្តីសុចរិត
គ្រប់ពេលគ្រប់វេលា
៤ ឱព្រះយេហូវ៉ាអើយ សូមទ្រង់នឹកចាំនឹងប្រោសទូលបង្គំ
ដោយសេចក្តីសប្បុរស ដែលទ្រង់ផ្តល់ដល់រាស្ត្រទ្រង់
ឱសូមប្រោសទូលបង្គំ ដោយសេចក្តីសង្រ្គោះនៃទ្រង់ផង
៥ ដើម្បីឲ្យទូលបង្គំបានឃើញសេចក្តីចំរើន
នៃពួករើសតាំងរបស់ទ្រង់
ឲ្យទូលបង្គំបានរីករាយ ដោយសេចក្តីអំណនៃរាស្ត្រទ្រង់
ហើយឲ្យបានអរព្រឺព្រួច ជាមួយនឹងមរដករបស់ទ្រង់។
៦ ៙ យើងខ្ញុំរាល់គ្នាបានធ្វើបាប
ដូចជាពួកឰយុកោយើងខ្ញុំដែរ
ក៏បានប្រព្រឹត្តអំពើទុច្ចរិត ហើយធ្វើការអាក្រក់ផង
៧ ពួកឰយុកោយើងខ្ញុំមិនបានពិចារណាយល់
ពីការអស្ចារ្យរបស់ទ្រង់នៅស្រុកអេស៊ីព្ទទេ
ក៏មិនបាននឹកចាំពីសេចក្តីសប្បុរសដ៏បរិបូររបស់ទ្រង់ដែរ
គេបានបះបោរនៅត្រង់មាត់សមុទ្រវិញ
គឺជាសមុទ្រក្រហម
៨ ទោះបើយ៉ាងនោះ គង់តែទ្រង់បានជួយសង្គ្រោះគេដែរ
ដោយយល់ដល់ព្រះនាមទ្រង់
ដើម្បីនឹងធ្វើឲ្យព្រះចេស្តាដ៏ខ្លាំងពូកែរបស់ទ្រង់
បានប្រាកដច្បាស់
៩ ទ្រង់បានបង្គាប់ដល់សមុទ្រក្រហម
សមុទ្រនោះក៏រីងទៅ
យ៉ាងនោះ ទ្រង់បាននាំគេដើរកាត់ទីជំរៅ
ដូចជាដើរនៅទីគោក
១០ ទ្រង់បានជួយឲ្យរួចពីកណ្តាប់ដៃនៃពួកអ្នកដែលស្អប់គេ
ក៏លោះគេឲ្យរួចពីកណ្តាប់ដៃនៃពួកខ្មាំងសត្រូវ
១១ ទឹកសមុទ្របានហូរគ្របលើពួកតតាំងនឹងគេ
ឥតមាននៅសល់ដល់មួយឡើយ
១២ នោះទើបគេបានជឿព្រះបន្ទូលទ្រង់
ហើយច្រៀងសរសើរដល់ទ្រង់។
១៣ ៙ តែមិនយូរប៉ុន្មាន ក៏ភ្លេចកិច្ចការរបស់ទ្រង់ទៅ
ហើយមិនបានរង់ចាំស្តាប់សេចក្តីដំបូន្មានរបស់ទ្រង់ទេ
១៤ គឺគេមានចិត្តខ្មួលខ្មាញ់នៅទីរហោស្ថាន
ក៏ល្បងលព្រះនៅទីហួតហែងវិញ
១៥ ទ្រង់ក៏ព្រមប្រទានតាមសេចក្តីសំណូមរបស់គេ
តែទ្រង់ឲ្យមានសេចក្តីក្រៀមស្ងួតនៅក្នុងចិត្តគេវិញ
១៦ គេក៏មានសេចក្តីច្រណែននឹងម៉ូសេ
នៅក្នុងទីដំឡើងត្រសាល
ហើយនឹងអើរ៉ុន ដែលជាអ្នកបរិសុទ្ធរបស់ព្រះយេហូវ៉ាដែរ
១៧ នោះផែនដីក៏ប្រេះហា ស្រូបយកដាថានទៅ
ហើយគ្របលើអ័ប៊ីរ៉ាម និងពួកគាត់
១៨ មានភ្លើងឆេះឡើងក្នុងពួកគេ
អណ្តាតភ្លើងនោះក៏បញ្ឆេះមនុស្សអាក្រក់ទៅ។
១៩ ៙ គេបានធ្វើរូបកូនគោនៅត្រង់ភ្នំហោរែប
ហើយបានក្រាបថ្វាយបង្គំចំពោះរូបសិតនោះ
២០ គឺយ៉ាងនោះដែលគេបានប្តូរព្រះដ៏ជាសិរីល្អនៃគេ
ឲ្យបានជារូបដូចគោដែលស៊ីស្មៅវិញ
២១ គេបានភ្លេចព្រះដែលជួយសង្គ្រោះគេ
ជាព្រះដែលបានធ្វើការយ៉ាងធំសំបើមនៅស្រុកអេស៊ីព្ទ
២២ គឺជាការយ៉ាងអស្ចារ្យនៅស្រុកហាំ
និងការគួរស្ញែងខ្លាចនៅត្រង់សមុទ្រក្រហម
២៣ ដូច្នេះ ទ្រង់បានមានព្រះបន្ទូលថានឹងបំផ្លាញគេបង់
ប៉ុន្តែម៉ូសេ ជាអ្នករើសតាំងរបស់ទ្រង់
លោកបានឈរនៅចំពោះទ្រង់ ក្នុងដំណើររំលងនោះ
ដើម្បីនឹងបង្វែរសេចក្តីក្រោធរបស់ទ្រង់ចេញ
ក្រែងទ្រង់បំផ្លាញគេមែន។
២៤ ៙ អើ គេបានមើលងាយស្រុកដ៏សប្បាយនោះ
គេមិនបានជឿព្រះបន្ទូលទ្រង់ទេ
២៥ គឺបានរទូរទាំនៅក្នុងត្រសាលគេវិញ
ឥតស្តាប់តាមព្រះសូរសៀងនៃព្រះយេហូវ៉ាឡើយ
២៦ ដូច្នេះ ទ្រង់ក៏លើកព្រះហស្តឡើងស្បថនឹងគេថា
ទ្រង់នឹងឲ្យគេដួលនៅក្នុងទីរហោស្ថាន
២៧ ហើយថា នឹងឲ្យពូជពង្សគេដួលនៅកណ្តាល
អស់ទាំងសាសន៍ ព្រមទាំងកំចាត់កំចាយគេ
ឲ្យទៅនៅពេញពាសក្នុងប្រទេសដទៃទាំងប៉ុន្មាន។
២៨ ៙ គេក៏បានទៅភ្ជាប់ខ្លួននឹងព្រះបាល-ពេអរ
ហើយបានបរិភោគអស់ទាំងគ្រឿងបូជា
ដែលថ្វាយដល់រូបព្រះឥតជីវិត
២៩ គឺយ៉ាងនោះដែលគេបានបណ្តាលឲ្យទ្រង់ខ្ញាល់
ដោយសារអំពើរបស់គេ
ហើយមានការប្រហារជីវិតកើតឡើងនៅក្នុងពួកគេ
៣០ គ្រានោះ ភីនេហាសក៏ក្រោកឡើងសំរេចទោសដល់គេ
រួចការប្រហារជីវិតនោះក៏អាក់ខានទៅ
៣១ ការនោះបានរាប់ជាសេចក្តីសុចរិតដល់ភីនេហាស
ដរាបដល់គ្រប់ទាំងដំណមនុស្ស ជារៀងរាបតទៅ។
៣២ ៙ គេក៏បណ្តាលឲ្យទ្រង់ខ្ញាល់ នៅត្រង់ទឹកមេរីបាទៀត
ការនោះជាហេតុនាំឲ្យម៉ូសេកើតមានទោសដែរ
ដោយព្រោះគេ
៣៣ ដ្បិតគេបានរំអុកដល់ចិត្តលោក
ហើយបបូរមាត់លោកបាននិយាយឥតបើគិត។
៣៤ ៙ គេក៏មិនបានបំផ្លាញសាសន៍ដទៃទាំងប៉ុន្មាន
ដូចជាព្រះយេហូវ៉ាបានបង្គាប់ដែរ
៣៥ គឺគេបានទៅប្រព្រឹត្តច្របូកច្របល់ជាមួយ
ព្រមទាំងរៀនតាមកិរិយារបស់សាសន៍ដទៃទាំងនោះវិញ
៣៦ ក៏គោរពប្រតិបត្តិដល់រូបព្រះរបស់សាសន៍ដទៃទាំងនោះដែរ
ជាការដែលត្រឡប់ជាអន្ទាក់ដល់គេ
៣៧ អើ គេបានទាំងបូជាថ្វាយនូវកូនប្រុសកូនស្រីគេដល់
ពួកអារក្សផង
៣៨ ក៏កំចាយឈាមដែលគ្មានទោស
គឺជាឈាមរបស់កូនប្រុសកូនស្រីគេ
ដែលគេបូជាថ្វាយដល់អស់ទាំងរូបព្រះនៅស្រុកកាណាន
ដូច្នេះ ស្រុកក៏ត្រឡប់ជាស្មោកគ្រោកដោយសារឈាម
៣៩ គឺយ៉ាងនោះដែលគេបានធ្វើឲ្យខ្លួនមានសៅហ្មង
ដោយសារកិរិយារបស់គេ ព្រមទាំងប្រព្រឹត្តសេចក្តីកំផិត
ដោយអំពើរបស់គេផង។
៤០ ៙ ហេតុនោះបានជាសេចក្តីក្រោធរបស់ព្រះយេហូវ៉ា
បានឆួលឡើងទាស់នឹងរាស្ត្រទ្រង់
ហើយទ្រង់ក៏ស្អប់ខ្ពើមពួកដែលជាមរដករបស់ទ្រង់វិញ
៤១ ទ្រង់ប្រគល់គេទៅក្នុងកណ្តាប់ដៃនៃសាសន៍ដទៃ
ហើយពួកអ្នកដែលស្អប់គេ បានគ្រប់គ្រងលើគេវិញ
៤២ ពួកខ្មាំងសត្រូវបានសង្កត់សង្កិន
ហើយគេត្រូវចុះចាញ់នៅក្រោមកណ្តាប់ដៃពួកសត្រូវនោះ
៤៣ ទ្រង់បានប្រោសគេឲ្យរួចជាច្រើនដងច្រើនគ្រា
ប៉ុន្តែសេចក្តីដំបូន្មានរបស់គេបានទាស់ទទឹងនឹងទ្រង់
ហើយគេត្រូវធ្លាក់ទៅជាទាបថោកក្នុងអំពើទុច្ចរិតរបស់គេ
៤៤ ទោះបើយ៉ាងនោះ គង់តែទ្រង់បានទតមើល
សេចក្តីវេទនារបស់គេ
ក្នុងកាលដែលគេអំពាវនាវរកទ្រង់ដែរ
៤៥ ទ្រង់ក៏នឹកចាំពីសេចក្តីសញ្ញារបស់ទ្រង់ចំពោះគេ
ហើយបានប្រែគំនិតទៅ
ដោយសេចក្តីសប្បុរសដ៏បរិបូររបស់ទ្រង់
៤៦ ទ្រង់បណ្តាលឲ្យពួកអ្នកដែលដឹកនាំគេទៅជាឈ្លើយ
ត្រឡប់ជាមានសេចក្តីអាណិតមេត្តាដល់គេវិញ។
៤៧ ៙ ឱព្រះយេហូវ៉ា ជាព្រះនៃយើងខ្ញុំអើយ
សូមជួយសង្គ្រោះយើងខ្ញុំផង
សូមប្រមូលយើងខ្ញុំពីកណ្តាលពួកសាសន៍ដទៃមក
ដើម្បីឲ្យយើងខ្ញុំបានលើកដំកើងព្រះនាមបរិសុទ្ធនៃទ្រង់
ព្រមទាំងយកការសរសើរដល់ទ្រង់
ទុកជាសេចក្តីអំណររបស់យើងខ្ញុំផង។
៤៨ ៙ សូមសរសើរដល់ព្រះយេហូវ៉ា
ជាព្រះនៃសាសន៍អ៊ីស្រាអែល
ចាប់តាំងពីអស់កល្បរៀងទៅដល់អស់កល្បជានិច្ច
ត្រូវឲ្យបណ្តាជនទាំងឡាយពោលថា អាម៉ែន
ចូរលើកដំកើងព្រះយេហូវ៉ាចុះ។