១១១
ស្នាព្រះហស្តដ៏អស្ចារ្យរបស់ព្រះ
១ ចូរសរសើរដល់ព្រះយេហូវ៉ា
ខ្ញុំនឹងអរព្រះគុណដល់ព្រះយេហូវ៉ា
ដោយអស់ពីចិត្ត
នៅក្នុងចំណោមនៃមនុស្សទៀងត្រង់
ហើយក្នុងពួកជំនុំជន
២ អស់ទាំងស្នាដៃនៃព្រះយេហូវ៉ាសុទ្ធតែធំសេស
គួរឲ្យអស់អ្នកណាដែលចូលចិត្តនឹងការទាំងនោះ
បានស្វែងរកតាម
៣ ឯស្នាដៃនៃទ្រង់ នោះល្អប្រពៃ ហើយរុងរឿងឧត្តម
សេចក្តីសុចរិតរបស់ទ្រង់ ក៏ស្ថិតស្ថេរនៅជាដរាប
៤ ទ្រង់បានធ្វើឲ្យមានសេចក្តីនឹកចាំពីការអស្ចារ្យរបស់ទ្រង់
ព្រះយេហូវ៉ាទ្រង់ប្រកបដោយមេត្តាករុណា
និងអាណិតអាសូរ
៥ ទ្រង់បានប្រទានអាហារ ដល់អស់អ្នកដែលកោតខ្លាចទ្រង់
ក៏នឹងនឹកចាំពីសេចក្តីសញ្ញាទ្រង់ជានិច្ចដែរ
៦ ទ្រង់បានសំដែងព្រះចេស្តានៃការទ្រង់
ឲ្យរាស្ត្រទ្រង់ឃើញ
ដោយប្រទានឲ្យគេគ្រងបានមរដកនៃអស់ទាំងសាសន៍
៧ អស់ទាំងស្នាដៃនៃព្រះហស្តទ្រង់សុទ្ធតែពិតត្រង់
ហើយសុចរិត
បញ្ញត្តទាំងប៉ុន្មាននៃទ្រង់សុទ្ធតែម៉ត់ចត់
៨ ក៏បានតាំងឲ្យនៅអស់កល្បជានិច្ច
ហើយបានសំរេចដោយសេចក្តីពិត និងសេចក្តីទៀងត្រង់
៩ ទ្រង់បានចាត់ប្រើសេចក្តីប្រោសលោះដល់រាស្ត្រទ្រង់
ទ្រង់បានសំរេចសេចក្តីសញ្ញាទ្រង់ ឲ្យនៅជាដរាប
ព្រះនាមទ្រង់បរិសុទ្ធ ហើយគួរគោរព
១០ ឯសេចក្តីកោតខ្លាចដល់ព្រះយេហូវ៉ា
នោះជាដើមចមនៃប្រាជ្ញា
អស់អ្នកដែលកាន់តាម នោះមានយោបល់ល្អ
សេចក្តីសរសើរនៃទ្រង់ជាប់នៅអស់កល្បជានិច្ច។