១៣០
ពី​ក្នុង​រណ្តៅ​ដ៏​ជ្រៅ ទូលបង្គំ​ស្រែក​អង្វរ​ព្រះអង្គ
ទំនុក​ច្រៀង​តាម​ថ្នាក់។
១ ឱ​ព្រះយេហូវ៉ា​អើយ
ទូលបង្គំ​បាន​អំពាវនាវ​ដល់​ទ្រង់
ពី​ទី​ជំរៅ​មក
២ ឱ​ព្រះអម្ចាស់​អើយ សូម​ស្តាប់​សំឡេង​ទូលបង្គំ
សូម​ឲ្យ​ព្រះកាណ៌​ទ្រង់​ប្រុង​ស្តាប់​ពាក្យ​ទូលបង្គំ​ទូលអង្វរ
៣ ឱ​ព្រះយេហូវ៉ា​អើយ បើ​សិន​ជា​ទ្រង់​កត់​ចំណាំ​អស់
ទាំង​អំពើ​ទុច្ចរិត
នោះ ឱ​ព្រះអម្ចាស់​អើយ តើ​អ្នក​ណា​នឹង​ធន់​នៅ​បាន
៤ ប៉ុន្តែ​ទ្រង់​មាន​ព្រះហឫទ័យ​អត់​ទោស​វិញ
ដើម្បី​ឲ្យ​គេ​បាន​កោតខ្លាច​ដល់​ទ្រង់
៥ ទូលបង្គំ​រង់ចាំ​ព្រះយេហូវ៉ា គឺ​ព្រលឹង​ទូលបង្គំ​រង់ចាំ​ទ្រង់
ទូលបង្គំ​សង្ឃឹម​ដល់​ព្រះបន្ទូល​នៃ​ទ្រង់
៦ ព្រលឹង​នៃ​ទូលបង្គំ​រង់ចាំ​ព្រះអម្ចាស់
ជា​ជាង​ពួក​យាម​ល្បាត​រង់ចាំ​ភ្លឺ​ឡើង
អើ ជា​ជាង​ពួក​យាម​ល្បាត​រង់ចាំ​ភ្លឺ​ឡើង​ទៅ​ទៀត
៧ ឱ​អ៊ីស្រាអែល​អើយ ចូរ​សង្ឃឹម​ដល់​ព្រះយេហូវ៉ា​ចុះ
ដ្បិត​មាន​សេចក្តី​សប្បុរស​នៅ​នឹង​ព្រះយេហូវ៉ា
ហើយ​មាន​សេចក្តី​ប្រោស​លោះ​ជា​បរិបូរ​នៅ​នឹង​ទ្រង់​ដែរ
៨ ទ្រង់​នឹង​លោះ​សាសន៍​អ៊ីស្រាអែល
ឲ្យ​រួច​ពី​គ្រប់​ទាំង​សេចក្តី​ទុច្ចរិត​របស់​ខ្លួន។