១១៨
ព្រះហឫទ័យមេត្តាករុណារបស់ព្រះអង្គនៅស្ថិតស្ថេររហូតតទៅ
១ ចូរលើកតម្កើងព្រះអម្ចាស់
ដ្បិតព្រះអង្គសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២ សូមអោយជនជាតិអ៊ីស្រាអែលពោលឡើងថា៖
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៣ សូមអោយកូនចៅរបស់លោកអើរ៉ុន
ពោលឡើងថា៖
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៤ សូមអោយអស់អ្នកដែលគោរពកោតខ្លាច
ព្រះអម្ចាស់ពោលឡើងថា៖
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៥ នៅពេលមានអាសន្ន ខ្ញុំបានអង្វរព្រះអម្ចាស់
ព្រះអម្ចាស់ក៏បានឆ្លើយតបមកខ្ញុំវិញ
ហើយប្រទានអោយខ្ញុំមានសេរីភាព។
៦ ព្រះអម្ចាស់កាន់ខាងខ្ញុំ
ខ្ញុំមិនភ័យខ្លាចឡើយ
តើមនុស្សលោកអាចធ្វើអ្វីខ្ញុំកើត?
៧ ដោយព្រះអម្ចាស់កាន់ខាងខ្ញុំ ហើយជួយខ្ញុំ
ខ្ញុំនឹងឃើញខ្មាំងសត្រូវបរាជ័យ។
៨ ផ្ញើជីវិតលើព្រះអម្ចាស់
នោះប្រសើរជាងទុកចិត្តលើមនុស្ស។
៩ ផ្ញើជីវិតលើព្រះអម្ចាស់
នោះប្រសើរជាងទុកចិត្តលើអ្នកធំ។
១០ ប្រជាជាតិទាំងប៉ុន្មាននាំគ្នាមកឡោមព័ទ្ធខ្ញុំ
តែខ្ញុំនឹងកំទេចពួកគេ
ដោយសារព្រះនាមរបស់ព្រះអម្ចាស់។
១១ ប្រជាជាតិទាំងនោះឡោមព័ទ្ធខ្ញុំគ្រប់ទិសទី
តែខ្ញុំនឹងកំទេចពួកគេ
ដោយសារព្រះនាមរបស់ព្រះអម្ចាស់។
១២ ប្រជាជាតិទាំងនោះឡោមព័ទ្ធខ្ញុំដូចហ្វូងឃ្មុំ
តែពួកគេនឹងឆេះអស់ទៅដូចភ្លើងឆេះបន្លា
ខ្ញុំនឹងកំទេចពួកគេ
ដោយសារព្រះនាមរបស់ព្រះអម្ចាស់។
១៣ គេបានច្រានខ្ញុំយ៉ាងខ្លាំង ដើម្បីអោយខ្ញុំដួល
តែព្រះអម្ចាស់បានជួយសង្គ្រោះខ្ញុំ។
១៤ ព្រះអម្ចាស់ជាកម្លាំងរបស់ខ្ញុំ
ខ្ញុំច្រៀងថ្វាយព្រះអង្គ ព្រះអង្គសង្គ្រោះខ្ញុំ។
១៥ មនុស្សសុចរិតនឹងនាំគ្នាស្រែកហ៊ោ
នៅក្នុងជំរំរបស់ខ្លួន ព្រោះតែមានជ័យជំនះ
ព្រះអម្ចាស់សំដែងព្រះបារមីប្រកប
ដោយឫទ្ធានុភាព!
១៦ ព្រះអម្ចាស់សំដែងព្រះបារមីដ៏ខ្ពង់ខ្ពស់បំផុត!
ព្រះអម្ចាស់សំដែងព្រះបារមីប្រកប
ដោយឫទ្ធានុភាព។
១៧ ខ្ញុំនឹងមានជីវិត ខ្ញុំនឹងមិនស្លាប់ឡើយ
ហើយខ្ញុំនឹងរៀបរាប់អំពី
ស្នាព្រះហស្ដរបស់ព្រះអម្ចាស់។
១៨ មែនហើយព្រះអម្ចាស់បានវាយប្រដៅខ្ញុំយ៉ាងខ្លាំង
តែព្រះអង្គមិនបណ្ដោយអោយខ្ញុំស្លាប់ឡើយ។
១៩ ចូរនាំគ្នាបើកទ្វារនៃសេចក្ដីសុចរិតអោយខ្ញុំ
ដើម្បីខ្ញុំចូលទៅលើកតម្កើងព្រះអម្ចាស់។
២០ នេះនែ៎ ទ្វារដែលនាំចូលទៅរកព្រះអម្ចាស់
មានតែមនុស្សសុចរិតទេ
ដែលចូលតាមទ្វារនេះបាន។
២១ ទូលបង្គំនឹងលើកតម្កើងព្រះអង្គ
ព្រោះព្រះអង្គបានឆ្លើយតបមកទូលបង្គំ
ព្រះអង្គបានសង្គ្រោះទូលបង្គំ។
២២ ថ្មដែលពួកជាងសង់ផ្ទះបោះបង់ចោល
បានត្រឡប់មកជាថ្មគ្រឹះដ៏សំខាន់បំផុត។
២៣ ព្រះអម្ចាស់បានសំរេចការអស្ចារ្យ
យើងក៏បានឃើញ ហើយស្ងើចសរសើរផង។
២៤ ថ្ងៃនេះជាថ្ងៃដែលព្រះអម្ចាស់បានបង្កើតមក
យើងនាំគ្នាត្រេកអរសប្បាយរីករាយនៅថ្ងៃនេះ!
២៥ ព្រះអម្ចាស់អើយ សូមសង្គ្រោះយើងខ្ញុំ!
ព្រះអម្ចាស់អើយ
សូមប្រទានអោយយើងខ្ញុំមានជោគជ័យ!
២៦ សូមលើកតម្កើងព្រះអង្គដែលយាងមក
ក្នុងព្រះនាមព្រះអម្ចាស់
យើងសូមអោយពរអ្នករាល់គ្នា
ពីក្នុងព្រះដំណាក់របស់ព្រះអម្ចាស់។
២៧ មានតែព្រះអម្ចាស់ទេដែលជាព្រះដ៏ពិត
តែមួយព្រះអង្គ ព្រះអង្គបំភ្លឺយើង
ចូរនាំគ្នាលើកធាងទន្សែឡើង
ហើយហែជាក្បួន
រហូតដល់ជ្រុងអាសនៈរបស់ព្រះអម្ចាស់!
២៨ ព្រះអង្គជាព្រះនៃទូលបង្គំ
ទូលបង្គំនឹងសរសើរតម្កើងព្រះអង្គ
ឱព្រះនៃទូលបង្គំអើយ
ទូលបង្គំសូមលើកតម្កើងព្រះអង្គ!
២៩ ចូរលើកតម្កើងព្រះអម្ចាស់ ដ្បិតព្រះអង្គសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!