28
1 Entaun Isac bolu Jacó mai. Isac foo bensaun ba nia, depois haruka nia dehan, “Keta hola feto Kanaán.
2 Agora kedas o baa iha rai Padan-Aram. Baa iha o nia inan nia aman Betuél nia uma, hola o nia inan nia maun Labão nia oan feto ida.
3 Maromak Kbiit Nain foo bensaun ba o, no halo o nia oan sai barak, too o nia jerasaun sira sai nasaun barak.
4 Hau harohan atu bensaun nebee Maromak foo ba Abraão tuun ba o ho o nia jerasaun. Nunee o sei sai nain ba rai nebee uluk Maromak foo ba Abraão, rai nee agora dadauk o hela ba hanesan ema lao rai.”
5 Depois Isac haruka Jacó baa ona. Nunee Jacó sai atu baa iha rai Padan-Aram, iha Labão nia uma. Labão nee Betuél ema Aram nia oan, no Jacó ho Esaú nia inan Rebeca nia maun.
Esaú kaben ho Ismael nia oan feto
6 Esaú rona katak, Isac foo tiha bensaun ba Jacó hodi hameno dehan, “O la bele kaben ho feto Kanaán,” depois Isac haruka Jacó baa iha Padan-Aram para hola feto iha nebaa.
7 Esaú mos hatene katak, Jacó halo tuir nia inan-aman hodi baa Padan-Aram.
8 Nunee Esaú haree katak, nia aman Isac la gosta liu feto Kanaán sira.
9 Entaun nia desidi atu hola tan feto seluk. Nia baa hasoru Abraão nia oan Ismael hodi hola nia oan Mahalat sai nia kaben. Mahalat nee Nebaiot nia alin.
Jacó mehi iha Betél
10 Jacó sai husi Berseba, atu baa iha sidade Haran.
11 Too iha fatin ida nia para, nia atu toba iha nebaa tanba loro matan monu ona. Nia foti fatuk ida tau hanesan sumasu, depois nia toba.
12 Iha kalan nee, nia mehi. Iha nia mehi, nia haree eskada ida iha rai, aas too iha lalehan. Maromak nia anju sira sae-tuun husi eskada nee.
13 NAI Maromak hamriik hela iha eskada nia leten hodi hatete, “Hau nee NAI, o nia avoo Abraão ho o nia aman Isac nia Maromak. Rai nebee agora dadauk o toba ba nee, Hau sei foo ba o ho o nia jerasaun sira.
14 O nia jerasaun sei sai barak hanesan rai rahun. Sira sei namkari ba iha lorosae too loromonu, rai ulun too rai ikun. Liu husi o ho o nia jerasaun, nasaun hotu-hotu iha mundu sei hetan bensaun.
15 O baa nebee deit, Hau sei hamutuk ho o hodi tau matan ba o. Hau sei lori o fila fali mai iha rai nee. Hau sei la husik o, Hau sei kumpri buat hotu nebee mak Hau promete ona ba o.”
16 Bainhira Jacó hadeer, nia hatete, “Afinal NAI Maromak iha hela fatin ida nee. Agora mak hau foin hatene.”
17 Nia tauk hodi dehan, “Fatin ida nee halo hau nia isin fulun hamriik. Tebes duni, nee Maromak nia uma, fatin nee odamatan ba lalehan nian.”
18 Iha aban dadeer-saan, Jacó hadeer sedu, nia foti fatuk ida nebee nia uza hodi tau nia ulun nee, nia harii tiha fatuk nee. Depois nia fui mina azeiti ba fatuk nee nia leten.
19 Nia foo naran ba fatin nee Betél. Uluk sidade besik fatin nee naran Lus.
20 Depois Jacó jura dehan, “Se Maromak hamutuk ho hau hodi tau matan mai hau iha hau nia viajen nee, se Nia foo hahaan mai hau haan ho hena mai hau hatais,
21 too hau fila fali mai iha hau nia aman nia uma ho diak, entaun NAI sei sai hau nia Maromak.
22 Fatuk nebee hau harii nee sei sai Maromak nia uma. Buat hotu-hotu nebee Maromak foo mai hau, hau sei fahe ba parte sanulu, parte ida hau sei foo fila fali ba Maromak.”