29
Jacó too iha nia tiun Labão nia uma
1 Hotu tiha Jacó kontinua fali nia viajen. Ikus mai nia too iha ema lorosae sira nia rain.
2 Iha loron ida nia haree bee posu iha rai tetuk ida. Iha bibi malae grupu tolu toba besik posu nee hodi hein hela atu hemu bee. Bee posu nee taka ho fatuk boot ida.
3 Baibain bibi sira hamutuk hotu ona foin bibi atan sira dudu sees fatuk nee hodi kuru bee foo ba bibi sira hemu. Bibi hemu tiha hotu, bibi atan sira taka fila fali posu ho fatuk boot nee.
4 Jacó baa husu bibi atan sira, “Maluk sira, imi husi nebee?”
Sira hataan, “Ami husi Haran.”
5 Jacó husu tan, “Imi konhese Naor nia bei-oan Labão ka?”
Sira hataan, “Ami konhese.”
6 Jacó husu fali, “Nia diak ka lae?”
Sira hataan, “Nia diak hela. Haree took, nia oan feto Rakél lori bibi malae mai dadauk nee.”
7 Jacó dehan, “Loro sei aas, seidauk tempu atu halibur bibi sira. Diak liu foo hemu agora para lori fila fali baa haan duut.”
8 Maibee sira hataan, “La bele. Ami tenki hein bibi atan sira hotu halibur tiha sira nia bibi lai, foin ami dudu sees fatuk nee hodi foo hemu bibi sira nee.”
9 Jacó sei koalia hela ho sira, Rakél too mai ho nia aman nia bibi, tanba Rakél nee bibi atan.
10 Bainhira Jacó haree nia tiun Labão nia oan Rakél mai ho nia bibi, nia baa dudu sees tiha fatuk husi bee posu leten, depois foo hemu nia tiun nia bibi sira.
11 Hotu tiha nia rei Rakél no tanis ho lian makaas.
12 Nia konta ba Rakél katak, nia nee Rakél nia aman nia subrinhu rasik, nia feton Rebeca nia oan. Nunee Rakél halai baa hodi foo hatene nia aman.
13 Bainhira Labão rona dehan nia feton nia oan Jacó mai ona, nia halai kedas baa hasoru Jacó hodi hakuak ho rei nia. Depois Labão lori Jacó ba uma. Iha nebaa Jacó konta buat hotu-hotu ba Labão.
14a Labão dehan, “Loos duni, ita nain rua familia.”
Jacó kaben ho Lea ho mos Rakél
14b Jacó hela ho Labão durante fulan ida tomak,
15 depois Labão dehan, “Hau lakohi o servisu saugati deit mai hau tanba deit ita nain rua familia. Hatete took mai, o hakarak hau atu selu o hira?”
16 Labão nee iha oan feto nain rua. Oan feto boot naran Lea, nia alin naran Rakél.
17 Lea nia matan laduun kapaas, maibee Rakél nia isin furak no oin bonita.
18 Jacó laran monu ba Rakél, nunee nia hataan, “Hau sei servisu ba tiu durante tinan hitu atu bele kaben ho tiu nia oan feto ikun Rakél.”
19 Labão hataan, “Bele. Diak liu hau foo nia ba o duke foo ba mane seluk. O hela ho hau deit.”
20 Nunee Jacó servisu durante tinan hitu nia laran para hetan Rakél. Maibee tanba nia hadomi teb-tebes Rakél entaun nia senti tinan hitu nee hanesan loron hira deit.
21 Hotu tiha Jacó dehan ba Labão, “Hau servisu tinan hitu kompletu ona, nunee agora foo hau nia feen mai hau para hau bele moris hamutuk ho nia ona.”
22 Entaun Labão halibur ema hotu-hotu iha fatin nee hodi halo festa kazamentu.
23 Maibee iha kalan nee Labão lori fali Lea mak tama ba Jacó nia tenda, entaun Jacó toba ho Lea.
24 Labão foo nia atan feto Zilpa para sai Lea nia atan.
25 Iha aban dadeer Jacó haree ba, Lea mak iha fali! Entaun Jacó dehan ba Labão, “Ita boot halo saida mak nee? Durante nee hau servisu ba ita boot atu hetan Rakél, loos ka lae? Nusaa mak lohi fali hau?!”
26 Labão hataan, “Tuir ami nia lisan iha nee, alin la bele kaben uluk liu nia biin.
27 Nee duni o kompleta lai loron hitu festa kazamentu nian ho ami nia oan ida nee, depois mak ami foo tan ami nia oan feto ikun ba o. Naran katak o servisu mai hau tinan hitu tan.”
28 Jacó simu. Nia kompleta tiha nia loron hitu ho Lea, depois Labão foo nia oan Rakél hodi sai Jacó nia kaben.
29 Labão foo tan nia atan feto Bila ba nia oan Rakél para sai nia atan.
30 Jacó toba ho Rakél. Nia hadomi liu Rakél duke Lea. Nunee nia servisu ba Labão tinan hitu tan.
Jacó nia oan sira
31 Bainhira NAI Maromak haree katak Jacó la hadomi Lea, NAI halo Lea bele iha oan, maibee Rakél oan la iha.
32 Lea isin rua, depois tuur ahi oan mane ida. Labarik nee nia foo naran Ruben. Tanba nia dehan, “NAI Maromak haree ona hau nia terus. Nunee agora hau nia laen sei hadomi hau.”
33 Lea isin rua tan, nia tuur ahi oan mane ida. Nia dehan, “NAI Maromak rona katak hau nia laen la hadomi hau, entaun Nia foo tan oan mane ida nee mai hau.” Nunee nia hanaran labarik nee Simeão.
34 Depois Lea isin rua tan, nia tuur ahi oan mane ida. Nia dehan, “Agora hau nia laen sei metin ho hau tanba hau kous ona oan mane nain tolu ba nia.” Nunee nia hanaran labarik nee Levi.
35 Lea isin rua tan, nia tuur ahi oan mane ida. Nia dehan, “Dala ida nee hau sei hahii NAI Maromak.” Nunee nia hanaran labarik nee Judá. Hotu tiha Lea la hetan tan oan ona.