30
1 Bainhira Rakél haree katak nia ho Jacó la iha oan, nia laran moras ona ba nia biin. Entaun nia hatete ba Jacó, “Foo oan ba hau! Se lae hau mate.”
2 Jacó hirus nia hodi dehan, “Hau nee Maromak ka?! Nia mak halo o la hetan oan.”
3 Rakél hataan, “Hau nia atan Bila mak nee. O toba ho nia para bele foo oan mai hau. Ho nunee hau bele iha jerasaun liu husi nia.”
4 Nunee Rakél foo nia atan Bila ba Jacó nudar nia feen kiik, entaun Jacó toba ho nia.
5 Depois Bila isin rua, nia tuur ahi oan mane ida.
6 Rakél dehan, “Maromak tesi ona hau nia lia, Nia dehan hau loos hela. Nia rona ona hau nia lian hodi foo oan mane ida ba hau.” Tanba nee nia hanaran labarik nee Dan.
7 Depois Rakél nia atan Bila isin rua tan, nia tuur ahi oan mane segundu.
8 Rakél hatete, “Hau luta makaas hasoru hau nia biin, hau mak manaan.” Nunee nia hanaran labarik nee Naftali.
9 Bainhira Lea haree katak nia la hetan tan oan, nia foo nia atan Zilpa ba Jacó nudar nia feen kiik.
10 Depois Zilpa tuur ahi oan mane ida.
11 Lea hatete, “Hau sorti diak.” Nunee nia tau naran ba labarik nee Gad.
12 Lea nia atan Zilpa tuur ahi oan mane segundu.
13 Lea hatete, “Hau kontenti loos! Agora feto sira sei dehan hau nee kontenti.” Nunee nia hanaran labarik nee Asér.
14 Too tempu koa trigu, Ruben baa iha toos, nia hetan aimoruk ida para bele halo feto hetan oan. Nia lori mai foo ba nia inan Lea. Rakél husu Lea, “Favor foo o nia oan nia aimoruk uitoan mai hau ba.”
15 Maibee Lea hataan, “O hadau tiha hau nia laen, nee seidauk too ka? Agora o atu foti tan aimoruk nebee hau nia oan foo mai nee ka?”
Rakél hataan, “Entaun foo aimoruk nee mai hau mak orsida kalan o toba hamutuk ho Jacó.”
16 Iha lokraik Jacó fila husi toos. Lea baa hasoru nia hodi dehan, “Orsida o tenki toba ho hau, tanba hau aluga ona o ho hau nia oan nia aimoruk isin rua nian.” Entaun iha kalan nee Jacó toba ho Lea.
17 Maromak rona Lea nia orasaun. Nee mak Lea isin rua, nia tuur ahi oan mane numeru lima.
18 Lea dehan, “Maromak selu tiha ona hau nia kolen, tanba hau foo hau nia atan feto ba hau nia laen nudar nia feen kiik.” Nunee nia hanaran labarik nee Isakar.
19 Lea isin rua tan, nia tuur ahi oan mane nain neen ona.
20 Nia hatete, “Maromak foo ona prezenti furak ida mai hau. Agora hau nia laen sei respeita hau, tanba hau foo ona oan mane nain neen ba nia.” Nee mak nia tau labarik nee nia naran Zebulón.
21 Hotu tiha Lea tuur ahi oan feto ida, nia foo naran Diná.
22 Depois Maromak hanoin Rakél. Maromak rona Rakél nia orasaun hodi halo nia bele iha oan.
23 Nunee nia isin rua, nia tuur ahi oan mane ida. Nia hatete, “Maromak hasai ona hau nia moe.”
24 Nia tau naran ba labarik nee José, tanba nia dehan, “Hau harohan atu NAI Maromak foo tan oan mane ida mai hau.”
Jacó buka meius hodi aumenta nia bibi
25 Bainhira Rakél nia oan José moris ona, Jacó dehan ba Labão, “Foo lisensa mai hau atu fila fali ba hau nia rain.
26 Husik hau lori hau nia feen ho hau nia oan sira atu hau bele fila ona, tanba tiu hatene katak durante nee hau halo servisu makaas ba tiu hodi hetan sira.”
27 Maibee Labão hataan, “Se bele karik hela lai iha nee. Hau rona husi matan-dook katak, NAI Maromak foo bensaun ba hau tanba o hamutuk ho hau.
28 Entaun hatete mai ba, o hakarak hira, hau prontu selu.”
29 Jacó hataan, “Tiu rasik hatene, durante nee hau servisu makaas hodi tau matan ba tiu nia animal. Bainhira hau tau matan, animal sira nee aumenta ba beibeik.
30 Uluk hau seidauk mai iha nee, tiu nia riku-soin sei uitoan deit, maibee agora tiu nia riku-soin aumenta barak. Hau servisu ba tiu iha nebee deit, NAI Maromak foo bensaun ba tiu. Bainhira loos mak hau bele servisu ba hau nia feen ho oan?”
31 Labão husu tan, “O hakarak hau foo saida hodi selu o?”
Jacó hataan, “Tiu lalika foo buat ida. Hau prontu atu hein tiu nia bibi hodi tau matan nafatin, naran katak tiu halo buat ida nee mai hau.
32 Foo lisensa mai hau atu loron nee duni hau baa haree tiu nia bibi hodi haketak tiha bibi malae nebee makerek, bibi malae oan nebee metan ho bibi timur hotu nebee makerek. Animal hirak nee mak hau nia kolen.
33 Se ita halo nunee, aban-bainrua tiu bele hatene hau nee laran moos ka lae. Tiu bele baa revista deit hau nia animal. Se tiu haree bibi nebee mak la makerek ka bibi malae oan nebee laos metan, nee tiu hatene kedas katak hau naok tiha tiu nia animal.”
34 Labão hataan, “Hau konkorda, ita halo nunee duni.”
35 Maibee iha loron nee kedas Labão baa haketak tiha bibi timur aman sira nebee makerek, bibi timur inan makerek mutin uitoan, ho bibi malae nebee metan, nia foo ba nia oan sira mak tau matan.
36 Nia haruka lori animal sira nee baa dook husi Jacó, lao ain loron tolu nia laran. Jacó sei hein nafatin Labão nia bibi sira seluk.
37 Depois Jacó tesi ai sanak husi ai huun oin tolu. Nia loke tiha ai sanak sira nee nia kulit balu too haree hetan riska-riska mutin iha laran.
38 Nia tau ai sanak nebee loke tiha ona nia kulit nee ba iha animal nia hemu fatin, atu nunee bibi sira hemu, bele haree, tanba bibi baibain kaben bainhira mai atu hemu.
39 Bibi sira kaben iha ai sanak nee nia oin, sira nia oan mos riska-riska ka makerek.
40 Jacó haketak tiha bibi oan sira nee. Nia halo bibi sira seluk see oin ba Labão nia bibi nebee makerek ka metan. Ho nunee nia hetan bibi. Nia haketak tiha ninia bibi husi Labão nian.
41 Bainhira animal nebee isin diak atu kaben, Jacó baa tau ai sanak riska-riska sira nee iha animal nia hemu fatin iha bibi sira nia oin para kaben besik iha ai sanak sira nee.
42 Maibee bainhira animal krekas mai hemu, nia la tau ai sanak riska-riska sira nee. Nunee bibi oan krekas sai Labão nian, bibi oan isin diak mak sai Jacó nian.
43 Ho dalan ida nee Jacó sai riku teb-tebes, nia iha bibi barak, iha atan feto ho atan mane, kuda kamelu ho kuda buru.