31
Jacó halai husi Labão nia uma
1 Iha loron ida Jacó rona katak, Labão nia oan mane sira koalia ba malu nunee: “Jacó foti tiha ita nia aman nia riku-soin tomak. Nia riku-soin sira nee hotu mai husi ita nia aman.”
2 Jacó mos nota katak, Labão haree nia laduun diak, la hanesan ona uluk.
3 Depois NAI Maromak hatete ba Jacó, “O tenki fila ona ba o nia bei-ala sira nia rain, ba o nia maluk sira. Hau sei hamutuk ho o.”
4 Entaun Jacó haruka ema baa bolu Rakél ho Lea para mai hasoru nia iha fatin nebee nia hein hela nia bibi.
5 Nia dehan ba sira, “Hau nota katak imi nia aman haree hau laduun diak, la hanesan ona uluk. Maibee hau nia aman nia Maromak sempre hamutuk ho hau.
6 Imi hatene katak, durante nee hau servisu ba imi nia aman ho hau nia kbiit tomak.
7 Maski nunee imi nia aman selu hau la tuir buat nebee nia promete, nia muda beibeik too dala sanulu. Nia bosok hau tuun-sae hanesan nee, maibee Maromak la husik nia atu halo aat hau.
8 Bainhira imi nia aman dehan mai hau, ‘Bibi makerek mak sai o nian hodi selu o nia kolen,’ entaun bibi sira mos hahoris oan makerek hotu. Maibee se nia dehan, ‘Bibi makerek riska-riska mak selu o nia kolen,’ animal sira hahoris oan mesak riska-riska deit.
9 Ho nunee Maromak foti tiha imi nia aman nia animal hodi foo fali mai hau.
10 Uluk tempu bibi sira kaben, hau mehi. Hau foti oin, haree bibi timur aman kaben ho bibi inan, bibi aman sira nee makerek riska-riska no makerek pontu-pontu.
11 Iha mehi nee Maromak nia anju hatete mai hau dehan, ‘Jacó.’
Hau hataan, ‘Hau mak nee.’
12 Maromak nia anju dehan, ‘Foti oin haree ba, bibi aman sira kaben ho bibi inan, bibi aman sira nee mesak makerek riska-riska ho makerek pontu-pontu. Hau mak halo nunee, tanba Hau haree ona buat hotu-hotu nebee mak Labão halo ba o.
13 Hau nee Maromak ida nebee uluk hatudu Aan ba o iha Betél. Iha nebaa, o harii fatuk ida hodi fui mina azeiti ba iha leten. O mos halo juramentu mai Hau. Agora o sai kedas husi rai nee hodi fila fali ba o nia rain moris fatin.’ ”
14 Rona nunee Rakél ho Lea hataan, “Ami sei la hetan tan buat ida husi ami nia aman nia riku-soin.
15 Nia haree ami hanesan fali ema fuik-leet, tanba nia faan tiha ona ami. Ami nia folin mos nia haan hotu ona.
16 Riku-soin sira hotu nebee Maromak foti ona husi ami nia aman, agora sai ona ami nian ho ami nia oan sira nian. Nunee halo tuir saida deit mak Maromak hatete ona ba o.”
17 Entaun Jacó tula nia oan sira ho nia feen sira ba kuda kamelu.
18 Nia halibur nia animal sira hotu hodi haruka animal sira nee lao uluk. Nia lori nia riku-soin hotu-hotu nebee nia hetan iha rai Padan-Aram, atu baa haree nia aman Isac iha rai Kanaán.
19 Momentu nee Labão sai tiha ona hodi tesi nia bibi malae sira nia fulun. Bainhira nia sai, Rakél naok tiha nia aman nia estatua lulik sira.
20 Jacó la foo hatene Labão ema Aram nee katak nia atu sai, nia halai nonook deit.
21 Nia baa lori nia riku-soin hotu nebee mak nia iha. Nia hakur mota Eufrates hodi lao dadauk ba parte foho Gilead nian.
Labão duni tuir Jacó
22 Too iha loron tolu Labão rona dehan, Jacó halai tiha ona.
23 Entaun nia halibur nia maluk sira hodi duni tuir Jacó. Sira duni tuir durante loron hitu foin toman nia iha parte foho Gilead nian.
24 Iha kalan nee, Maromak mai koalia ba Labão ema Aram nee liu husi mehi. Nia dehan, “Bainhira koalia ho Jacó, kuidadu para la bele koalia buat ida hasoru nia.”
25 Momentu nee Jacó harii ona nia tenda iha parte foho Gilead nian nee. Labão ho nia maluk sira mos harii sira nia tenda besik iha nebaa.
26 Labão hatete ba Jacó, “O halo saida mak nee?! Nusaa mak la koalia sai? O lori halai hau nia oan feto sira hanesan fali ema nebee o kaer iha funu laran.
27 Nusaa mak o halai nonook deit, la hatete buat ida? Nusaa mak la foo hatene hau? Se o foo hatene karik, ami bele baku babadook no toka viola hodi hananu haksolok, depois husik imi sai.
28 O la foo tempu mai hau para bele rei lai hau nia bei-oan sira ho hau nia oan feto sira foin husik sira lao. O nia hahalok nee buat beik ida.
29 Tuir lo-loos hau iha forsa atu bele halo aat o, maibee hori kalan o nia aman nia Maromak hatete mai hau dehan, ‘Bainhira koalia ho Jacó, kuidadu para la bele koalia buat ida hasoru nia.’
30 Hau hatene o sai tanba o hakarak teb-tebes fila ona ba o nia aman nia uma kain. Maibee tanba saa mak o naok fali hau nia estatua lulik sira?”
31 Jacó hataan, “Hau tauk, keta halo be tiu atu uza forsa hodi hadau fali tiu nia oan feto sira.”
32 Jacó la hatene katak Rakél naok tiha estatua lulik sira nee. Nunee nia dehan, “Se karik tiu hetan tiu nia estatua lulik iha ema ruma, la bele husik ema nee moris. Revista took ami nia sasaan iha ita nia maluk sira nee nia oin para sira mak sai sasin. Keta hetan tiu nia sasaan balu iha hau, entaun foti deit ba.”
33 Nunee Labão tama ba Jacó nia tenda, depois tama ba Lea nia tenda ho mos atan feto nain rua nia tenda, maibee nia la hetan estatua lulik sira nee. Hotu tiha nia sai husi Lea nia tenda, nia tama fali ba Rakél nia tenda.
34 Maibee Rakél foti tiha estatua lulik nee tau iha kuda kamelu nia sela okos, depois nia tuur tiha iha leten. Labão buka ba-mai iha tenda laran, la hetan buat ida.
35 Rakél hatete ba nia aman dehan, “Nai keta hirus, hau la bele hamriik tanba hau nia fulan mai.” Nunee Labão buka maibee la hetan estatua lulik sira nee.
36 Entaun Jacó komesa hirus. Nia protesta dehan, “Hau halo krimi saida? Hau halo sala saida mak tiu duni hau hanesan fali ema kriminozu ida?
37 Tiu sobu hotu ona hau nia sasaan, hetan tiu nia sasaan ruma ka lae? Se hetan ona karik, lori mai tau iha ita nain rua nia maluk sira nee nia oin, para sira bele desidi see mak loos, see mak sala.
38 Hau hamutuk ho tiu tinan rua-nulu nia laran ona. Durante nee tiu nia bibi malae ho bibi timur sira nee hotu-hotu hahoris ho diak. Hau nunka oho tiu nia bibi aman ida hodi haan.
39 Se animal fuik tata mate tiu nia animal ruma, hau nunka lori foo ba tiu, maibee hau rasik mak selu. Buat saida deit mak ema naok loron ka naok kalan mos, tiu sempre eziji hau tenki selu.
40 Hau nia situasaun mak nee: Iha meudia, loro manas hakaas hau, iha kalan rai malirin. Hau toba la diak.
41 Durante tinan rua-nulu hau iha tiu nia uma, hau servisu hanesan nee. Hau servisu ba tiu durante tinan sanulu resin haat para bele hola tiu nia oan feto nain rua. Hau servisu tan tinan neen atu bele hetan animal sira nee. Maski nunee mos tiu selu hau la tuir buat nebee tiu promete ona, tiu muda beibeik too dala sanulu.
42 Maibee Maromak hamutuk ho hau. Nia nee hau nia avoo Abraão nia Maromak, hau nia aman Isac mos hamtauk Nia. Se Maromak la hamutuk ho hau karik, entaun tiu haruka tiha ona hau sai ho liman mamuk deit. Maibee Maromak haree ona hau nia terus no servisu todan sira nee. Tanba nee mak hori kalan Nia hasee tiu.”
Jacó ho Labão halo akordu hamutuk
43 Labão hataan ba Jacó, “Feto nain rua nee hau nia oan, labarik sira nee mos hau nian, bibi sira nee hau nian. Buat hotu nebee o haree dadauk nee hau nian hotu. Maibee agora hau atu halo saida? Atu foti fila fali hau nia oan feto nain rua nee la bele ona, atu foti fali labarik nebee sira kous nee mos la bele.
44 Diak liu ita nain rua halo akordu ida hodi hatudu katak ita dame malu ona.”
45 Nunee Jacó foti fatuk ida hodi harii.
46 Nia hatete ba nia maluk sira dehan, “Halibur fatuk iha nee.” Nunee sira lori fatuk mai bou hamutuk. Depois sira haan hamutuk besik iha fatuk sira nee.
47 Labão tau naran ba fatuk sira nee Jegar-Sahaduta. Maibee Jacó tau naran Galeed.
48 Labão dehan, “Ohin loron fatuk sira nee sai testemunha ba ita nain rua.” Nee mak fatuk sira nee naran Galeed.
49 Fatuk nee nia naran seluk Mispá, tanba Labão dehan, “Hau harohan atu NAI Maromak haree ita nain rua bainhira ita dook malu atu ita la bele kontra akordu nee.
50 Se karik o haree hau nia oan feto sira la diak ka hola fali feto seluk iha hau nia oan sira nee nia sorin mos, keta haluha, maski ema ida la haree maibee Maromak sei sai sasin.”
51 Labão hatutan tan, “Haree took fatuk sira nebee mak hau bou nee, haree mos fatuk nebee mak hau harii. Buat rua nee sai hanesan baliza entre ita nain rua.
52 Fatuk sira nee sai testemunha hodi foo hanoin ba ita nain rua katak, hau la bele hakat liu fatin nee atu halo aat o, o mos la bele hakat liu fatuk sira nee atu halo aat hau.
53 Hau husu atu Abraão nia Maromak ho Naor nia Maromak sai juis ba ita nain rua.”
Entaun Jacó halo juramentu hodi Maromak nia naran, Maromak ida nebee mak nia aman Isac hamtauk.
54 Hotu tiha Jacó oho animal halo sakrifisiu iha foho nee. Depois nia konvida nia maluk sira haan. Haan tiha hotu, sira hela iha nebaa kalan tomak.
55 Iha dadeer-saan deit, Labão rei nia bei-oan sira ho nia oan feto sira. Nia foo bensaun ba sira, depois nia sai hodi fila fali ba nia rain.