32
Jacó koko atu halo malirin nia maun Esaú nia laran
1 Jacó kontinua fali nia viajen. Derepenti Maromak nia anju sira hasoru nia.
2 Bainhira Jacó haree anju sira nee, nia dehan, “Nee Maromak nia fatin akampamentu.” Nunee nia hanaran fatin nee Mahanaim.
3 Depois Jacó haruka nia ema balu baa uluk hodi hasoru nia maun Esaú iha Seir iha rai Edom.
4 Jacó hatete ba sira dehan, “Imi baa foo hatene hau nia nai Esaú katak, nia atan Jacó hatete hanesan nee: ‘Durante nee hau hela ho Labão nudar ema lao rai.
5 Hau iha ona karau, kuda buru, bibi timur ho bibi malae, atan mane ho atan feto. Agora hau haruka hau nia ema baa atu hatoo liafuan nee ba hau nia nai hodi husu nai nia laran luak para bele simu hau ho diak.’ ”
6 Bainhira Jacó nia ema sira nee fila, sira hatoo ba Jacó, “Ami baa hasoru ona senhor nia maun Esaú. Agora nia mai dadauk atu hasoru senhor. Iha mane nain atus haat mak akompanha nia mai.”
7 Rona nunee Jacó senti tauk ho laran susar teb-tebes. Entaun nia fahe nia ema sira ho mos nia bibi, karau ho kuda kamelu sira ba grupu rua.
8 Nia hanoin, “Se Esaú mai asalta grupu ida, grupu ida seluk sei bele halai sees.”
9 Depois Jacó halo orasaun nunee: “NAI, hau nia avoo Abraão ho hau nia aman Isac nia Maromak, uluk Ita Boot mak hatete mai hau dehan, ‘Fila fali ba o nia rain, ba o nia maluk sira. Hau sei halo o moris diak.’
10 Durante nee Ita Boot sempre hatudu laran luak mai hau hodi kaer metin Ita Boot nia promesa mai hau ata, maski hau nee la merese. Uluk hau hakur mota Jordaun, hau lori deit ai tonka. Maibee agora hau mai fali lori ema ho animal fahe ba grupu rua.
11 Hau harohan atu Maromak salva hau husi hau nia maun Esaú nia liman, tanba hau tauk, keta nia mai atu asalta hau ho mos hau nia feen ho oan sira.
12 Maibee uluk Ita Boot promete dehan, ‘Hau sei halo o moris diak no sei halo o nia jerasaun barak too sura la bele, hanesan rai henek iha tasi.’ ”
13 Iha kalan nee Jacó hela iha nebaa. Nia hili animal balu nebee nia iha atu foo ba nia maun Esaú.
14 Nia hili bibi timur inan atus rua, bibi timur aman rua-nulu, bibi malae inan atus rua, bibi malae aman rua-nulu,
15 kuda kamelu inan tolu-nulu hamutuk ho nia oan, karau inan haat-nulu, karau aman sanulu, kuda buru inan rua-nulu ho kuda buru aman sanulu.
16 Nia fahe animal sira nee ida-idak ho nia grupu. Nia hili atan hodi lori grupu ida-idak. Depois nia foo hatene ba sira, “Imi lao uluk, hau tuir husi kotuk. Maibee imi tenki haree atu grupu ida dook uitoan husi grupu seluk.”
17 Nia foo hatene ba nia atan nebee lori grupu primeiru dehan, “Bainhira hau nia maun hasoru o, nia sei husu, ‘O nia patraun see? O atu baa nebee? Animal sira nee see nian?’
18 Entaun o hataan hanesan nee: ‘Animal sira nee nai nia atan Jacó nian. Nia haruka mai atu foo ba nia nai Esaú nudar prezenti. Orsida mak nia tuir.’ ”
19 Depois Jacó foo orden nebee hanesan ba nia atan sira nebee lori grupu animal segundu, terseiru ho grupu sel-seluk nebee tuir. Nia dehan, “Bainhira imi hasoru Esaú, imi mos tenki hatoo hau nia liafuan ohin nee.
20 Imi keta haluha atu hatete, ‘Ita boot nia atan Jacó sei mai tuir.’ ” Tanba Jacó hanoin, “Se hau haruka prezenti nee baa uluk, karik hau bele halo malirin Esaú nia laran para orsida hau hasoru nia, nia bele simu hau.”
21 Nunee Jacó haruka animal sira nee baa uluk nudar prezenti. Maibee iha kalan nee, nia sei hela iha nia akampamentu.
Nai Maromak deut malu ho Jacó
22 Iha kalan nee Jacó hadeer, lori nia kaben nain rua, nia feen kiik nain rua, ho nia oan nain sanulu resin ida, sira hakur mota Jabok.
23 Bainhira nia lori hotu sira ba iha mota sorin, nia fila fali baa haruka nia riku-soin hotu-hotu ba mota sorin.
24 Nunee Jacó mesak hela iha nebaa. Depois mane ida mai deut malu ho nia too rai huun mutin.
25 Too ikus mane nee haree nia la halo monu Jacó, entaun nia baku Jacó nia kidan, halo nia kidan ruin naksalak tiha.
26 Depois mane nee hatete, “Husik hau baa ona, tanba rai atu naroman ona.”
Maibee Jacó hataan, “O foo bensaun mai hau lai foin hau husik o baa.”
27 Mane nee husu, “O naran saa?”
Nia hataan, “Hau nia naran Jacó.”
28 Depois mane nee dehan, “O nia naran laos ona Jacó, maibee agora o nia naran Israel, tanba o luta kontra ona Maromak, kontra mos ema, o la monu ida.”
29 Depois Jacó husu, “Favor foo hatene o nia naran.”
Maibee mane nee hataan, “O husu hau nia naran hodi halo saida?” Depois nia foo bensaun ba Jacó iha fatin nee.
30 Nunee Jacó foo naran ba fatin nee Peniel tanba nia dehan, “Hau haree ona Maromak oin ho oin. Maski nunee hau la mate.”
31 Bainhira Jacó lao husik hela fatin nee, loro matan sae dadauk. Maibee nia lao kudeik tanba nia kidan ruin halai sees malu.
32 Nee mak too ohin loron ema Israel sira la haan naan nebee taka animal nia kidan ruin sor-sorin, tanba mane nee baku tiha Jacó besik uat nebee taka nia kidan ruin nee.