33
Jacó hasoru malu ho nia maun Esaú
1 Jacó hateke ba, haree Esaú mai ho nia ema atus haat, mesak mane deit. Entaun nia fahe nia oan sira ida-idak tuir sira nia inan Lea, Rakél ho nia feen kiik nain rua.
2 Nia haruka nia feen kiik ho sira nia oan lao uluk, tuir tan Lea ho nia oan sira, Rakél ho nia oan José mak iha kotuk liu.
3 Jacó lao uluk iha oin. Nia besik dadauk nia maun, nia hakneak hakruuk too rai dala hitu.
4 Maibee Esaú halai baa hasoru Jacó. Esaú hakuak metin hodi rei nia, sira nain rua tanis.
5 Esaú foti matan haree feto ho labarik sira nee, nia husu, “Sira nebee lao hamutuk ho o nee see?”
Jacó hataan, “Sira nee hau nia oan, Maromak nia bensaun nebee atan hau simu.”
6 Depois Jacó nia feen kiik sira ho sira nia oan sira baa besik hodi hakruuk ba Esaú.
7 Tuir mai Lea ho nia oan sira baa hakruuk ba nia. Ikus liu José ho nia inan Rakél mos baa hodi hakruuk ba nia.
8 Esaú husu, “Animal sira nebee ohin hau hetan iha dalan nee hodi halo saida?”
Jacó hataan, “Animal sira nee hau haruka baa foo ba nai para nai bele simu hau ho diak.”
9 Maibee Esaú dehan, “Alin, hau iha ona buat barak. Husik o nian deit ba.”
10 Jacó hataan, “Ita boot keta halo nunee. Simu netik prezenti nee hodi hatudu ita boot nia laran diak mai hau. Hau haree ita boot nia oin hanesan haree Maromak nia oin tanba ita boot simu ona hau ho diak.
11 Favor ida simu prezenti nebee hau haruka ba nee, tanba Maromak hatudu ona laran diak mai hau, nunee hau hetan buat hotu nebee hau presiza.” Jacó hamaus beibeik too Esaú mos simu duni prezenti nee.
12 Depois Esaú dehan, “Mai ita baa ona, hau akompanha ho o.”
13 Maibee Jacó hataan, “Nai, ita boot rasik hatene katak, labarik sira nee lao seidauk forsa, bibi ho karau oan sira nee mos sei susu hela. Entaun se karik ita obriga atu lao makaas durante loron ida deit, animal sira nee sei mate hotu.
14 Nunee nai baa uluk ba, depois atan hau lao neineik tuir animal sira nia forsa ho labarik sira nia kbiit. Too iha rai Seir mak hau hasoru nai iha nebaa.”
15 Esaú hatete, “Entaun hau husik hela hau nia ema balu para lao ho o.”
Maibee Jacó hataan, “Lalika ida, naran katak nai simu ona hau ho diak, nee too ona.”
16 Nunee iha loron nee kedas Esaú hahuu lao fila fali ba iha rai Seir.
17 Maibee Jacó baa fali sidade Sukot. Iha nebaa nia halo uma ba nia aan rasik, nia mos halo baraka ba nia animal. Nee mak fatin nee hanaran Sukot.
18 Ikus mai Jacó too iha sidade Sikem iha rai Kanaán. Ho nunee nia fila fali ho diak husi rai Padan-Aram. Too iha Sikem, nia harii tenda besik iha sidade.
19 Rai nebee Jacó dada tenda nee, nia sosa husi Sikem nia aman Hamór ho osan mutin atus ida.
20 Iha nebaa Jacó harii altar, depois nia hanaran fatin nee “Maromak mak Israel nia Maromak”.