34
Sikem estraga Jacó nia oan feto Diná
1 Iha loron ida, Lea ho Jacó nia oan Diná sai baa hodi vizita feto klosan sira iha rai nee.
2 Iha joven ida naran Sikem, nia aman Hamór husi suku Heveu mak ukun rai nee. Bainhira Sikem haree Diná, nia kaer tiha menina nee hodi estraga nia.
3 Hotu tiha nia laran monu ba Diná, Jacó nia oan feto nee. Nia gosta menina nee, nunee nia hamaus fali.
4 Entaun Sikem hatete ba nia aman Hamór, “Baa lori feto nee mai, hau hakarak kaben ho nia.”
5 Jacó rona dehan ema halo foer tiha nia oan feto. Maibee nia oan mane sira sei hein hela animal iha kampu, nunee nia nonook deit too sira fila.
6 Depois Sikem nia aman Hamór sai baa atu koalia ho Jacó.
7 Iha momentu nee Jacó nia oan mane sira rona tiha ona buat nebee akontese, entaun sira fila kedas husi kampu. Sira laran moras teb-tebes no raan nakali tanba Sikem estraga tiha Jacó nia oan feto. Nee hahalok ida nebee aat teb-tebes hasoru Israel, la merese liu.
8 Hamór hatete ba sira, “Hau nia oan Sikem gosta teb-tebes imi nia oan feto. Nee duni se bele karik foo nia ba hau nia oan para sai nia kaben.
9 Diak liu ita nia oan sira seluk mos bele hola malu ba-mai. Imi foo imi nia oan feto mai ami, imi nia oan mane mos bele hola ami nia oan feto.
10 Imi bele hela iha ami nia leet, rai nee nakloke ba imi. Nunee imi hela iha nebee deit, imi livre lao ba-mai hodi buka moris, bele mos sosa rai iha nee.”
11 Depois Sikem hatete ba Diná nia aman ho nia maun sira dehan, “Favor ida simu netik hau nia lia. Ita boot sira husu saida deit, hau sei entrega.
12 Barlaki ho sasaan too hira-hira deit mak ita boot sira husu, hau prontu foo. Saida deit mak ita boot sira husu, hau sei selu, naran katak ita boot sira foo menina nee mai hau para sai hau nia kaben.”
13 Tanba Sikem halo foer ona sira nia alin Diná, entaun Jacó nia oan mane sira finji hataan ba Sikem ho nia aman Hamór
14 dehan, “Ami la bele halo nunee. Ami la bele foo ami nia feton ba ema nebee la sunat. Hanesan nee ami moe boot.
15 Mane hotu-hotu iha ita boot sira nia leet tenki sunat hanesan ho ami mak foin ami hataan para imi nain rua bele kaben.
16 Ita boot sira sunat mak ami foo ami nia oan feto sira ba ita boot sira hola, ami mos hola ita boot sira nia oan feto sira. Ami sei hela iha ita boot sira nia leet, depois ita sei sai povu ida deit.
17 Maibee se karik ita boot sira lakohi sunat, entaun ami lori ami nia feton sai husi nee.”
18 Rona tiha sira nia liafuan, Hamór ho nia oan Sikem simu ho diak.
19 Joven nee lakohi dada tempu tanba nia gosta teb-tebes Jacó nia oan feto nee. Entaun nia halo tuir kedas buat nebee sira husu. Iha nia aman nia uma kain, joven nee mak boot liu.
20 Nunee Hamór ho nia oan Sikem baa kedas iha portaun tama ba sira nia sidade hodi koalia ba populasaun sira nebee hela iha sira nia sidade nee.
21 Hamór ho Sikem dehan, “Ema sira nee hakarak moris hakmatek ho ita. Diak liu ita husik sira hela iha ita nia rain no husik sira livre lao ba-mai hodi buka moris. Rai nee luan ba sira. Ita bele hola sira nia oan feto, ita mos bele foo ita nia oan feto ba sira.
22 Maibee mane hotu-hotu iha ita nia komunidade tenki sunat hanesan ho sira. Nee mak foin sira konkorda atu hela iha ita nia leet hodi sai povu ida deit.
23 Se nunee, too ikus sira nia animal ho sira nia riku-soin hotu sai ita nian. Entaun mai ita halo tuir sira nia hakarak deit, para sira hela iha ita nia leet.”
24 Mane hotu-hotu nebee iha portaun sidade nee simu Hamór ho nia oan Sikem nia liafuan. Entaun mane hotu-hotu iha sidade nee sunat tiha.
25 Iha loron tolu, sira nebee mak sunat nee kanek sei moras hela. Iha loron nee Jacó nia oan nain rua, Simeão ho Levi, sira nee Diná nia maun, sira foti sira nia surik tama nonook ba sidade hodi oho tiha mane hotu-hotu.
26 Hamór ho nia oan Sikem mos sira oho ho surik, depois sira lori sai Diná husi Sikem nia uma.
27 Hotu tiha Jacó nia oan sira seluk tama ba sidade laran hakat liu mate isin sira nee. Sira hadau sasaan hotu iha sidade nee tanba ema halo foer tiha ona sira nia feton.
28 Sira hadau tiha bibi, karau ho kuda buru. Saida deit mak iha sidade laran ka iha kampu, sira foti hotu.
29 Ema nia riku-soin, ema nia feen ho oan, saida deit mak sira hetan iha ema nia uma laran, sira lori hotu.
30 Jacó hatete ba Simeão ho Levi dehan, “Imi halo susar ona hau. Imi halo ema Kanaán, ema Feris ho ema seluk nebee hela iha rai nee hakribi hau hanesan fali buat dois ida. Ita nee ema uitoan deit. Se karik sira hamutuk hodi ataka lisuk hau, entaun hau ho hau nia familia sei mate mohu.”
31 Maibee sira hataan, “Entaun sira halo ami nia feton hanesan fali feto luroon nee diak ka?”