35
Jacó fila fali ba aldeia Betél
1 Hotu tiha Maromak hatete ba Jacó, “Agora o baa iha aldeia Betél hodi hela iha nebaa. O harii altar ida ba Hau iha nebaa. Hau nee Maromak, Hau mak uluk hatudu Aan ba o bainhira o halai husi o nia maun Esaú.”
2 Nunee Jacó hatete ba nia ema sira husi nia uma laran ho mos ema hotu nebee hamutuk ho nia dehan, “Soe tiha imi nia estatua lulik sira hotu nebee mak imi iha, hamoos imi nia aan no troka tiha imi nia hena.
3 Mai ita baa Betél. Iha nebaa hau sei harii altar ida ba Maromak. Nia mak tulun hau bainhira hau iha susar laran, hau baa nebee deit Nia sempre hamutuk ho hau.”
4 Nunee sira entrega hotu sira nia estatua lulik ho mos sira nia brinkus ba Jacó, depois Jacó lori baa hakoi besik iha ai huun boot iha Sikem.
5 Hotu tiha sira sai. Iha tempu nee Maromak halo tauk tiha populasaun iha sidade sira nebee besik, entaun la iha ema ida mak duni tuir sira.
6 Ikus mai Jacó ho ema sira nebee hamutuk ho nia too iha aldeia Lus (agora naran Betél), iha rai Kanaán.
7 Iha nebaa Jacó halo altar, depois nia hanaran fatin nee El Betél, tanba uluk nia halai husi nia maun, Maromak hatudu Aan ba nia iha fatin nee.
8 Tempu nebaa feto ida nebee tau matan ba Rebeca husi kiik, mate. Nia naran Debora. Sira hakoi nia iha ai huun boot nia okos iha Betél nia kraik. Entaun ema hanaran fatin nee Alon Bakut.
9 Bainhira Jacó fila tiha husi rai Padan-Aram, Maromak hatudu Aan ba nia dala ida tan hodi foo bensaun ba nia.
10 Maromak hatete, “O nia naran Jacó. Maibee komesa agora ema sei la bolu tan o Jacó, sira sei bolu fali Israel.” Ho nunee Maromak foo nia naran Israel.
11 Maromak hatete tan, “Hau Maromak Kbiit Nain. O iha oan barak ba, o nia jerasaun sai barak ba. Sira sei sai nasaun ida, too nasaun lubuk ida mos mai husi o. O nia jerasaun balu sei sai liurai.
12 Rai nebee uluk hau foo ba Abraão ho Isac, agora Hau foo ba o. Hau mos sei foo ba o nia jerasaun sira.”
13 Koalia tiha hotu, Maromak sai husi fatin nebaa.
14 Hotu tiha Jacó harii fatuk ida iha fatin nebee mak Maromak koalia ho nia. Nia fui tua iha fatuk nee nia leten nudar oferta, nia mos fui mina azeiti ba fatuk nee.
15 Jacó foo naran ba fatin nee Betél tanba Maromak koalia ho nia iha nebaa.
Benjamim moris no Rakél mate
16 Hotu tiha sira sai husi Betél. Sira besik dadauk aldeia Efrata, Rakél komesa tuur ahi, maibee nia tuur ahi susar tebes.
17 Bainhira nia kanotak moras makaas, parteira dehan ba nia, “Keta tauk, senhora hetan tan oan mane ida.”
18 Rakél besik atu mate. Molok nia iis kotu, nia foo naran ba labarik nee Benoni. Maibee nia aman foo naran Benjamim.
19 Bainhira Rakél mate, sira hakoi nia iha dalan atu baa Efrata, agora naran Belém.
20 Depois Jacó harii fatuk ida iha Rakél nia rate leten, fatuk nee too agora sei iha.
Jacó nia oan sira
21 Hotu tiha Jacó kontinua muda tan too iha uma aas Eder nia sorin ba. Depois nia harii nia tenda iha nebaa.
22 Bainhira nia hela iha fatin nee, Ruben tama baa toba fali ho nia aman nia feen kiik Bila. Jacó mos rona kona ba ida nee.
Jacó nia oan mane hamutuk nain sanulu resin rua.
23 Lea nia oan sira mak Ruben (nia nee Jacó nia oan mane boot), Simeão, Levi, Judá, Isakar ho Zebulón.
24 Rakél nia oan sira mak José ho Benjamim.
25 Rakél nia atan Bila nia oan sira mak Dan ho Naftali.
26 Lea nia atan Zilpa nia oan sira mak Gad ho Asér. Jacó nia oan sira nee hotu moris iha rai Padan-Aram.
Jacó nia aman Isac mate
27 Jacó baa haree nia aman Isac iha Manre, besik aldeia Kiriat-Arba (agora naran Hebron), Abraão ho Isac uluk hela iha nebaa nudar ema lao rai.
28 Isac moris too tinan 180.
29 Nia katuas loos ona foin nia iis kotu. Nia mate hodi baa hamutuk ho nia bei-ala sira. Nia oan Esaú ho Jacó hakoi nia.