37
José nia mehi
1 Jacó hela iha rai Kanaán, iha rai nebee uluk nia aman hela.
2 Jacó nia jerasaun sira nia istoria hanesan tuir mai nee.
Bainhira Jacó nia oan José tinan sanulu resin hitu, nia baibain ajuda nia maun sira hein bibi. Nia maun sira nee mak nia aman nia feen kiik Bila ho Zilpa nia oan. Maibee too iha uma nia kesar fali ba nia aman kona ba hahalok aat nebee nia maun sira nee halo.
3 Jacó hadomi liu José duke nia oan sira seluk, tanba nia katuas ona mak foin José moris. Nunee nia haruka suku ropa furak ida ba José.
4 Bainhira José nia maun sira haree katak sira nia aman hadomi nia liu fali sira hotu, sira odi nia, sira nunka koalia di-diak ba nia.
5 Iha kalan ida, José mehi, depois nia konta nia mehi nee ba nia maun sira, halo sira odi liu tan nia.
6 Nia hatete ba sira, “Rona lai hau nia mehi nee.
7 Hau haree ita futu hela trigu kain iha toos. Derepenti deit hau nia trigu futun hamriik, depois imi nia trigu futun sira mai haleu hau nian hodi hakruuk ba hau nia trigu futun.”
8 Rona nunee, nia maun sira hatete ba nia, “O mak atu sai liurai hodi ukun fali ami ka?” Nunee sira odi liu tan José, tanba nia mehi nee ho mos tanba nia liafuan.
9 José mehi tan. Nia konta nia mehi nee ba nia maun sira dehan, “Rona lai, hau mehi tan. Iha mehi nee loro matan, fulan ho fitun sanulu resin ida hakruuk hela ba hau.”
10 Bainhira nia konta hotu nia mehi nee ba nia aman ho nia maun sira, nia aman siak nia dehan, “O mehi saida mak nee?! Hau, o nia inan ho o nia maun-alin sira, ami hotu sei baa hodi hakruuk too rai ba o ka?”
11 Nunee nia maun sira laran moras ba nia, maibee nia aman hanoin nafatin José nia mehi nee.
José nia maun sira faan nia nudar atan
12 Iha loron ida, José nia maun sira baa hein sira nia aman nia bibi besik iha sidade Sikem.
13 Jacó hatete ba José, “O hatene katak, o nia maun sira hein hela bibi besik Sikem. Hau hakarak o baa haree sira.”
José hataan, “Diak.”
14 Jacó hatete ba nia, “O baa haree took o nia maun sira diak ka lae, no bibi sira nee oinsaa. Depois fila fali mai foo hatene hau.” Nunee Jacó haruka nia sai husi foho huun Hebron baa iha Sikem.
Bainhira José too iha nebaa,
15 iha ema ida hetan nia lao ba-mai iha rai luan. Ema nee husu, “O buka saida?”
16 José hataan, “Hau buka hau nia maun sira, sira hein bibi iha nee. Ita boot keta hatene karik, sira agora iha nebee?”
17 Ema nee hataan, “Sira sai tiha ona husi nee. Hau rona sira dehan ba malu, ‘Mai ita baa fali Dotan.’ ” Entaun José tuir nia maun sira too hetan sira besik aldeia Dotan.
18 Maibee bainhira nia sei dook, nia maun sira haree ona nia, sira kombina malu kedas atu oho nia.
19 Sira koalia ba malu dehan, “Mehi door nee mai dadauk ona.
20 Mai ita oho tiha nia hodi soe ba iha bee posu ida iha nee, depois ita dehan, animal siak mak haan ona nia. Hotu tiha mak ita haree, nia mehi sira nee sai oinsaa.”
21 Maibee bainhira Ruben rona ida nee, nia koko atu salva nia alin husi sira nia liman. Nia dehan, “Ita keta hasai nia vida.
22 Keta halo nia raan fakar, maibee soe deit nia ba iha bee posu laran iha rai fuik nee. Ita nia liman la bele kona nia.” Ruben koalia hanesan nee tanba hakarak atu salva José para lori fila fali ba nia aman.
23 Bainhira José too, nia maun sira kolu tiha nia ropa furak nebee nia hatais nee.
24 Depois sira lori nia baa soe iha bee posu laran, bee posu nee maran, bee la iha.
25 Hotu tiha sira tuur hodi haan. Sira foti ulun, sira haree kontratu nain mai husi rai Gilead. Kontratu nain sira nee ema Ismael. Sira nia kuda kamelu tula temperus, mina manas ho ai been morin atu lori baa faan iha rai Ejitu.
26 Judá hatete ba nia maun-alin sira, “Ita oho ita nia alin, depois subar fali nia raan nee, ita atu manaan saida?
27 Nia nee ita nia alin, ita raan ida deit. Diak liu ita faan deit nia ba ema Ismael sira, para ita nia liman la bele kona nia.” Nia maun-alin sira mos simu.
28 Nunee bainhira kontratu nain sira husi rai Midián nee liu, José nia maun sira dada sai nia husi bee posu, depois faan tiha nia ba ema Ismael nee ho folin osan mutin rua-nulu. Hotu tiha ema Ismael sira nee lori nia ba iha Ejitu.
29 La kleur Ruben fila fali ba bee posu nee, nia haree José la iha tiha ona, nunee nia lees tiha hena nebee nia hatais.
30 Nia fila fali ba nia alin sira hodi dehan, “Labarik nee la iha tiha ona! Agora hau atu halo saida?”
31 Depois sira oho bibi ida, foti José nia ropa, habokon parte balu ho bibi nia raan.
32 Hotu tiha sira lori fali José nia ropa furak nee baa hatudu sira nia aman hodi dehan, “Ami hetan buat ida nee. Apaa haree took, ida nee apaa nia oan nia ropa ka lae?”
33 Haree nunee Jacó hatene kedas. Nia hatete, “Nee hau nia oan nian duni. Animal siak ruma mak lees mate tiha ona nia hodi haan nia.”
34 Jacó lees tiha hena nebee nia hatais hodi hatais fali hena lutu. Nia lutu kleur loos ba nia oan.
35 Nia oan feto ho oan mane mai hotu hodi hamaus nia atu la bele tristi, maibee nia lakohi rona. Nia dehan “Lae, hau sei lutu nafatin too hau tama rai kuak hodi hasoru hau nia oan.” Nunee Jacó kontinua tanis nafatin ba nia oan.
36 Iha tempu nee, ema Midián sira too ona iha Ejitu. Iha nebaa sira faan tiha José ba liurai nia funsionariu ida naran Potifar. Nia mak xefi seguransa iha liurai nia palasiu.