38
Judá ho nia feto foun Tamar
1 Iha tempu nebaa, Judá husik hela nia maun-alin sira hodi tuun baa hela ho ema ida naran Hirah husi sidade Adulam.
2 Iha fatin nee nia hasoru feto Kanaán ida, nia aman naran Suá. Judá kaben ho feto nee hodi moris hamutuk ho nia.
3 Nia feen isin rua, nia tuur ahi oan mane ida naran Er.
4 Nia isin rua tan, nia tuur ahi oan mane ida, nia foo naran Onan.
5 Depois nia tuur ahi tan oan mane ida, nia foo naran Sela. Momentu nee sira hela iha rai Kesibe.
6 Bainhira nia oan mane boot Er idade too atu hola feto, Judá hili feto ida naran Tamar para kaben ho nia.
7 Maibee Judá nia oan mane boot Er nee, nia hahalok aat iha NAI Maromak nia oin, entaun NAI oho tiha nia. Nee mak Er mate, oan la iha.
8 Entaun Judá hatete ba Onan, “O tenki hola fali o nia maun nia feen. Tanba tuir ita nia lisan o iha obrigasaun ba o nia kunhada nee, para foo jerasaun ba o nia maun.”
9 Maibee Onan hatene katak, se sira iha oan karik, oan nee laos ninian maibee sai fali nia maun nian. Entaun bainhira nia toba hamutuk ho nia maun nia feen, nia sempre fakar deit iha liur para la bele foo jerasaun ba nia maun.
10 NAI Maromak haree Onan nia hahalok nee la diak, entaun NAI oho tan nia.
11 Nunee Judá tauk, keta halo be Sela hola fali Tamar, Sela mos mate tan hanesan ho nia maun sira. Entaun Judá hatete ba nia feto foun Tamar dehan, “O baa hela lai iha o nia aman nia uma hodi moris hanesan feto faluk. Hein too hau nia oan Sela nia tinan too atu kaben mak o mai fali.” Nunee Tamar fila fali baa hela iha nia aman nia uma.
12 Too loron ida Judá nia feen mate, nia nee Suá nia oan feto. Bainhira Judá nia tempu lutu hotu ona, nia baa aldeia Timna hamutuk ho nia kolega Hirah ema Adulam nee, atu haree ema sira nebee mak tesi nia bibi malae nia fulun iha nebaa.
13 Iha ema foo hatene ba Tamar dehan, “O nia banin mane agora iha dalan atu baa Timna hodi tesi nia bibi malae nia fulun.”
14 Tamar hatene katak Sela mane klosan ona, maibee Judá seidauk hataan para sira nain rua kaben. Entaun nia troka tiha nia ropa faluk nian, nia foti veo hodi taka nia ulun para ema la bele konhese nia. Depois nia baa tuur iha portaun sidade Enaim husi dalan ninin atu ba Timna nian.
15 Bainhira Judá liu husi nebaa, nia haree Tamar, nia hanoin Tamar nee feto luroon ida, tanba Tamar taka nia oin,
16 nia la hatene katak, feto nee nia feto foun. Nunee nia baa besik hodi dehan, “Mai, hau hakarak toba ho o.”
Tamar husu, “Ita boot atu foo saida ba hau se karik ita boot toba ho hau?”
17 Judá hataan, “Hau sei haruka ema lori hau nia bibi oan ida hodi foo ba o.”
Tamar hataan fali, “Naran katak ita boot rai hela buat ruma hanesan pinoor too ita boot haruka bibi oan nee mai.”
18 Judá husu, “O hakarak hau foo pinoor saida?”
Tamar hataan, “Ita boot nia karimbu ho nia talin, ho mos ai tonka nebee ita kaer nee.” Entaun Judá foo sasaan sira nee ba nia, depois toba ho nia. Ho nunee Judá halo Tamar isin rua.
19 Bainhira Tamar sai husi fatin nee, nia hasai kedas nia veo hodi hatais fila fali nia ropa faluk nian.
20 Hotu tiha Judá husu ajuda ba nia kolega ema Adulam nee hodi lori bibi oan ba feto nee para foti fila fali nia pinoor. Maibee nia kolega nee baa, la hetan feto nee.
21 Entaun nia husu ba ema sira nebee mak hela iha nebaa, “Feto luroon nian nee iha nebee? Foin dadauk nia tuur iha dalan ninin Enaim nian nee.”
Sira hataan, “Feto luroon iha nee la iha.”
22 Nunee nia fila fali baa foo hatene Judá dehan, “Hau la hetan feto nee. Ema sira nebee hela iha nebaa mos dehan, ‘Feto luroon iha nee la iha.’ ”
23 Judá hatete, “Sasaan sira nee husik nia rai ba. Se ita buka feto nee nafatin, ema bele hamnasa fali ita. Hau haruka duni bibi oan nee ba nia, maibee ita boot baa, la hetan nia.”
24 Liu tiha fulan tolu hanesan nee, ema foo hatene ba Judá dehan, “Ita boot nia feto foun Tamar halo aan hanesan feto aat, agora nia isin rua ona.”
Rona nunee, Judá dehan, “Lori nia sai mai hodi sunu mate tiha nia!”
25 Bainhira sira lori Tamar sai dadauk, Tamar haruka lia menon ba nia banin mane dehan, “Sasaan hirak nee nia nain mak halo hau isin rua.” Nia hatutan dehan, “Revista took, karimbu ho nia talin ho ai tonka nee see nian?”
26 Judá haree sasaan hirak nee, nia hatene katak sasaan nee ninian. Entaun nia dehan, “Nia nee loos, hau mak sala, tanba hau la foo hau nia oan Sela para kaben ho nia.” Judá la toba tan ho Tamar.
27 Too tempu Tamar atu partu, iha bebee mane kaduak iha nia kanotak.
28 Bainhira nia tuur ahi, bebee ida nia liman sai uluk. Parteira foti kabas mean kesi ba bebee nia liman nee hodi dehan, “Ida nee mak sai mai uluk.”
29 Maibee bebee nee dada fila fali nia liman, bebee ida seluk mak sai mai. Haree nunee parteira dehan, “O forti tebes, too o bele sena aan sai mai uluk!” Nunee Judá hanaran nia Perez.
30 Hotu tiha foin bebee ida nebee iha kabas mean kesi iha nia liman nee sai mai. Entaun Judá hanaran nia Zerá.