39
José ho Potifar nia kaben
1 Tempu nebaa José iha ona rai Ejitu. Ema Ismael sira nebee sosa nia nee lori nia baa faan tutan fali ba funsionariu ida naran Potifar, nia nee liurai Ejitu nia xefi seguransa.
2 José hela iha nia patraun ema Ejitu nee nia uma. NAI Maromak hamutuk ho nia, entaun nia halo saida deit sempre hetan susesu.
3 Nia patraun haree katak, NAI Maromak hamutuk ho José no NAI halo nia hetan susesu iha buat hotu-hotu nebee mak nia halo.
4 Nee mak nia patraun gosta nia too tau nia nudar nia asistente. Patraun foti nia toma konta ninia uma laran tomak, no foo fiar ba nia atu tau matan ba buat hotu nebee mak patraun iha.
5 Hahuu kedas patraun foti José toma konta nia uma laran ho nia riku-soin hotu, NAI Maromak foo bensaun ba ema Ejitu nee nia uma kain, tanba NAI hanoin José. NAI foo bensaun ba patraun nia riku-soin hotu, iha uma laran ho mos iha toos.
6 Nunee patraun entrega tiha buat hotu-hotu ba José nia liman laran atu tau matan. Tanba José mak toma konta buat hotu-hotu, entaun patraun la preokupa tan ona buat ida, nia so hanoin mak haan deit.
José nee nia isin kapaas no bonitu.
7 La kleur patraun nia feen fihir tu-tuir José hodi dehan, “Mai toba ho hau!”
8 Maibee José lakohi. Nia hatete ba nia patraun nia feen dehan, “Agora patraun la preokupa tan buat ida iha uma nee, tanba nia foo ona responsabilidade hotu-hotu mai hau. Buat hotu-hotu nebee nia iha, nia entrega ona iha hau nia liman laran.
9 Iha uma nee la iha ema ida mak boot liu hau. Patraun entrega ona buat hotu-hotu ba hau, so senhora deit mak lae, tanba senhora patraun nia kaben. Agora, oinsaa mak hau bele halo buat aat ida nee? Nee sala boot hasoru Maromak!”
10 Maski patraun nia feen loro-loron hamaus beibeik José para toba ho nia, maibee José nunka simu, atu besik deit senhora nee mos nia lakohi.
11 Iha loron ida, José tama ba uma laran atu halo nia servisu, atan sira seluk la iha.
12 Patraun nia feen baa kaer tiha José nia faru hodi dehan, “Mai toba ho hau!” Maibee José husik hela nia faru iha senhora nee nia liman hodi halai sai ba liur.
13 Bainhira senhora haree katak, José husik tiha nia faru iha senhora nia liman hodi halai sai ba liur,
14 nia bolu nia atan sira seluk nebee servisu iha nia uma laran nee. Nia dehan ba sira, “Haree ba, hau nia laen lori ema Ebreu nee mai iha nee atu halo moe ita. Ema Ebreu nee ohin tama iha uma atu toba ho hau, maibee hau hakilar makaas.
15 Bainhira nia rona hau hakilar, nia husik hela nia faru iha hau nia sorin hodi halai sai husi uma laran.”
16 Senhora nee rai hela José nia faru nee iha nia sorin too José nia patraun fila.
17 Depois nia konta fila fali ba nia laen nee dehan, “Atan Ebreu nebee ita boot lori mai nee ohin tama mai atu hamoe hau.
18 Maibee hau hakilar makaas hodi husu tulun, nia husik kedas nia faru iha hau nia sorin hodi halai sai ba liur.”
19 Senhora nee hatutan dehan, “Ida nee mak ita boot nia atan halo ba hau.” Bainhira José nia patraun rona nia feen nia liafuan nee, nia laran nakali.
20 Nia lori José baa hatama iha kadeia nebee baibain liurai sulan nia ema dadur sira.
José hela nafatin iha kadeia nee.
21 Maibee NAI Maromak hamutuk ho nia. NAI hatudu laran diak ba nia hodi halo xefi kadeia gosta nia.
22 Nunee xefi entrega tiha dadur sira hotu iha kadeia nee ba iha José nia liman, José mak toma konta servisu hotu-hotu iha kadeia laran.
23 Xefi la preokupa ona kona ba buat hotu nebee nia entrega tiha ona ba José nia liman, tanba NAI Maromak hamutuk ho José. Entaun nia halo saida deit, sempre lao ho diak.