40
José siik ema dadur sira nia mehi
1 Tempu lao dadauk, liurai nia servidor tua ho nia padeiru, sira nain rua halo sala hasoru sira nia patraun liurai Ejitu nee.
2 Liurai hirus nia funsionariu nain rua nee
3 hodi hatama sira ba iha kadeia nebee mak xefi seguransa palasiu nian tau matan. José mos kastigu hela iha kadeia nee.
4 Xefi seguransa entrega sira nain rua ba José, nunee José mak tau matan ba sira.
Sira nain rua dadur kleur iha nebaa.
5 Too iha kalan ida, liurai nia servidor tua ho nia padeiru nee, sira nain rua mehi iha kadeia laran. Sira nia mehi nee nia signifikadu keta-ketak.
6 Iha dadeer-saan, José baa atu haree sira, nia haree sira laran susar hela.
7 Entaun nia husu liurai nia funsionariu nain rua nebee kastigu hamutuk ho nia iha nia patraun nia kadeia nee dehan, “Tanba saa mak ohin loron imi nia oin tristi loos?”
8 Sira hataan, “Hori kalan ami nain rua mehi, maibee la iha ema ida mak bele siik mehi nee.”
José hataan, “Maromak deit mak bele esplika mehi nia signifikadu. Imi konta took imi nia mehi mai hau.”
9 Entaun liurai nia servidor tua nee konta nia mehi ba José. Nia dehan, “Iha mehi nee hau haree uvas huun ida iha hau nia oin,
10 uvas nee iha sanak tolu. Sanak tolu nee, nia dikin foin moris, funan kedas, la kleur iha uvas fuan nebee tasak.
11 Iha momentu nee hau kaer hela liurai nia kopu. Hau kuu uvas fuan nee, buti sai nia been ba iha kopu laran, depois entrega ba iha liurai nia liman.”
12 José hatete ba nia, “Mehi nee nia signifikadu mak nee. Ai sanak tolu nee katak loron tolu.
13 Iha loron tolu nia laran, liurai sei foti o nia ulun no sei entrega fila fali o nia knaar ida uluk. Nunee o sei tau liurai nia kopu ba nia liman laran hanesan uluk o halo bainhira sei toma konta liurai nia tua.
14 Maibee bainhira o moris diak ona, keta haluha hau. Hatudu o nia laran diak mai hau hodi foo hatene hela ba liurai para hasai tiha hau husi kadeia nee.
15 Tanba uluk ema naok tiha hau husi Ebreu sira nia rain. Agora hau iha rai nee mos, hau la halo buat aat ruma maibee ema sulan hau ba iha rai kuak nee.”
16 Liurai nia padeiru haree katak, José siik mehi nee ho signifikadu ida nebee diak. Entaun nia dehan ba José, “Hau mos mehi. Hau tutur hela lafatik tolu, ida-idak ho paun iha laran.
17 Lafatik nebee iha leten liu iha paun ho dosi diak nian oi-oin atu foo ba liurai, maibee manu fuik sira mai haan tiha paun ho dosi hirak nee husi lafatik nebee mak hau tutur dadauk.”
18 José hataan, “Mehi nee nia signifikadu nunee. Lafatik tolu nee katak loron tolu.
19 Iha loron tolu nia laran, liurai sei foti sai tiha o nia ulun, o nia isin lolon nia sei tara iha ai huun ida. Depois manu fuik mai haan tiha o nia isin.”
20 Too iha loron tolu, liurai halo tinan, nia halo festa hodi konvida nia funsionariu sira hotu. Nia foo orden atu lori nia servidor tua ho nia padeiru mai iha funsionariu sira hotu nia oin.
21 Depois liurai foti nia servidor tua nee hodi entrega fila fali nia knaar, para nia tau fali liurai nia kopu ba liurai nia liman hanesan uluk.
22 Maibee nia padeiru nee, liurai tara mate tiha. Nee hanesan lo-loos José foo hatene tiha antes.
23 Maski nunee, liurai nia servidor tua nee la hanoin tan José, nia haluha tiha.