41
José siik liurai Ejitu nia mehi
1 Liu tiha tinan rua, liurai Ejitu mehi. Iha nia mehi nee, nia hamriik hela iha mota Nil nia ninin.
2 Derepenti karau inan hitu nebee isin diak no bokur sai mai husi mota, depois haan duut iha mota ninin.
3 Iha tan karau inan hitu sai husi mota Nil, maibee karau hirak nee mesak isin aat no krekas maran. Karau nee mai hamriik iha mota ninin hamutuk ho karau bokur hitu nee.
4 Depois karau isin aat no krekas nee haan tiha karau hitu nebee isin diak no bokur. Hotu tiha liurai hakfodak hadeer tiha.
5 La kleur liurai toba fila fali, nia mehi tan. Iha nia mehi nee, nia haree trigu fulin hitu isin nakonu di-diak no kapaas, sai husi trigu kain ida.
6 Iha tan trigu fulin hitu mosu mai, maibee trigu fulin hirak nee isin la iha no namlaik tiha ona tanba anin manas husi lorosae mak kona.
7 Depois trigu fulin hitu nebee isin la iha nee tolan tiha hotu trigu fulin hitu nebee isin nakonu di-diak. Hotu tiha liurai hakfodak hadeer. Nee mak foin nia hatene katak, afinal ida nee mehi.
8 Iha dadeer-saan liurai senti la hakmatek, entaun nia haruka halibur matan-dook ho matenek nain sira hotu iha rai Ejitu tomak. Depois nia konta nia mehi nee ba sira, maibee la iha ema ida mak bele siik.
9 Too ikus liurai nia servidor tua hatete ba liurai, “Agora hau hanoin hetan fali hau nia sala.
10 Uluk liurai hirus ami ata, liurai kastigu hau iha kadeia ida nebee mak xefi seguransa tau matan ba nee, hamutuk ho liurai nia padeiru.
11 Iha kalan ida, ami nain rua mehi. Ami nia mehi nee nia signifikadu keta-ketak.
12 Iha mos joven Ebreu ida hamutuk ho ami iha kadeia, nia nee xefi seguransa nia atan. Ami konta ami nia mehi ba nia, depois nia siik ami nia mehi ida-ida.
13 Hotu-hotu akontese tuir lo-loos buat nebee nia hatete. Liurai entrega fila fali hau nia knaar ida uluk, maibee funsionariu ida seluk liurai tara mate tiha.”
14 Rona nunee, liurai haruka ema baa lori José mai. Sira hasai lalais José husi kadeia. José koi nia hasan rahun, troka tiha nia hena, depois baa hasoru liurai.
15 Liurai dehan, “Foin dadauk hau mehi, la iha ema ida mak bele siik. Maibee hau rona katak, bainhira o rona ema konta nia mehi, o hatene siik.”
16 José hataan, “Hau la bele halo ida nee, maibee Maromak sei foo resposta para liurai bele laran hakmatek.”
17 Liurai konta ba José, “Iha hau nia mehi nee, hau hamriik hela iha mota Nil nia ninin.
18 Derepenti karau inan hitu nebee bokur no isin diak sai mai husi mota, depois haan duut iha mota ninin.
19 Iha tan karau inan hitu sai husi mota Nil, maibee karau hirak nee kulit taka ruin, isin aat teb-tebes no krekas maran. Iha Ejitu tomak, hau nunka haree karau isin aat hanesan nee.
20 Depois karau krekas no isin aat nee haan tiha karau hitu primeiru nebee bokur nee.
21 Maski karau krekas nee haan tiha karau isin diak sira nee hotu, maibee haree ba hanesan deit, isin aat nafatin. Hotu hau hakfodak hadeer tiha.
22 Hau mehi tan. Iha mehi nee, hau haree trigu fulin hitu isin nakonu no kapaas, moris iha trigu kain ida.
23 Depois iha tan trigu fulin hitu mosu mai, maibee trigu fulin hirak nee mamuk, isin la iha no namlaik tiha tanba anin manas husi lorosae mak kona.
24 Depois trigu fulin hitu nebee isin la iha nee tolan tiha trigu diak fulin hitu nee. Hau konta ona hau nia mehi nee ba ema matan dook sira, maibee la iha ida mak bele siik.”
25 José hatete, “Liurai nia mehi rua nee nia signifikadu ida deit. Maromak hatudu ona ba liurai kona ba buat nebee mak Nia atu halo.
26 Karau hitu nebee isin diak nee signifika tinan hitu, trigu fulin hitu nebee diak mos tinan hitu. Mehi rua nee ida deit.
27 Karau krekas no isin aat nebee sai mai ikus nee signifika tinan hitu. Trigu fulin hitu nebee mamuk no namlaik tanba anin lorosae nee mos tinan hitu. Durante tinan hitu nee nia laran rai sei hamlaha.
28 Nunee Maromak hatudu ba liurai saida mak Maromak atu halo ona, hanesan ohin hau dehan.
29 Iha tinan hitu nia laran Ejitu tomak sei hetan ai haan barak teb-tebes.
30 Hotu tiha tinan hitu tuir mai, rai sei hamlaha boot too estraga rai tomak. Nunee ema sei haluha tiha Ejitu nia diak uluk.
31 Rai hamlaha sei todan teb-tebes halo ema la hanoin tan tempu rai diak uluk nebee sira iha ai haan barak.
32 Liurai hetan mehi too dala rua nee hodi hatudu katak Maromak hakotu tiha ona atu halo nunee, la kleur tan Nia sei halo.
33 Nee duni agora, diak liu liurai buka ema ida nebee matenek no hatene tetu situasaun, depois foti nia hodi toma konta rai Ejitu.
34 Liurai mos hili administrador iha fat-fatin para halibur ai haan husi povu Ejitu sira. Durante tinan hitu nebee iha ai haan barak nee, povu tenki hatama rezultadu toos parte ida husi parte lima ba administrador sira.
35 Iha tinan hirak nee, administrador sira tenki halibur ai haan. Sira tenki rai iha armazen iha sidade ida-idak hodi liurai nia naran, no hein halo di-diak.
36 Too tempu rai hamlaha nebee sei akontese iha Ejitu durante tinan hitu nia laran mak foin ema bele haan ai haan nee. Nunee povu la mate hamlaha.”
Liurai foti José atu ukun rai Ejitu
37 Sujestaun nebee José hatoo nee monu ba liurai ho nia funsionariu sira nia laran.
38 Entaun liurai hatete ba nia funsionariu sira dehan, “Ema nee, Maromak nia Espiritu iha hela nia. Ita atu hetan tan ema seluk hanesan nia iha nebee?”
39 Depois liurai dehan ba José, “Maromak foo hatene ona buat sira nee hotu ba ita boot, nunee la iha ema ida mak matenek no hatene tetu situasaun hanesan ita boot.
40 Nee duni ita boot sei sai hau nia visi. Hau nia reinu tomak sei kumpri ita boot nia orden. So hau mesak deit mak boot liu ita, tanba hau mak liurai.”
41 Entaun liurai deklara, “Agora hau foti ita boot para toma konta rai Ejitu tomak.”
42 Depois nia hasai nia kadeli liurai nian husi nia liman fuan hodi tau fali ba iha José nia liman fuan. Nia foo hatais José ho hena diak nian, no tara korenti osan mean ba José nia kakorok.
43 Hotu tiha nia haruka José sae kuda kareta nebee baibain nia visi deit mak sae. Iha ema halai uluk hodi hakilar dehan, “Loke dalan!” Ho nunee liurai foti José hodi toma konta Ejitu tomak.
44 Liurai hatete ba José, “Hau mak liurai. Maibee ema iha Ejitu tomak la bele halo buat ida se ita boot la foo lisensa uluk.”
45 Depois liurai foo naran foun ida ba José, Safnat-Panea. Nia mos foo kaben José ho feto ida naran Asenat, nia aman Potifera, nai lulik sidade On nian. Ida nee mak istoria kona ba José komesa toma konta rai Ejitu.
46 Bainhira José sai liurai Ejitu nia visi, nia idade tinan tolu-nulu. Simu tiha knaar nee, nia sai husi liurai nia prezensa hodi lao haleu rai Ejitu tomak.
47 Durante tinan hitu nia laran, rai nee hetan ai haan barak teb-tebes.
48 Iha tinan hitu nebee toos foo rezultadu diak nee, José halibur ai haan hotu hodi rai iha armazen iha sidade. Sidade ida-idak rai ai haan husi nia rejiaun rasik.
49 Ai haan nebee José halibur nee barak teb-tebes hanesan rai henek iha tasi ibun, too nia la hakerek tan ona tanba sura la bele.
50 Tempu hamlaha seidauk too, José nia kaben Asenat, Potifera nia oan nee kous ona sira nia oan mane nain rua.
51 José hanaran nia oan mane boot Manassés, tanba nia dehan, “Maromak halo hau haluha ona hau nia terus uluk, Nia halo hau la hanoin tan hau nia aman nia uma kain.”
52 Oan mane segundu, nia hanaran Efraim, tanba nia dehan, “Iha rai nebee mak hau hetan terus nee, Maromak halo hau iha oan.”
53 Tinan hitu nebee Ejitu iha ai haan barak nee too ona nia rohan.
54 Depois tama ba tinan hitu rai hamlaha, tuir José uluk hatete tiha ona. Iha rai sel-seluk ema hamlaha, maibee iha Ejitu laran tomak, hahaan sei iha.
55 Tempu lao dadauk povu Ejitu iha nebee-nebee komesa hamlaha, sira halerik hodi husu ai haan ba liurai. Entaun liurai hatete ba povu Ejitu tomak dehan, “Imi baa hasoru José. Nia haruka halo saida deit, imi halo tuir.”
56 Tanba rai hamlaha makaas loos ona iha Ejitu laran tomak, entaun José loke tiha armazen hodi faan ai haan nee ba ema Ejitu sira.
57 Ema husi nasaun sel-seluk mos baa iha Ejitu hodi sosa ai haan husi José, tanba rai hamlaha makaas iha mundu tomak.