43
José nia maun sira baa fali Ejitu ho Benjamim
1 Iha tempu nebaa rai hamlaha makaas nafatin.
2 Bainhira ai haan nebee mak Jacó nia oan sira lori husi Ejitu hotu ona, sira nia aman hatete ba sira, “Baa fali sosa tan ai haan uitoan ba ita.”
3 Maibee Judá hataan, “Senhor nee eziji ona katak, se ami la lori ami nia alin baa, ami la bele haree tan senhor nee nia oin.
4 Se apaa husik ami nia alin tuir, entaun ami bele baa sosa ai haan ba ita.
5 Maibee se apaa la hataan nia tuir, ami mos la baa, tanba senhor nee hatete ona ba ami katak, se ami la lori ami nia alin baa, ami la bele haree tan senhor nee nia oin.”
6 Jacó husu, “Nusaa mak imi foo hatene fali senhor nee dehan, imi sei iha alin ida tan? Nee imi halo susar fali hau.”
7 Sira hataan, “Senhor nee litik ami kona ba ami nia aan ho ami nia familia. Nia husu dehan, ‘Imi nia aman sei moris ka? Imi sei iha tan alin mane ka?’ Entaun ami mos hataan loos deit ona. Ami la hatene katak nia atu haruka ami lori ami nia alin baa nebaa.”
8 Depois Judá hatete ba nia aman dehan, “Husik labarik nee tuir hau para ami bele baa ona, atu nunee apaa ho ami ho mos ami nia oan sira bele moris, la mate hamlaha.
9 Hau mak garantia nia moris. Se buat ruma akontese ba nia, apaa bele tau todan mai hau. Se hau la lori nia fila fali mai entrega ba apaa, entaun nia todan nee husik hau mak lori too mate.
10 Se uluk kedas apaa foo lisensa, ami ba-mai dala rua tiha ona.”
11 Depois sira nia aman dehan ba sira, “Se la iha dalan seluk, entaun halo nunee: Imi baa lori ho sasaan diak nian iha rai nee hatama ba iha imi nia karoon nudar prezenti ba senhor nee. Lori ai been morin uitoan, bani been uitoan, temperus, aimoruk pomada, kaijú ho kiar.
12 Imi tenki lori osan mutin atu sosa ai haan ho mos atu selu fali osan mutin nebee mak uluk ema tau fali iha imi nia karoon ibun. Keta sira tau sala karik.
13 Lori ho imi nia alin baa kedas hodi hasoru fali senhor nee.
14 Hau harohan atu Maromak Kbiit Nain halo senhor nee hatudu laran luak ba imi, atu nunee nia bele husik imi nia maun ho mos Benjamim fila fali mai hamutuk ho imi. Maibee se karik hau tenki lakon hau nia oan sira nee mos, pasiensia deit ona.”
15 Nunee sira lori prezenti hirak nee ho osan mutin barak liu fali uluk nian dala rua, sira lori mos Benjamim hodi lao ba rai Ejitu. Too iha nebaa sira aprezenta aan ba José.
16 Bainhira José haree Benjamim hamutuk ho sira, nia haruka senhor ida nebee toma konta nia uma laran dehan, “Lori ema sira nee ba hau nia uma, depois oho animal ida hodi tein, tanba orsida meudia sira sei haan hamutuk ho hau.”
17 Ema nee halo tuir José nia orden, nia lori sira ba iha José nia uma.
18 Bainhira nia lori dadauk sira ba José nia uma, sira tauk hodi dehan ba malu, “Keta ema nee lori ita mai iha nee tanba osan mutin nebee uluk ema tau fila fali iha ita nia karoon karik. Keta halo be nia atu ataka ita derepenti hodi kaer ita, depois nia halo ita sai atan no hadau ita nia kuda buru.”
19 Entaun too iha portaun oin, sira hakbesik aan ba José nia ema nee
20 hodi dehan, “Deskulpa senhor, uluk ami mai iha nee hodi sosa ai haan.
21 Bainhira ami fila, ami too iha fatin deskansa kalan nian, ami loke ami nia karoon, hetan fali ami nia osan mutin kompletu iha ida-idak nia karoon ibun. Agora ami lori fila fali osan nee mai.
22 Ami la hatene tuir, see mak tau fila fali osan nee ba iha ami nia karoon laran. Agora ami mos lori tan osan ketak atu sosa ai haan.”
23 Ema nee hataan, “Kalma, keta tauk. Imi nia osan nee hau simu duni. Maromak ida nebee imi ho imi nia aman adora, Nia mak tau riku-soin nee iha imi nia karoon laran.” Hotu tiha ema nee lori Simeão sai mai hodi entrega fali ba sira.
24 Bainhira ema nee lori sira baa tama tiha José nia uma laran, nia foo bee ba sira fase sira nia ain. Nia mos foo haan sira nia kuda buru.
25 Depois sira prepara sira nia prezenti atu foo ba José iha meudia, tanba sira rona katak, sira atu haan meudia hamutuk ho José iha nebaa.
26 Bainhira José too iha uma, sira oferese prezenti nebee sira lori nee foo ba José iha uma laran, sira mos hakneak hakruuk too rai iha nia oin.
27 José husu tuir sira nia kondisaun. Nia husu tan, “Uluk imi konta mai hau kona ba imi nia apaa katuas nee. Nia diak ka lae? Nia sei moris ka lae?”
28 Sira hataan, “Ita boot nia atan ami nia aman nee sei moris, nia diak hela.” Depois sira hakruuk hodi hatudu respeitu ba nia.
29 José foti matan, nia haree nia alin Benjamim, sira nain rua inan ida deit. José husu, “Nee mak imi nia alin ikun uluk imi konta ba hau nee ka?” Nia dehan ba Benjamim, “Oan, Maromak hatudu Nia laran luak ba o.”
30 Bainhira José haree nia alin, nia hanoin loos, entaun nia sai lalais husi fatin nee tanba nia tahan la bele ona. Nunee nia tama iha nia kuartu laran hodi tanis iha nebaa.
31 Tanis hotu, nia fase tiha nia oin hodi sai fali. Nia domina aan hodi dehan ba nia atan sira, “Lori hahaan mai.”
32 Atan sira tau meza ida ba José para haan mesak. Nia maun-alin sira iha meza seluk. Ema Ejitu sira nebee atu haan hamutuk ho nia mos iha sira nia meza ketak, tanba ema Ejitu hakribi atu haan hamutuk ho ema Ebreu.
33 Tuur fatin nebee prepara ona ba José nia maun-alin sira see oin ba nia. Depois José hatudu fatin ba sira ida-idak tuur tuir sira nia tinan, hahuu husi maun boot too alin ikun. Haree nunee, sira hakfodak hodi hateke ba malu.
34 Atan sira foti hahaan husi José nia meza lori baa serbi sira ida-idak. Benjamim simu ai haan barak liu sira seluk dala lima. Nunee sira haan-hemu hamutuk ho nia too kontenti teb-tebes.