44
José koko nia maun sira
1 Hotu tiha José haruka senhor nebee toma konta nia uma laran nee dehan, “Enxe ai haan ba ema sira nee nia karoon tuir sira nia forsa para bele lori, depois hatama fila fali sira ida-idak nia osan mutin ba sira nia karoon ibun.
2 Hatama mos hau nia kopu osan mutin ba iha sira nia alin ikun nia karoon ibun hamutuk ho osan nebee nia lori atu sosa ai haan.” Ema nee mos halo tuir buat nebee José haruka.
3 Iha aban dadeer-saan loro matan atu sae, José husik sira fila ho sira nia kuda buru.
4 Sira sai seidauk lao dook husi sidade, José haruka senhor nebee toma konta nia uma laran nee dehan, “O baa duni tuir ema sira nee. Bainhira o toman sira, dehan ba sira, ‘Nusaa mak imi selu ema nia diak ho hahalok aat?
5 Nusaa mak imi naok fali hau nia patraun nia kopu osan mutin? Kopu nee hau nia patraun uza laos hodi hemu deit, maibee nia mos uza hodi siik ema nia futuru. Imi nia hahalok nee aat teb-tebes!’ ”
6 Nunee bainhira senhor nee toman sira, nia koalia ba sira tuir José nia liafuan ohin nee.
7 Sira hataan, “Tanba saa mak nai koalia nunee? Atan ami nunka hanoin atu halo buat aat ida hanesan nee!
8 Osan nebee uluk ami hetan iha ami nia karoon ibun, foin lalais ami fila husi rai Kanaán mai, ami foo fali ona ba ita boot. Halo nusaa mak ami atu naok fali osan mutin ka osan mean iha ita boot nia patraun nia uma?
9 Se karik ita boot hetan kopu nee iha atan ami ida, ema nee la bele moris, no ami sira seluk sai nai nia atan deit.”
10 Senhor nee hataan, “Entaun diak, ita halo tuir imi nia liafuan. Maibee hau hetan kopu nee iha see, nia mak sai hau nia atan, imi sira seluk baa ho livre.”
11 Nunee sira ida-idak hatuun lalais sira nia karoon hodi loke.
12 Depois senhor nee revista karoon ida-idak, hahuu husi maun boot nian too alin ikun nian. Too ikus nia hetan kopu nee iha Benjamim nia karoon.
13 Haree nunee, sira lees tiha hena nebee sira hatais, depois sira tula fali naha ba kuda buru hodi fila fali ba sidade.
14 Bainhira Judá ho nia maun-alin sira too José nia uma, José sei iha. Sira hakneak hakruuk too rai iha nia oin.
15 José hatete ba sira, “Imi halo saida mak nee?! Tuir loos imi hatene katak, ema hanesan hau nee bele siik buat saida deit mak ema halo subar.”
16 Judá hataan, “Ami atu koalia oinsaa ba nai? Ami atu dehan saida? Oinsaa mak ami bele hatudu katak, ami nee la sala? Maromak hatudu sai ona sala nebee ami ata uluk halo. Nai nia kopu ohin hetan iha alin nia karoon laran. Agora husik ami hotu sai nai nia atan deit ona hamutuk ho alin nee.”
17 Maibee José hataan, “Lae, hau nunka atu halo hanesan nee. Ohin hetan kopu nee iha see nia karoon, nia deit mak sai hau nia atan. Imi sira seluk fila fali ba imi nia aman ho hakmatek.”
18 Depois Judá baa besik José hodi dehan, “Kolisensa nai, atan hau hakarak atu hatoo netik liafuan ruma ba nai. Keta hirus hau ata, maski ita boot nia kbiit hanesan fali liurai Ejitu rasik.
19 Uluk nai husu ami ata dehan, ‘Imi nia aman sei iha ka? Imi iha tan alin ruma ka?’
20 Ami hataan, ‘Ami nia aman katuas ona. Ami mos iha alin mane ida, ami nia aman katuas ona mak foin alin nee moris. Nia inan iha oan mane nain rua deit, ida boot mate ona, agora hela nia mesak deit. Entaun nia aman hadomi liu nia.’
21 Depois ita boot hatete ba ami ata dehan, ‘Lori nia mai, hau hakarak haree rasik nia.’
22 Ami hataan ba nai dehan, ‘Labarik nee la bele dook husi nia aman. Se nia dook husi nia aman, nia aman bele mate.’
23 Maibee ita boot hatete ba atan ami, ‘Se imi la lori imi nia alin ikun mai, imi sei la haree tan hau nia oin.’
24 Tempu nebaa ami fila ba hau ata nia aman, ami hatoo nai nia liafuan nee ba nia.
25 Too loron ida, ami nia aman dehan, ‘Fila fali baa hodi sosa tan ai haan uitoan.’
26 Maibee ami hataan, ‘Ami la bele baa. Se ami nia alin ikun tuir mak foin ami bele baa. Se ami nia alin ikun la tuir, ami la bele haree tan senhor nee nia oin.’
27 Hau ata nia aman dehan ba ami, ‘Imi hatene katak, hau nia kaben kous oan mane nain rua.
28 Ida baa husik ona hau. Momentu nebaa hau dehan, keta animal siak ruma mak haan ona. Too ohin loron hau la haree ona nia.
29 Se imi lori tan labarik nee dook husi hau mak buat ruma akontese ba nia, nee imi halo hau ida be fuuk mutin nee tama ona rate ho laran dodok.’
30 Agora, se hau fila ba hau ata nia aman mak labarik nee la hamutuk ho ami, nee oinsaa loos? Labarik nee mak hau nia aman nia iis.
31 Se hau nia aman haree labarik nee la iha, nia bele mate. Nee ami halo ami ata nia aman ida be fuuk mutin nee tama ona rate ho laran susar.
32 Atan hau promete ona ba hau nia aman katak, se hau la lori nia fila fali baa hodi entrega ba hau nia aman, entaun nia todan nee husik hau mak lori too mate.
33 Nee duni, se bele karik, atan hau mak hela iha nee sai nai nia atan hodi troka fali labarik nee. Husik nia fila ho nia maun sira.
34 Oinsaa mak hau bele fila se labarik nee la hamutuk ho hau? La bele! Hau sei la tahan hodi haree hau nia aman hetan terus hanesan nee.”