45
José deklara nia aan
1 José la bele kontrola tan nia aan iha nia atan sira nia oin, entaun nia hakilar, “Imi hotu sai husi nee!” Bainhira nia atan sira nee sai hotu ona mak foin nia deklara nia aan ba nia maun-alin sira.
2 Nia tanis hakilar makaas loos too ema Ejitu sira iha liur rona. Liurai Ejitu nia uma laran mos rona kona ba ida nee.
3 José foo hatene ba nia maun-alin sira, “Hau nee José. Hau nia aman sei moris ka?” Maibee sira la hataan buat ida, tanba sira tauk teb-tebes nia.
4 Depois José dehan ba sira, “Mai besik hau.” Bainhira sira baa besik, nia dehan, “Hau nee imi nia alin José, ida nebee uluk imi faan ba kontratu nain sira iha dalan atu mai iha Ejitu.
5 Maibee keta laran susar, keta foo sala imi nia aan tanba imi faan hau. Afinal Maromak mak haruka hau mai uluk iha nee atu salva ema nia moris.
6 Agora rai hamlaha tinan rua ona, sei iha tan tinan lima. Durante tinan lima nee ema la fila rai no la hetan ai haan husi toos.
7 Maibee Maromak haruka hau mai uluk hodi salva imi nia moris atu imi nia jerasaun iha nafatin.
8 Nunee laos imi mak haruka hau mai iha nee, maibee Maromak mak haruka. Nia tau hau iha nee hanesan aman ba liurai ho xefi ba liurai nia uma laran tomak. Nia mos foti hau hodi ukun rai Ejitu tomak.
9 Agora imi fila lalais ba hau nia aman hodi dehan ba nia, ‘Apaa nia oan José hameno nunee: “Maromak halo hau sai nai ulun boot hodi ukun rai Ejitu tomak. Mai lalais hasoru hau, la bele demora!
10 Apaa mai hela besik hau iha rejiaun Gosen, apaa ho apaa nia oan ho bei-oan sira, hamutuk ho apaa nia bibi ho karau ho apaa nia riku-soin hotu.
11 Hau sei foo ai haan ba imi iha nebaa, tanba tinan lima tuir mai, rai sei hamlaha nafatin. Se lae apaa ho apaa nia uma laran, ho mos ema sira nebee hela ho apaa, bele sai kiak rabat rai.” ’ ”
12 José hatutan tan, “Imi rasik bele haree, hau nia alin Benjamim mos haree katak hau nee José, hau rasik mak koalia ho imi.
13 Agora imi tenki baa foo hatene hau nia aman katak, hau nia naran boot iha rai Ejitu. Konta mos buat hotu-hotu nebee imi haree iha nee. Depois lori lalais apaa mai.”
14 Koalia hotu tiha, José hakuak nia alin Benjamim hodi tanis, Benjamim mos tanis hakuak nia.
15 Depois José rei nia maun sira hotu hodi hakuak sira ho tanis. Hotu tiha mak foin nia maun-alin sira dada lia ho nia.
Liurai Ejitu konvida Jacó baa hela iha nebaa
16 Bainhira liurai ho nia funsionariu sira rona katak José nia maun-alin sira mai ona, sira hotu kontenti.
17 Entaun liurai haruka José hatoo lia menon ba nia maun-alin sira nunee: “Tula ai haan ba imi nia kuda buru hodi fila fali ba rai Kanaán.
18 Depois lori imi nia aman ho imi nia familia mai iha nee. Hau sei foo rai diak nian iha Ejitu ba imi hodi hela. Imi sei kontenti hodi goza rai nee nia bokur.”
19 Liurai hatutan ba José, “Ita boot mos foo hatene sira hanesan nee: ‘Lori kuda kareta balu husi Ejitu baa para tula imi nia oan sira nebee sei kiik ho imi nia feen sira. Depois lori imi nia aman mai ona.
20 Lalika preokupa imi nia riku-soin sira, tanba buat diak nian iha Ejitu tomak nee sei sai imi nian.’ ”
21 Rona nunee Jacó nia oan sira mos halo tuir. José foo kuda kareta ba sira tuir liurai haruka, nia mos foo bukae ba sira para haan iha dalan.
22 Nia foo ropa foun par ida-ida ba nia maun sira. Maibee Benjamim hetan osan mutin atus tolu, ho ropa par lima.
23 José haruka mos buat diak nian iha Ejitu tula ba iha kuda buru aman sanulu atu foo ba nia aman. Nia haruka tan paun ho ai haan seluk tula iha kuda buru inan sanulu, nudar bukae atu haan iha dalan mai Ejitu.
24 Depois nia haruka nia maun-alin alin sira baa ona. Sira atu sai dadauk, nia hameno ba sira dehan, “La bele istori malu iha dalan!”
25 Nunee sira sai husi Ejitu hodi baa fali sira nia aman Jacó iha rai Kanaán.
26 Too iha nebaa, sira hatete ba nia, “José sei moris! Tebes, nia agora ukun rai Ejitu tomak.” Rona nunee Jacó bilaan tiha tanba nia la fiar sira.
27 Maibee bainhira sira konta buat hotu-hotu nebee José hatete ba sira, no nia haree tiha kuda kareta nebee mak José haruka atu tula nia ba Ejitu nee, nia forsa fila fali.
28 Jacó dehan, “Hau fiar ona. Hau nia oan José sei moris duni. Hau tenki baa haree nia molok hau mate.”