46
Jacó ho nia familia muda ba Ejitu
1 Nunee Jacó sai atu baa rai Ejitu, nia lori buat hotu-hotu nebee nia iha. Bainhira nia too iha aldeia Berseba, nia halo sakrifisiu ba nia aman Isac nia Maromak.
2 Iha kalan nee Maromak koalia ba Jacó hanesan mehi dehan, “Jacó, Jacó!”
Nia hataan, “Hau mak nee.”
3 Maromak hatete, “Hau nee Maromak, o nia aman nia Maromak. Keta tauk atu baa Ejitu, tanba iha nebaa Hau sei halo o nia jerasaun sai nasaun boot ida.
4 Hau sei lao hamutuk ho o ba iha Ejitu. Hau mos sei lori o fila fali mai. Bainhira o mate, José mak sei taka o nia matan.”
5 Hotu tiha Jacó sai husi Berseba. Nia oan sira tula sira nia aman, sira nia oan nebee sei kiik ho mos sira nia feen ba kuda kareta nebee mak liurai Ejitu haruka ba.
6 Sira mos lori sira nia animal ho riku-soin hotu nebee sira hetan iha rai Kanaán. Nunee Jacó ho nia jerasaun sira hotu too iha Ejitu.
7 Nia lori nia oan mane ho bei-oan mane sira, lori mos nia oan feto ho bei-oan feto sira. Nia jerasaun baa hotu.
8 Ema Israel sira nebee baa iha Ejitu, sira nee mak Jacó ho nia jerasaun, sira nia naran mak tuir mai nee.
Jacó nia oan mane boot Ruben.
9 Ruben nia oan sira mak Enoke, Palu, Hesron ho Karmi.
10 Simeão nia oan sira mak Jemuel, Jamim, Oad, Jakin, Soar ho Saul. Saul nia inan ema Kanaán ida.
11 Levi nia oan sira mak Gerson, Kohat ho Merari.
12 Judá nia oan sira mak Er, Onan, Sela, Perez ho Zerá, maibee Er ho Onan mate tiha ona iha rai Kanaán. Perez nia oan sira mak Hezron ho Hamul.
13 Isakar nia oan sira mak Tola, Puva, Jasub ho Simron.
14 Zebulón nia oan sira mak Sered, Elon ho Jaliel.
15 Sira nee hotu Jacó ho nia kaben Lea nia oan mane. Jacó ho Lea mos iha oan feto ida naran Diná. Sira nia oan nee hotu moris iha rai Padan-Aram. Jacó ho Lea nia jerasaun hamutuk ema nain tolu-nulu resin tolu.
16 Gad nia oan sira mak Zefon, Hagi, Suni, Esbon, Eri, Arodi ho Areli.
17 Asér nia oan sira mak Imna, Isva, Isvi, Beria ho mos sira nia feton Sera. Beria nia oan sira mak Heber ho Malkiel.
18 Sira nee mak Jacó ho Zilpa nia oan, Zilpa nee atan feto ida nebee Labão foo ba nia oan Lea. Jacó ho Zilpa nia jerasaun hamutuk nain sanulu resin neen.
19 Jacó ho Rakél nia oan sira mak José ho Benjamim.
20 José ho nia kaben Asenat nia oan Manassés ho Efraim moris iha rai Ejitu. Asenat nia aman Potifera, nai lulik sidade On nian.
21 Benjamim nia oan sira mak Belá, Beker, Asbel, Gera, Naaman, Ehi, Ros, Mupim, Hupim ho Arde.
22 Sira nee hotu Jacó ho nia kaben Rakél nia jerasaun, sira hamutuk nain sanulu resin haat.
23 Dan nia oan mak Husim.
24 Naftali nia oan sira mak Jasiel, Guni, Jeser ho Silem.
25 Sira nee mak Jacó ho Bila nia oan. Bila nee atan feto ida nebee mak Labão foo ba nia oan Rakél. Jacó ho Bila nia oan sira hamutuk nain hitu.
26 Entaun Jacó nia jerasaun nebee mak baa iha Ejitu hamutuk ema neen-nulu resin neen, seidauk sura nia feto foun sira.
27 José nia oan sira nebee moris iha Ejitu nain rua. Nunee Jacó ho nia familia nebee mak iha Ejitu hamutuk nain hitu-nulu.
Jacó hasoru malu ho nia oan José
28 Jacó ho nia familia sei iha dalan, nia haruka Judá baa uluk hodi hasoru José para husu dalan ba rejiaun Gosen. Bainhira Jacó ho nia familia too iha Gosen,
29 José haruka ema prepara nia kuda kareta, depois nia baa Gosen atu hasoru nia aman Jacó. Too iha nebaa, nia hakuak kedas nia aman hodi tanis kleur loos.
30 Hotu tiha Jacó dehan ba José, “Hau atu mate agora mos hau prontu ona, tanba hau haree rasik ona katak o sei moris hela.”
31 Depois José hatete ba nia maun-alin sira ho ema seluk nebee hela ho nia aman dehan, “Hau sei baa hasoru liurai hodi foo hatene nia nunee: ‘Hau nia maun-alin sira ho hau nia aman nia familia tomak husi rai Kanaán mai hasoru ona hau.
32 Mane sira nee bibi atan, sira hakiak animal. Sira mai lori hotu sira nia bibi ho karau ho buat hotu nebee sira iha.’
33 Entaun liurai sei bolu imi hodi husu, ‘Imi servisu saida?’
34 Imi hataan deit, ‘Atan ami hakiak animal dezde kiik, hanesan ho ami nia bei-ala sira.’ Se imi hataan nunee, entaun liurai sei foo lisensa para imi bele hela iha rai Gosen, tanba ema Ejitu sira hakribi loos bibi atan.”