48
Jacó husu Nai Maromak foo bensaun ba José nia oan sira
1 La kleur tan, ema foo hatene José dehan, “Senhor nia aman moras todan.” Entaun José lori nia oan nain rua, Manassés ho Efraim baa haree nia aman.
2 Bainhira sira too, ema hatete ba Jacó, “Senhor nia oan José mai ona atu haree senhor.” Nunee nia hakaas aan tuur iha kama leten.
3 Nia hatete ba José, “Uluk Maromak Kbiit Nain hatudu Nia Aan mai hau iha aldeia Lus iha rai Kanaán. Iha nebaa Nia foo bensaun mai hau
4 hodi dehan nunee: ‘Hau sei halo o iha oan barak, o nia jerasaun sei barak too sai nasaun lubuk ida. Hau sei foo rai ida nee ba o nia jerasaun para sai sira nian too tinan ba tinan.’ ”
5 Jacó hatutan dehan, “O nia oan Efraim ho Manassés moris iha Ejitu molok hau mai iha nee. Agora hau foti sira nain rua sai hau nia oan rasik, hanesan Ruben ho Simeão mos hau nia oan.
6 Maibee se aban-bainrua o iha oan tan karik, sira nee o nian ona. Sira sei rejistu tuir sira nia maun nain rua nee nia naran. Nunee, kona ba rai ho riku-soin nebee hau nia oan sira sei simu husi hau, o nia oan sira seluk nee simu deit husi sira nia maun nain rua nee.
7 Hau halo nunee tanba hau hanoin o nia inan Rakél. Uluk hau sai husi rai Padan-Aram, hau senti tristi tebes tanba sei iha dalan klaran, Rakél mate iha rai Kanaán, laduun dook husi aldeia Efrata. Hau hakoi nia iha dalan ninin atu baa Efrata.” (Aldeia nee nia naran seluk Belém.)
8 Koalia hotu tiha, Jacó haree hetan José nia oan sira. Nia husu, “Sira nee see?”
9 José hataan, “Sira nee mak oan nebee Maromak foo mai hau iha nee.”
Jacó hatete, “Lori sira mai para hau foo bensaun ba sira.”
10 Iha tempu nebaa Jacó nia matan malahuk tanba nia katuas ona, nia haree la moos ona. Entaun José lori nia oan sira baa besik, depois Jacó hakuak hodi rei sira.
11 Jacó dehan ba José, “Hau nunka hanoin atu bele haree tan o nia oin, maibee agora Maromak hataan hau bele haree mos o nia oan sira.”
12 José dada nia oan sira sees tiha husi Jacó nia ain tuur. Nia hakruuk too rai,
13 depois nia halo nia oan nain rua nee hamriik baa besik Jacó. Ho nia liman loos, nia muda Efraim hamriik iha Jacó nia sorin karuk. Ho nia liman karuk nia tau Manassés iha Jacó nia sorin loos.
14 Maibee Jacó lolo nia liman loos tula fali ba oan ikun Efraim nia ulun, nia liman karuk tula ba oan boot Manassés nia ulun.
15 Depois nia foo bensaun ba José nunee:
“Hau harohan ba Maromak nebee mak hau nia avoo Abraão ho hau nia aman Isac moris tuir.
Nia mak Bibi Atan nebee tau matan mai hau dezde kiik too agora;
16 Nia mak Anju nebee hasai hau husi perigu hotu.
Hau harohan atu Nia foo bensaun ba labarik sira nee.
Hau harohan atu ema bolu sira tuir hau nia naran,
ho hau nia avoo Abraão ho hau nia aman Isac nia naran.
Hau husu atu sira nia jerasaun sai barak tebes iha mundu nee.”
17 Maibee bainhira José haree nia aman tula fali nia liman loos ba iha Efraim nia ulun, nia la simu. Entaun nia foti nia aman nia liman loos husi Efraim nia ulun atu tula fali ba iha Manassés nia ulun.
18 José hatete ba nia aman, “Apaa, la bele. Ida nee mak mane boot, entaun tula apaa nia liman loos ba nia ulun.”
19 Maibee nia aman lakohi. Nia dehan, “Oan, hau hatene. Hau hatene ida nee mak oan mane boot. Nia jerasaun mos sei sai povu boot ida. Maski nunee nia alin sei sai boot liu nia, no nia alin nia jerasaun sei sai nasaun lubuk ida.”
20 Nunee Jacó foo bensaun ba sira iha loron nee. Nia dehan, “Aban-bainrua ema Israel sira sei temi imi nia naran hodi foo bensaun ba ema hanesan tuir mai nee: ‘Hau harohan ba Maromak atu foo bensaun ba o hanesan uluk Nia foo bensaun ba Efraim ho Manassés.’ ” Ho nunee Jacó temi uluk Efraim nia naran foin temi Manassés nia naran.
21 Hotu tiha Jacó hatete ba José, “Hau besik ona atu mate, maibee Maromak sei hamutuk ho imi. Nia sei lori imi fila fali ba imi nia bei-ala sira nia rain.
22 Agora hau foo rai Sikem ba o. Rai nee luan liu fali rai nebee hau foo ba o nia maun-alin sira. Uluk hau hadau rai nee husi ema Amori sira ho hau nia surik ho hau nia rama.”