49
Jacó foo nia liafuan ikus ba nia oan ida-idak
1 Depois Jacó bolu nia oan sira hotu. Bainhira sira too, nia dehan, “Mai hotu haleu hau para hau foo hatene ba imi kona ba saida mak sei akontese ba imi aban-bainrua.
2 Jacó nia oan sira, mai hotu iha nee hodi rona;
see tilun ba imi nia aman Israel nia liafuan.
3 Ruben, o mak hau nia oan mane boot;
o mak hau nia kbiit;
o mak oan primeiru husi hau nia forsa;
o mak boot liu ho forti liu.
4 Maibee o nee siak hanesan mota tuun;
agora laos ona o mak boot liu,
tanba uluk o sae o nia aman nia toba fatin;
o toba ho hau nia feen hodi halo foer fali hau nia kama.
5 Simeão ho Levi, maun-alin nai rua nee hanesan deit;
sira kaer sira nia surik hodi halo violensia.
6 Hau lakohi kombina malu ho sira;
hau lakohi halibur malu hamutuk ho sira,
tanba sira nia laran manas too sira oho ema;
sira tesi halimar karau nia ain uat halo karau la bele lao.
7 Hau foo malisan ba sira nia hirus nebee demais liu;
hau foo malisan ba sira nia laran manas nebee la iha domin uitoan.
Hau sei fahe sira iha Jacó nia jerasaun sira seluk nia leet;
Hau sei halo sira nia jerasaun namkari iha Israel nia laran tomak.
8 Judá, o nia maun-alin sira sei gaba o;
o nia liman sei hanehan o nia inimigu sira nia kanuruk;
o nia aman nia oan mane sira seluk sei hakruuk ba o.
9 Judá, o nee liaun nebee forti;
oan, o hanesan liaun nebee tata tiha animal, haan hotu depois fila;
o hanesan liaun nebee halolo aan hodi toba;
o hanesan liaun inan, see mak brani atu book nia?
10 Rota liurai nian sei la sees husi Judá nia liman;
nia jerasaun mak sei kaer ukun
too tempu nebee rota nee nia nain mai;
nasaun hotu-hotu sei hakruuk ba nia.
11 Judá sei kesi nia kuda buru iha uvas huun;
nia sei kesi nia kuda buru oan ba iha uvas huun diak nian.
Nia uvas been naresin too bele uza hodi fase nia ropa;
nia fase nia faru ho uvas been diak nian.
12 Nia matan sei nabilan hanesan tintu;
nia nehan sei mutin hanesan susu been.
13 Zebulón sei hela besik tasi ibun;
roo husi fat-fatin sei tama iha nia pontikais;
nia rai baliza too sidade Sidon.
14 Isakar hanesan kuda buru forti
nebee toba iha naha nia leet.
15 Nia haree fatin deskansa ida nebee diak;
nia haree rai nee furak.
Nunee nia foo nia kabaas hodi hulan naha todan;
nia sai ema nia atan hodi halo servisu makaas.
16 Dan sei foo justisa ba nia povu,
nudar suku Israel ida.
17 Dan hanesan samea nebee toba hela iha luroon;
nia hanesan samodok iha dalan ninin.
Bainhira ema sae kuda liu, nia tata kuda nia ain tuban;
ho nunee ema nebee sae kuda nee monu baku fila ba kotuk.
18 Ai NAI Maromak, hau hein atu Ita Boot salva ami.
19 Gad, grupu naok-teen sei ataka lisuk nia,
maibee nia sei ataka fali sira husi kotuk.
20 Asér sei riku ai haan;
nia sei prepara hahaan diak nian ba liurai.
21 Naftali hanesan rusa inan ida nebee livre;
nia oan mesak kapaas-kapaas deit.
22 José hanesan uvas huun ida nebee fuan tebar;
nia hanesan ai uvas buras nebee moris besik bee matan;
nia sanak sira nani sae too aas liu moru leten.
23 Uluk inimigu sira lori rama asalta makaas nia;
sira hana nia hodi halo terus nia.
24 Maibee nia firmi nafatin kaer nia rama;
nia liman sai forti,
tanba Jacó nia Maromak Kbiit Nain nia liman mak halo;
nia Bibi Atan mak haforsa nia;
Israel nia fatuk helik mak hakbiit nia.
25 O nia aman nia Maromak sei tulun o;
Maromak Kbiit Nain sei foo bensaun ba o;
Nia sei foo bensaun udan been husi lalehan,
bensaun bee matan husi rai okos,
ho bensaun jerasaun barak mesak isin di-diak deit.
26 Bensaun nebee o nia aman foo nee boot teb-tebes;
boot liu fali riku-soin husi foho antigu sira;
makaas liu fali buat diak husi foho bo-boot sira.
Hau harohan atu bensaun hirak nee hotu tuun ba José nia ulun leten;
nia mak ukun nia maun-alin sira.
27 Benjamim hanesan asu fuik siak;
iha dadeer-saan nia baa tata tiha animal hodi haan;
iha kalan nia fahe naan sira nebee nia hadau ba nia maluk sira.”
28 Nee mak Jacó nia oan sira, sira mak forma suku sanulu resin rua iha Israel. Liafuan nee mak liafuan ikus nebee sira nia aman rai hela ba sira. Nia foo sai ba sira ida-idak kona ba sira nia moris aban-bainrua.
Jacó mate
29-30 Hotu tiha Jacó hameno ba nia oan sira dehan, “Hau atu mate ona hodi baa hamutuk ho hau nia bei-ala sira. Imi tenki lori hau baa hakoi hamutuk ho sira iha fatuk kuak nebee uluk Abraão sosa husi Efron ema Ete nee nia liman. Fatuk kuak nee iha toos nia laran iha Makpela besik Manre iha rai Kanaán. Toos ho fatuk kuak nee uluk Abraão sosa atu halo ba fatin hodi hakoi mate.
31 Abraão ho nia kaben Sara uluk hakoi iha fatin nee, Isac ho nia kaben Rebeca hakoi hotu iha nebaa. Depois hau mos hakoi Lea iha fatin nee.
32 Toos ho fatuk kuak nee uluk sosa kotu ona husi ema Ete sira.”
33 Bainhira Jacó foo tiha hotu nia lia menon nee ba nia oan sira, nia dada tiha nia ain ba iha kama leten. Depois nia iis kotu, nia baa hamutuk ho nia bei-ala sira.