50
1 Bainhira José haree nia aman iis kotu ona, nia hakuak kedas nia aman ho tanis, no rei fila-fila.
2 Hotu tiha José haruka nia doutor sira hodi tau aimoruk ba nia aman Israel nia mate isin para bele rai kleur. Doutor sira nee mos halo tuir.
3 Sira tau aimoruk beibeik too loron haat-nulu, tanba halo nunee foin bele rai kleur. Ema Ejitu sira mos lutu ba Jacó durante loron hitu-nulu nia laran.
4 Bainhira tempu lutu nee hotu ona, José hatete ba liurai nia funsionariu sira dehan, “Se imi hanoin hau karik, favor hatoo hela hau nia lia menon ba liurai nunee:
5 ‘Uluk hau nia aman haruka hau jura. Nia dehan, “Hau atu mate ona. O tenki lori hau baa hakoi iha rate nebee uluk hau rasik kee ba hau nia aan iha rai Kanaán.” ’ ” José hatutan, “Nee duni hau hakarak husu lisensa para hau baa hakoi tiha lai hau nia aman, depois mak hau fila.”
6 Rona José nia lia menon nee, liurai hataan, “Diak, baa hakoi tiha ita boot nia aman, tuir uluk nia haruka ita boot jura.”
7 Entaun José baa dadauk atu hakoi nia aman. Liurai nia funsionariu sira hotu akompanha nia. Funsionariu bo-boot sira husi liurai nia palasiu ho ema boot sira iha Ejitu tomak baa hotu.
8 José nia uma laran tomak, nia maun-alin sira ho nia aman nia uma laran, hotu-hotu baa. So sira nia oan ho sira nia bibi ho karau deit mak hela iha rai Gosen.
9 Iha tan tropas balu sae kuda, balu sae kuda kareta hodi akompanha sira. Nunee ema nebee baa atu hakoi mate nee barak teb-tebes.
10 Bainhira sira too iha baku trigu fatin ida naran Atad besik mota Jordaun, sira tanis hakilar ho halerik. Iha nebaa, José halo serimonia ba nia aman nia mate isin durante loron hitu.
11 Bainhira ema Kanaán sira nebee hela besik Atad haree serimonia nee, sira dehan, “Ema Ejitu sira nee halerik ho tristi teb-tebes!” Nee mak sira hanaran fatin besik mota Jordaun nee Abel-Mizraim.
12 Jacó nia oan sira halo tuir duni buat nebee mak sira nia aman hameno hela ba sira.
13 Sira lori sira nia aman ba rai Kanaán hodi hakoi nia iha fatuk kuak iha toos Makpela besik Manre. Fatin nee uluk Abraão hola husi Efron ema Ete nee atu uza hodi hakoi mate.
14 Bainhira José hakoi tiha nia aman, nia fila fali ba Ejitu hamutuk ho nia maun-alin sira ho mos ema hotu nebee akompanha nia baa hakoi nia aman.
José hametin nia maun sira nia laran
15 Bainhira sira nia aman mate ona, José nia maun sira hatete ba malu dehan, “Keta halo be José sei rai hela odiu ba ita. Se nia atu selu fali hahalok aat hotu nebee uluk ita halo ba nia karik, oinsaa?”
16 Nunee sira haruka lia menon ba José dehan, “Uluk molok senhor nia aman mate, nia hameno hela liafuan mai ami dehan,
17 ‘Imi hatoo hau nia liafuan ba José hanesan nee: “Hau husu o atu perdua o nia maun sira nia hahalok aat hasoru o. Foo perdaun ba sala todan nebee uluk sira halo ba o.” ’ Nee duni agora ami husu atu senhor perdua ami nia sala, tanba ami mos serbi Maromak ida nebee senhor nia aman adora.” Rona tiha sira nia lia menon nee, José tanis.
18 Depois nia maun sira baa hakneak hakruuk too rai iha José nia oin hodi hatete, “Ami sai senhor nia atan deit ona.”
19 Maibee José dehan, “Keta tauk. Hau mak tuur iha Maromak nia fatin ka?
20 Uluk imi hakarak atu halo aat hau, maibee Maromak nia hakarak atu halo buat aat nee sai fali ba buat diak para salva ema barak, hanesan akontese agora dadauk nee.
21 Tanba nee keta tauk, hau sei tau matan ba imi ho imi nia oan sira.” Depois José konsola tan sira hodi koalia di-diak ba sira.
José mate
22 José hela nafatin iha Ejitu, nia maun-alin sira mos hela nafatin iha nebaa. Nia moris too tinan atus ida sanulu.
23 Nia konsege haree Efraim nia bei-oan sira too jerasaun tolu. Bainhira Manassés nia oan Makir nia oan sira moris mai, José simu sira iha nia hiti hodi foti sira sai nia oan rasik.
24 Iha loron ida José hatete ba nia maun-alin sira, “Hau atu besik mate ona. Maibee too tempu ida Maromak sei mai tulun imi hodi lori imi sai husi rai nee baa fali rai nebee mak uluk Nia promete ba Abraão, Isac ho Jacó, Nia jura atu foo rai nee ba sira.”
25 Depois José haruka ema Israel sira nee jura. Nia dehan, “Bainhira Maromak mai tulun imi hodi lori imi baa nebaa, imi tenki lori mos hau nia mate isin sai husi rai nee.”
26 José mate iha Ejitu ho idade tinan atus ida sanulu. Doutor sira tau aimoruk ba nia mate isin para bele rai kleur, depois hatama ba iha kaixaun laran.
CHECK CROSS REFERENCE??