RUT
1
Elimelek ho nia familia muda ba rai Moab
1-2 Uluk bainhira juis sira sei lidera Israel, mosu rai hamlaha. Tempu nebaa iha ema ida naran Elimelek, nia ema Efrata husi aldeia Belém iha rai Judá. Tanba rai hamlaha, Elimelek lori nia feen Noemi ho nia oan mane nain rua, Malon ho Kilion baa hela lai iha rai Moab.
3 Iha nebaa Elimelek mate husik hela Noemi mesak ho nia oan sira.
4 Depois sira nain rua hola feto Moab, ida naran Orpa, ida fali naran Rut. Noemi ho nia oan sira hela iha Moab durante tinan sanulu.
5 Too ikus Malon ho Kilion mos mate. Ho nunee Noemi lakon nia kaben ho nia oan nain rua.
Noemi fila fali ba Belém hamutuk ho Rut
6 Bainhira Noemi sei hela iha Moab, nia rona katak, NAI Maromak tulun ona Nia povu Israel hodi foo ai haan ba sira. Nunee Noemi ho nia feto foun sira prepara atu fila fali ba nebaa.
7 Sira sai husi sira nia hela fatin lao tuir dalan atu baa rai Judá.
8 Noemi hatete ba nia feto foun sira dehan, “Imi nain rua fila ba imi ida-idak nia inan nia uma. Hau harohan atu NAI Maromak hatudu laran diak ba imi hanesan imi hatudu ona laran diak ba imi nia laen matebian ho mos mai hau.
9 NAI Maromak tulun imi atu bele hola fali mane hodi moris hakmatek iha imi nia laen nia uma.”
Koalia tiha nunee, Noemi rei sira nain rua atu fahe malu ho sira. Maibee sira tanis hakilar
10 hodi dehan ba nia, “Lae, ami tuir amaa fila fali ba amaa nia maluk sira.”
11 Noemi hataan, “Oan sira, imi fila deit ona. Imi tuir hau atu halo saida? Hau sei hetan tan oan mane ba imi atu hola ka?
12-13 Oan sira, imi fila fali ba. Hau ferik ona, atu kaben tan la bele ona. Se karik sei iha esperansa ba hau atu hetan oan, imi sei hein too sira boot ka? Se karik atu hola mane iha kalan nee kedas hodi hetan oan mane mos, imi prontu atu la hola mane tanba hein sira ka? Oan sira, la bele tuir hau. Esperiensia durante nee moruk liu mai hau duke imi, tanba NAI Maromak fila tiha ona Nia liman hodi kontra hau.”
14 Rona nunee sira tanis hakilar tan. Orpa rei nia banin hodi fahe malu ho nia, maibee Rut hakuak metin nia banin.
15 Entaun Noemi dehan ba Rut, “Haree ba, o nia alin fila fali ona ba nia maluk sira no ba nia maromak sira. O mos fila baa hamutuk ho nia.”
16 Maibee Rut hataan,
“Keta haruka hau fila hodi husik amaa mesak;
keta bandu hau atu tuir amaa.
Amaa baa nebee deit, hau mos baa;
amaa hela iha nebee deit, hau mos hela iha nebaa.
Amaa nia maluk sira sai hau nia maluk;
amaa nia Maromak sai hau nia Maromak.
17 Amaa mate iha nebee, hau mos mate iha nebaa,
no hakoi mos iha nebaa.
Se karik hau husik amaa mesak,
entaun husik NAI Maromak foo kastigu todan loos mai hau;
so mate mak bele haketak ita rua.”
18 Noemi haree katak, Rut kaer metin nafatin nia desizaun atu tuir, entaun Noemi la koalia tan ona.
19 Sira nain rua kontinua lao too iha aldeia Belém. Bainhira sira too, ema hotu haree sira, hakfodak. Feto Belém sira dehan, “Nia nee Noemi ka?”
20 Noemi hatete ba sira,
“Keta bolu tan hau Noemi,
maibee bolu hau Mara, katak “moruk”,
tanba Maromak Kbiit Nain halo hau nia moris nee moruk loos ona.
21 Uluk hau sai husi nee ho kompletu,
maibee agora NAI Maromak lori hau fila fali mai ho liman mamuk.
Tanba saa mak imi nafatin bolu hau Noemi?
NAI Maromak halo hau terus;
Maromak Kbiit Nain foo dezastre mai hau.”
22 Ida nee mak istoria kona ba Noemi fila husi rai Moab hamutuk ho nia feto foun Rut, ema Moab nee. Sira too iha Belém, toos nain sira foin hahuu koa trigu primeiru.