1-5 Nil God.ana, ke'am kon-ngath nunang Noah wee'anangan thanang, ya'a, puth min anangan chukkunangan ngoonchin. Nil ngaantam-ngeey thanang, a' minam pi'-pi' thanang. Nil wunt kuch yipmam ngakana, kan-ngul uk-ukow.

/ Kep five kanan minch-a, ngak iimpan pi'anamana, an paththam pek-pek ngul uk-uk. Chukkun pi'anana, pek ngul uk-uk, a' yoyk pal kenyuw angman than-than, yoyk namp alantaniya, Ararat. Angman than-than, kep ko'alamakan.

6-9 Amanamana, nil Noah.angan window.an tha', a' min waathana, yoon kuch nunang. Min anan palaman ke'am wamp nungant, ya'a, anman mo'-mo' pal-puuy anman. /Mo'-mo'- aa, aakan e'am ngula. Noah.ana, meemiy ya'a ngakan kan nath e'ama, nath ya'a.

A' nil min panch thonangan ngul kuch, min kolatanwey kuch nunang. Aakan-a, ngak thamp anman yippak wun-wun, ke'-paal min kolatana aakangan yippak ke' ukiy, ya'a, nil koyam mo' chukkun aakanakan.

10-12 Anpalana, week thonam kanan wanta, nil Noah.angan min kolatan putham kuch nunang. Kinch kanan uka, min kolatan palam mo'-mo' chukkunakan; thaa'angana, yuk punth many kangk thamp palam wampath nungant, Noah.antan. Yaa, nil Noah.angan kan-ngul ngaantam-ngeey, “Ngakan pek-pek kan-ngul uk-ukan ey?”

/ Week thonangan ngul want thanang-a, nil Noah.angan putham ngul kuch nunang; puth min kolatana, palaman ke'am wamp Noah.antan. Nil Noah.angan window.an tha', yipmam aak yoonan thathow, a' aak pal puuy thath, chukkun anpalan, / a' thath-a, ngakan kan-ngul uk-uk, ya'-ngul, aakan e' ngul wun.

13-19 Anpal ngulana, / kep kuchamangan kanan want thanang-a, nil God.an thaw nungant, Noah.antan, “Niiy kan-ngul yoon pentāna! Chukkun nanpalana! Wanch nungkaramana, nengk nungkaramana, a' nengk nungkaramantam wanch thana, min thamana, niiy kan-ngul yoon pentāna! A' way min yoon kan pentathāna! Min anangana, yot thaa'-wantanam ngul weenayn aakang nanana, pal puuy we'aramayn,” nil God.an thaw Noah alantan. Yaa, than yotam yoon ngul pentin chukkun wuut pi'an amanaman.

20-22 / Yot kanan pentin-a, Noah.ana, kaangk thank-you thawow nungant God.antan, nil kunttow anangana, yalmath, a’ karp-karp wunp thanang, wal achantang ka' yuk thaa’ yimanangan yump, kunttow anangan yump nungant God.antan. Nil min min-miniy wiy anangana, yalmath thanang, min panch thakan —min anangaman thanan keenkanaman kaangk kiingkayn piip God.antan — a' min thon-thonam kiingk thanang, angan kunttow achantangan, nil puth kaangk koyaman thee'ow thanang piip God alantan, thank-you thawow nungant. Nil puth minama, man-yathaman pi'-pi' thanang, ke' uthamin, nil man-yatham pi'-pi' thanang, wiy thaa'-wantanamana, ya' uthamin ngak kaap wuut pi'anangan.

Nil God.angan thath nunang Noah.angan min anangan kiingk nungant, a' nil ngangk min wunant, a' nil nungantakaman thaw, “Ngay puthamana, ke'-ngul wayathāng pama, wanch, mina, way min thakana, ngay yimanangan ke'-ngul way yumpāng thanta, ya'-ngul.”