1-4 Anpalana, nil God.an thaw Noah.antan, a' putha puk nengk nungantam al-alantan, nil thantan thaw, “Niiy puk yot ngul uw-uwāna, aakam ngathow aak nangana, a' aak puuy-puuy ngulan we'aramayn. Niiyiya, ka' moom pi'an thanttam iiyān thant, min al-alantan, yot aakangan wuntan, a' putha ngakangan wuntan — min inangana, ngay ma' nungkarang wantāng thanang. / May min thakan ngayan yumpangan-a, an min niiyant mungkanakan. Puth in ngeeyiy a! / Niiy minan mulathān-a, min kempan chaapar thaman ke' mungkān-a, chaaparan mak ukow, a' niiy kan-ngul mungkān.

5-11 / Ngay paman yumpang-a, ka' ngay yimanangan yumpang niiyang. Yaa, nil pam wanch wee'angan mulathow pama, wanch thonana, niiy puthangkana, mak mulathān nunang. / Min way kulliyangan pathow pam wanch-a, mulakamana, niiy puthangkan mulathān nunang min way kulliyan.

12-17 Yaa, ngay inaniya, wik thayan kaa'ngakang nintanga, puk nungkaramaka, a' yot-yotamant wik thayan inan thawang niiyant. Ngakangana, ke'-ngul aakan maay-maayow niiyant aak nanana, a' pam wancha, mina, way min thakana, ke'-ngul wayathāng. Ngay ngooyan yuwang ing kenyan wunpang. / Niiy thath-thathān ngooyan-a, niiy wik inan ngaantam-ngeeyān, ngay inan kaa'ngakang niiyang,” nil God.an thaw thant, Noah.antan-a, putha nengk nungantam al-alantan.

18-23 Anpal ngulana, Noah.angana, may kaangk anangan kaamp aak garden.ang Amanamana, nil may kam poch kaangkantamana, mungk, a' kuchekana wayam, kuchek ngul weent-weentanta, a' nil ngook nungantaman thapath. Nil tent nungantamang angman wun-wun ngook ke'anang, ma'lip. A' Ham wampant piip nungantamak Noah.ant, Ham.ana, piip Canaan.antam. / Ham.angan piip nungantam Noah.an ma'lipan thathana, nil yoon pent, a' wuny-kunchak waa', a' pont-kunchak waa', Shem pulant Japheth.antan waa'. Puliya, blanket maaypul nungant, a' pulan pikpungkam thee'pul piip pulantamakan, a' man-mangkam iiypul nungant. Pul puth ke' thathiypul piip pulantaman ma'lip, ngook ke'anangan wun-wun. A' pulana, blanket.ang kangpul nunang.

24-27 / Nil Noah kan-ngulan kootra min ngulan wun-a, than waa'in nungant nil Ham.angan thath-thath nunang ma'lipan wun-wun. A' nil Noah.an thaw, “Puk nengk Ham.antam'ana, Canaan.ana, pam many anman iiyow, work anman iiy-iiyow kampan nungantamakan, kampan nungantam anangana, moom pi'an iiyayn nungant. Shem.ana, nil piip God.angan minam anman pi'-pi'ow nunang. Japheth.ana, nil God.angan yimanaman minam anman yump-yumpow nungantan, puk nungantam al-alangana, puk yot uw-uwayn. Kampan Canaanantam anangan-a, work anman iiy-iiyayn thant, kampan Shem.antamaka, a' putha kampan Japheth.antamak, than work al-alantan iiy-iiyayn,” nil Noah.an yimanangan thaw.

28-29 Noah.ana, yaam man-yatham wun, wuut kathakam, kaapiya, 950.akam man-yatham wun, a' kan-ngul utham.