1-2 Than pam wanch ma' mangkam aak keenkana, wik thonam anman yot yompanam thaw-thawin, wik thon-thónana, ke'am thaw-thawin, ya'a, wik thonam anman thaw-thawin. Than kaaw iiy-iiyin, a' aak pintalakan wampin, aak Babylon angan. Than angman ngul wun-wunin.

3-4 Anpalana, than thanttakaman thawin, “Niiyalang! Ngamp kunttow pipam yumpāmpa! A' thumang kiingkāmp thanang, thayan yipmam yumpāmp!” Thanan putha, kunttow anangan yumpin, a' yuk ka' yongka, putha nguchaman yimanangan uwin, yipmam makayn kunttow anangan, yipmam thayan wunow, puth yuk inana yuk ngotan (tar.an waa'antan).

Amanamana, than thawin thanttakam, “Ngamp aawuch yot-yotam ngampar kaachāmp-a, aak pi'an yumpāmp. Thonan ep kaachāmp achantang, nathakam keny, yuwan uwow nunang, ngamp pi'an yumpāmp ngamparakama! A' ngamp yipmam ke' yaarkathwump ngamparakam aak imanaman, ngamp yipmam nath-nathan aak ke' we'aramāmp, ngamp yipmam aak ingman wun-wunāmpa.” Thanana, yimanangan thawin thanttakaman.

5-9 Amanamana, nil God.ana, inpal keny uk thant, aawuch achantangan thathow thanan yumpin. Nil God.an thaw, “Yaa, ngay kan thathāng thanang. / Pam wanch al-alangan kaangk ngeenan yumpayn-a, thanana, yumpantan!”

Amanamana, nil God.ana, uk ngul, / a' wik thaa'-nganth thonam kanan thaw-thawin-a, an nil God.angana, ya' wayath thanttam, wik thon-thón ngul thee' thant. Than puth pam al-alangana, ke'-ngul wik ngeeywin thanttakam, ya'-ngul, wik kum-kumwin thanttakaman.

A' thanang yotaman nil God.angan yaarkath thanang ngul aak um yompanam nath-nathan iiy-iiyayn, a' thanana, too ngul wantin aak ananiy, ke'-ngul aawuch ananiy kaach-kaachin kenyakaman, ya'-ngul. Than aak namp ananiya, waa'in Babel, puth God.angan aak anpalan wik thon- thón ngul thee' thant, thanttakaman wik ke'-ngul ngeeywin, ya'a, a' puth aak anpalana, nil pam wanch yot anangan yaarkath thanang ngul.

27-32 Keenkanamana, aak namp Ur.angana, pam wun, namp nungantaniya, Terah. Wuut mangk nungantamaniy nampa, Noah.

Pam ilangan Terah.angana, puk nengk ko'alam wunp, than wuutam, namp inangan thant thee', Abrama, a' Nahora, a' putha thona Haran. Than ko'alam anangana, pamakam emin.

Nil Abram.angana, wanch ngul maay, namp nungantaniya, Sarai. Nila, puk many ke'am kal, anman iiy-iiy, puk ke'anang. Nil Nahor.angana, nil thamp wanch maay, namp nungantaniya, wanch alantana, Milcah. Nil ep puk wuut kal, namp nungantaniy thee'in Bethuel. Nil thon ilangana, Haran.angana, wanch thamp maay, a' puk wuut thamp wunp, namp nungantiya, Lot. Amanamaniya, nil Haran piip Lot.antamana, utham ngul.

Anpalan ngula, pam ilangan Terah.angana, putha, kampan nungantam al-alangana, aak namp Ur anana, too ngul wantin, a' than aak thonak kan-ngul iiyin, aak kechak, aak-aakanakan namp Canaan. Than inangan iiyin: Lota, Abrama, putha, wanch nungantam, Sarai.an.

/ Kungk iiy-iiyin-aa, a' aak chil thinth ngulan wun thant, than angman wunin aak village.ang namp Haran, ke'am yippak wampin aak Canaan.akan. Than aak angman wunin village.angan thanttang. Amanamaniya, nil Terah.ana, /wuut kath ngulan weem-a, utham ngul, aak angman, Haran.angan kaap il-ilangan wantan 205 years.