1-3 / Than angman aak Haran.angan wun-wunina, nil God.ana, Abram.antan thaw, “Nint aak nungkaram inpalana, yiip aak kechak iiyān, pam wanch kampan piip nungkaramantam nanangana, too wantān thanang. Ngay nungkana, woyan ngul meenathāng aak thonakan, nintiya, aak-aakanakan kan iiyāna!”

“Puk thaa' nyiingkanam ngulan aak ngeey-ngeeyayna, nungkaram anpalana, ngay ngul pi'-pi'āng thanang minam, a' than thaa'-wantanam ngul weenayn; nint wuut mangk thanttam thaa'-wantanam ngul weenān. Ngay ngul ma'-aath-aath'āng nintang, nint pam wuut pi'an ngul iiyān, a' nintaniya, putha, pam wanch wiy anangan ngul ma'-aath-aathān thanang. /Than wee'-wee'anangan minam iiyiythan nungkan-a, an ngayana, puthangkana, min iiyang thant. / Nil wee'angan wik wayang koonchow nintang-a, an ngay puthangkana, wik wayang koonchāng nunang. Ngay puth ngay mi'ang nintang, nintana, nganyangana wik ngeeyangan. Yaa, puth amanamana, ngay ngul minam pi'-pi'āng niiyang, pam wanch yotam, aak ingan wunniiy.”

4-5 / Nil piip God.an kanan thaw Abram.antan-a, nil Abram.an aak Haran.ana, too want ngul, nilana, kan-ngul iiy aak thonakan, aak namp Canaan, aak-aakanakan iiyow. Nil wanch nungantam Sarai.ana, karpam kalan, puth Lot thampa, puk nengk pont-kunchantamana, nungantang angman iiy thamp, a' putha way min thanttam anangan ma' mangkam kalin thamp. A' putha, pam wanch workan iiy-iiyin thanta, karpam iiyin thanttang.

6-7 / Than aak Canaan.akan yippak iiy-iiyin-aa, a' ngul-ngulana, aakana, kan uwin. / Iiy-iiyin-aa, a' aak town Schechem thinth ngul iiy-iiyin, aak Canaanang angman, aak many namp Moreh. Than angman paanthin, yuk wuynguth pek-pekam. A' nil Piip God.an angman wamp nungant, Abram.antan, a' thawant, “Ngay aak ma' mangkam Canaan.ana, kampan nungkaramakan thee'āng, puk thaa' nyiingkanamakan aak-ngeey-ngeeyayna, al-alantan thee'āng,” thaw. A' nil Abram.an-a, kaangk thankyou thawow nungant God.antana, nil puth kunttow anangana, yalamath thanang, a' wal achantang yump ka' yuk thaa' yimanangan yump, a' min min-minamana, mulath yipam minana, thumang kiingkow, God.antan thankyou thawow nungant, puth aak thantana, yimanangan wun.

8-9 Abram wee'anang'ana, aakan too wantin ngul, a' kan-ngul iiyin um yiip, aak yoykatiy uwin, aak angman paanthin, men-menanga aak town namp Bethel wonk kuuwangkan, wonk kaawangkana, aak town namp Ai.an. Nil Abram.ana, mee'wuthanam ngul, thankyou thaw God.ant minam pi'-pi' thanang. Anpalana, than kan-ngul iiyin, aak um yiip iiy-iiyin, a' chip-chipam paanthin, a' chip-chipamana, paanthin, nil yimanaman.

10-13 Ngul-ngulana, aak Canaan um yompanamana, may ke'anang ngul wunin, kanam minch thant, may thanttaman. Abram wee'anangan yim-yimanang may ke'anang thamp wunin, a' nil puth thaw nungant, wanch thum nungantamant, a' puth kampan nungantamant, “Ngamp kan aak Egypt.ak iiyāmpa! mayaka! Ngamp angam thamp wunāmp.” A' than kan-ngul yiip iiyin ngul aak Egypt.akan.

/ Than kan-ngulan Egypt thinthan wamp-wampin-a, nil Abram.an thaw wanch thum nungantamakan, “Nint wanch menth-a, / pam aak an punychanyangan thathayn nintang-a, aak Egypt.ama, than kaangk wuniythan nungkar, a' ngayangana, than mulathiythan. Nintana, waa'ān thant yimanang, ninta ka' wiil ngatharam yimanang, puth ngayana, ka' wuny nungkaram yimanang, than min yipam iiyayn ngathar, ke' mulathayn ngayang yipam.”

14-16 / Than kanan wampin aak Egypt.angan-a, wanch thum Abram.antamana, yotangan thathin nunanga' thawin, “In wanch menth-mentham ngul aa?”

/ Than pam Pharoah.antan work iiy-iiyin-a, than al-alangana, wanch menthan waa'in nungant, puth Pharoah.ana, King thanttam. Nil Pharoah.ana, thaw thant, “Niiy pal kalān nunang, ing wunow aak ngatharanga.” A' than working men al-alangana, pek kalin nun Pharoah.antan. A' nil Pharoah.angana, pama, wanch thee'ant Abram.antan work iiy-iiyayn nungantan, a' min yot thamp thee'ant, sheepa, bullocksa, horses thakan thee'ant.

17-20 An puth nil God.angana, kaangk ke’ thathow Sarai.an aawuch pi'anangan wun-wunow Pharoah.antangana, nil puth wayath thanang, Pharoaha, puth pam wanch puk aak an punychanyan, thanang weech-weech thanang, way-wayam wun-wunin. Nil Pharoah.angana, wik kuch nungant Abram.antan pal wampow, a' Pharoah.an thaw nungant, “Nint wanttak mook-mathan ngayang ka' wiil nungkaram yimanangan a? Nint way yumpan ngathar aa? Nint ngul wanttak ke'am waa'an ngatha? Sarai.an wanch thum nungkarama? In ngeeya! wanch thum nungkaramana, puuy kan kalāna! a' nip kan-ngul iiyow thama!” thaw, Pharoah.an.

A' nil Pharoah.ana, thaw thant, working men nungantam al-alantan, “Ayyang, niiyala, niiy kan kenthān thanang Abram wee'anang, aak Egypt ina kan-ngul wantayn ngampara!” A' than kenthin thanang ngul.