1-4 Abram wee'anangana, koyam epankin aak Bethel.ak, min yot thamp kalin, a' way min min-miniy wiy thamp kalin. Lot.ana, angman iiy-iiy Abram.antang, puth Abram.ana piny wuut nungantam Lot.antam. / Kanan wampin aak Bethel.akan-a, nil Abram.an mee'wuthanam, thankyou thaw God.antan.

5-9 Lot.angan-a, yuk way min puth min anangan thamp yot pi'-pi' nungantakaman, puth min al-alangana, wak pi'anan wanttin uwiythan mungkanakana? Yaa, pam anangan min sheep Abram.antaman pi'-pi'ina, putha, pam wiy anangan min sheep Lot.antaman pi'-pi'ina, thana pam anangana, thaa'-thay-thayanamin, wakam anpalan.

A' nil Abram.an thaw ngul nungant, Lot.antan, “Ngal ke' thaa'-thay-thayanamāla! wakamana! Ngal puth kampana! In aak yota! a' aak pi'an we'ar thampa! Nintaniya, aak woyan thonam anman iiyan, ngayiya, yimanang woyan thon iiyāng, ngal yaarkathwul ngalantakama! Nint mi'ān aak want-wanttinan nungk wantānga! / Nint nath kaaw iiyān-a, ngay natha ing kuuw wunāng. / Nint nath kuuwam iiyān-a, thawān ngathar, ngay yipam ang kaaw wunāng.”

10-13 Nil Lot.angan-a, aak pal puuy thath, a' an kaawan aak min thath. Aak kaa'-um-pek, aak ananiy aak wo'uw pi'an thinth, aak wo'uw namp alantanyia, River Jordan. Aak ananiy uwa, aak ka' garden min yimanangan God.angan pi'-pi'an. A' nil Lot.an thaw nungant Abram.antan, “Ngay kan kaaw iiyāngow?” “Ee' Nint iiy ee!” thaw, Abram.an.

A' nil Lot wee'anang kaaw iiyin, min sheep nungantam thamp karpam kalin, angman ngul wun-wunin, aawuch wuut pi'an thinth. Aak ananganiya, namp pulanta, Sodom-a, Gomorrah. / Pam wanch aak an punychany wun-wunin-a, than way-wayam, way anman yump-yumpin.

14-18 Puth Abram wee'ananga, aak Canaanang angman wun-wunin. / Lot wee'anang kanan iiyin-a, nil God.ana, thaw nungant, Abram.antan, “Nint aak kech thathan a! pal puuy-a! kungka, yiipa, kaawa, kuuw. Ngay aak inan nungkar thee'āng, a' putha, puk thaa' nyiingkanamana, ngulan aak ngeey-ngeeyayna, nungkaram anpalana, aak inana thant thamp thee'āng kampan nungkaramak. Kampan nungkaramana, way thaa'-wantanam ngul weenayn, ka' pamangan ke' count.impungiythan aak chil aakaman, puth kampan nungkaram anangan-a, yimanangan ke' count.impungiythan, ya'a, yot thaa'-wantanam weenayn. Yaa, nint kan iiyāna, aakan thath-thathāna pal puuyana ngayan thee'āng nungkara,” God.an thaw nungant.

Nil Abram.ana, iiy ngul, aak yuk ongk-ongkiyan than-thanina, aak angan ngul wun, aak namp aniya, Mamre. Nil kanan wampa, nil min sheep mulath, a' thumang ngul kiingk God.ant, thankyou thawant minaman pi'-pi' thanang.