1-12 Anpalaniya, than pam pi'pi'anam kings angman pal-puuyaman wampin, aak Sodom.akan, aak nil Lot.an wun-wun, angman wampin thant. Than soldiers thanttam karpam kalin thanang, kul yumpin thant. Pam wanch aak Sodom amanamana, putha, aawuch yot thinth anangan than-thanina, than anangan way-wayathin thanang. Pam wanch wiya, uthamin, puungk wiyaniya, nath mo'in yoyk wakanang. Than Lot.ana, mamin nunang, putha, pam wanch wiy anangan thamp. Putha, way min min-miniy thanttam anangana, kalin.

13-16 Nil pam thonamana, mo' thanttam, a' nil kamp mo' aak Mamre aakanakan, wik thoow tham wamp nungant, Abram.ant. Abram.an uw nunang ngula, a' nil waa'ant, “Ayyang! Than soldiers yot anangan wampin aak Sodom.akana, a' than Lot.ana, kanam mamin nunang a!”

Nil Abram.angana, soldiers nungantam anangan yalmath thanang, a' nil karpam kal thanang, um kungk iiyin, pam kulliy anangan koyam kenthayn thanang.

/ Aak ngaa' kanan chint-a, than Abram wee'anangana, uwin thanang, Kings anangana, puth soldiers thanttam. Than kan-ngul pekwin, puth Abram wee'anang al-alangana, ya' mungkin thanang, ke'am ma' thee'in thant. Puungk wiyiya, than mulathin thanang, pam wanch wiyiya, nath mo'in, Abram.angana koyam kal nunang Lot.an, putha, pam wanch puungk wiy anangana, ka'athaman soldiers.angan mamin thanang, anangan thamp Abram.angan koyam kal thanang, a' way min anangan thamp.

17-20 Anpalana, pam pi'an kucham anangan wamppul nungant, Abram.ant, umang iiypul nungant, pul wee'pula, pam King kucham, thonamana, aak Sodom amanaman, putha, thona, pam namp Melchizedek. Nilana, king thanttam, aak Salem anpalan. Nil Melchizedek.ana, pam nil work God.antan iiy-iiy thamp, priest iiy-iiy, nil pam wanchant wik God.antam waa'-waa'. Nilan-a, may wampath nungant Abram.ant, a' wik min thawant, wik inangan thaw, “Nil Piip God.angana, nintangana, min-minam pi'an, nil God ilangaman puth min-minam paththama! Nilam aak um yompanam yumpa, aak in kenyangana, putha, aak inan um yompanam yump. Ngamp thaa'-kuumpāmp nunanga, thankyou thawāmp nungant, nil puth ma'-aath nintang, puth nintana, pam kulliy anangan kenth-kenthan thanang, a' um thaampan thanang thamp, than pam anangan ke'am ma' thee'in nungk, ya' anman. Nil God.ana, min-minam paththam,” thaw, Melchizedek.an. A' puth nil Abram.angana, way min min-miniy inangana, wiy thee' nungant, Melchizedek.antan.

21-24 Anpalana, nil pam pi'an King.ana, aak thon aak anpalana, Sodom anpalana, thaw nungant Abram.ant, “Ayyang, nint pam wanch ngathan palam kuchān thananga. Yuk way minana, ep nangam pi'ān thanang,” nil pam pi'anan thaw. A' nil Abram.an thawant, “Ya'a, ngay ke'a, nint way min puuy kalān thanang. Pam soldiers ngatharam al-alangana, may wiy kanam mungkin, puth ngay way min puungk wiy inangana, ngay ke' pi'ing. Wiy al-alantana, thanan ma'-aathin ngayanga, thant thampana, ep thee'ān, puth ngatharana, ke' thee'ān, nint puuy kalān way min anangana! Nil God.angan ma'-aathan ngayang, ngay nanpalan way min ke' pi'ing nungkarama. / Puth ngay way min nungkaraman kaling aak ngatharamakana, ngul-ngulana, nint puth thawin, 'Ngay puth nunang ma'-aathang Abram.ana, ke'-paal nil ma'mangkkiy ngul ween' — an puth waya. God.ang thonamang alangman ma'-aathan ngayang,” nilan thaw, Abram.an. A' than kan-ngul iiyin, aak thanttamak.