1-6 Anpalana, nil Abram.angan maany thath, God.an wik thaw-thawant, puth wik inangan thaw nungant, “Ayyang, Abram-ang, nint ke' winynyang mo'āna! Ngay ma'-kee’ ngul wunp-wunpāng nungkar.”

A' Abram paththam thawant God.antan, “Ayyang, ngay puth puk wuut ke'anang way min ngatharam anangan maayow. Puth Eliezer.angana, work ngathan iiy-iiyana, puth way min ngatharam anangana, ngul maay thanang nungantakam ngayan uthaminga. Nint puk wuut many ngath ke' thee'in ey?” nilan thaw God.antan.

Puth God.an thaw nungant Abram.ant, “Ya'a, nil Eliezer.angana, yuk way min nungkaram anangana ke' maayiy thanang nungantakaman, nungka, puk wuut ngul wampow nungka. Nint thunp in kenyan thatha! Thunp in kenyan ngeen-ngeen thathangan e? Kampan nungkaram anangana, yot thaa'-wantanam yimanangan ngul weenayna!” nil God.an thaw nungant. Puth Abramangana, ngaantam-ngeey nunang God.an kan-kanam wik inangan thaw nungant. Puth God.angana, pam min-minam koy' thath nunang, Abram.an.

7-21 Nil God.ana, putham thaw nungant Abram.ant, “Ngay ina, ngay puth God paththam, ngayan aak amanaman Ur.am kalang nintang, aak iikanakan, aak inan yipam thee'āng nungk.” Nil Abram.an thaw, “Ngay puth want-wanttak thiiching aak inan ka' kan-kanaman aak ngatharama?” God.an thaw nungant, “Min sheep min-minam puth min panch thamp, min anangan pal kalān ngathara.” Abram.ana, iiy, a' yump wik God.an thaw nungant yumpow; min anangana, ompam umpow thanang, a' angman wunpow thanang. Min pul thamp anangana, yimanaman puncham want thanang, ke'am ompam ump thanang.

Ngula, ka' min parpa waath yimanangan aakangan ukin, ke' min anangan mungkiythana, puth Abram.angana, koyam kenth-kenth thanang.

Ngul-ngulana, kinch kan-ngul uk-uka, nil Abram.an mee' weep pipan, weep thayan ngul wun, pith way-way thamp ngul pith-pith, a' winynyang ngul ween pithangan. Anpalana, God.an thaw nungant Abram.antan, “Ayyang, nintana, wuut way-wayamakam wunāna, a' ngangk minangam uthamān ngul. Kampan nungkaram ananganiya, aak thonak ngul iiyayn, a' work pam wiyantan iiy-iiyayn, aak waya thamp than-thanow thant, kaapiya 400akam. Ngay puth ngul wayathāng thanang pam wiy anangan, pam aak an punychanyan. A' kampan nungkaram anangana, palam aak iikanakan ngul wampayn, than yuk way min min-miniy yot wampathayn thanttakam,” nil God.an thaw.

/ Aak ngaa' ngulan wun-a, Abram.angana, nganth pi'an thath ka' thum nganth yimanangan, min Abram.angan wunp thanang piip God.antan, angman thum nganth pi'anan thath, min men-menang angman. A' piip God.ana, wik thaw nungant Abram.antan, “Ngay kan-kanam thawang nungk aak inana ngay nungk thee'āng, a' putha kampan nungkaramak thamp thee'āng aak inan.”